Ƀu sư̆ rơbư̆ dơ̆ng tah, ƀu hŭi rơngiă mông ană tơčô khom pơgiăng nao rai sit nao mă prăk pơdơi lơtret juăt lăi prăk blan abih thun bruă, ƀudah pơsir hơdră djru hră pơhlôm nua, ơi Nguyễn Văn Minh dŏ ƀơi să Ea Ning, tơring glông Čư̆ Kuin, tơring čar Dak Lak ră anai ñu pô thâo sem lăng, ĕp mă hơjăn mrô rơnoh prăk blan mơ̆ng sang bruă prăk hăng hơdôm hơdră kơnuk kơna djru kơ ƀing apăn bruă pơdơi abih thun bruă, pơƀuh amăng mrô pơkă gru lơ̆m điện tử, gơñu pơtruh nao rai pơkĕ hăng tơlơi sang bruă prăk laih anun anom bruă pơhlôm nua tla prăk blan kơ mơnuih pơdơi abih thun bruă tơring čar. Ơi Nguyễn Văn Minh brơi thâo, dơ̆ng mơ̆ng hơmâo ding kơna amăng grup hyu pơtô brơi boh thâo ia rơgơi mrô pơtô ba amăng plơi pla, pơdưm brơi tơhnal gru pơkă kiăng thâo ĕp lăng amăng telephôn rơgơi djă hyu laih anun pơtô brơi hơdră ba yua, ñu ƀuh gêh găl biă mă.

“ Huăi tơguan nao tơl sang bruă arăng dơ̆ng tah ƀudah hrơi ta gun ƀu hmao wăn khom čih hră jao kơ pô pơkŏn nao mă brơi, tơguan rơngiă hrơi mông kah dưi hơmâo mă prăk. Dơ̆ng mơ̆ng hrơi hơmâo jơlan hơdră anun, sit truh hrơi pơkă arăng mơ-it brơi mă prăk kơ ta. Gơmơi ba yua anŏ anai juăt laih, huăi kiăng nao suăi mă prăk mơta ôh, kơnong pơčrang hăng gru kơnăl QR gêh găl biă mă".

Ƀu kơnong nao tơl sang phyiang tơl adring ôh, grup boh thâo ia rơgơi mrô amăng plơi pla să Ea Ning, tơring glông Čư̆ Kuin, Dak Lak dŏ pơpha ƀing ding kơna dŏ djru bruă ƀơi anih pơsir hră pơar sa bah amăng sang să mơtam pioh djru ba, pơtô brơi mơnuih ƀôn sang hơdră mut ĕp lăng ană amăng plăng internet gru anăn ta pô. Hăng bruă ngă sơ̆n pran jua djru ba, gơgrong yom, pơtô brơi ba yua boh thâo ia rơgơi phrâo mơ̆ng khul ngă bruă ia rơgơi mrô hơmâo djru kơ lu mơnuih ƀôn sang jai hrơi thâo hruaih ƀơi Dak Lak, thâo ba yua măi telephôn ĕp lăng tơlơi pơhing amăng gru anăn ta pô, bơwih brơi djop bruă kiăng biă mă pơsir amăng tơlơi hơdip mơda kah hăng pơjrao duăm ruă, bruă pơtô hrăm, bruă ĕp lăng jơlan hơdră kơnuk kơna djru kơnang kơ boh thâo ia rơgơi mrô, mut hrŏm pơdah thâo tơlơi pơhing sĭ mơdrô amăng điện tử. Ơi Nguyễn Văn Mạnh, ding kơna pơtô ba yua boh thâo ia rơgơi kơ mơnuih ƀôn sang plơi pla, să Ea Ning, tơring glông Čư̆ Kuin, tơring čar Dak Lak brơi thâo:

“Ƀing ding kơna ngă bruă phun amăng grup pơblih yua mrô, hơmâo ngă djơ̆ bruă jao, nao hlâo, djru brơi arăng gum tơngan hrŏm pơtô brơi mơnuih ƀôn sang ƀơi djop plơi, amăng să thâo ba yua boh thâo ia rơgơi. Mơ̆ng anun, hơmâo pơđĭ tui jai hrơi klă hloh bruă ba yua mrô amăng plơi pla”.

Tui hăng ơi Nguyễn Tuấn Hà, Kơ-iăng Khua jơnum min mơnuih ƀôn sang tơring čar Dak Lak, truh ră anai đơ đam tơring čar hơmâo akŏ pơjing 2000 grup hyu pơtô brơi boh thâo ia rơgơi mrô amăng plơi pla ala ƀôn, ƀut plơi pla amăng plơi prong hăng abih bang lĕ 11.700 čô ngă ding kơna. Anai dưi lăng kah hăng tơngan djru ba prong biă mă mơ̆ng khul khua mua git gai brơi pơblih yua mrô djop gưl, gơgrong ba phun amăng bruă ba boh thâo ia rơgơi mrô, tơlơi thâo ba yua mrô brơi kơ mơnuih ƀôn sang thâo ngă hrŏm.

“Grup hyu djru amăng plơi pla anai hơmâo lu mơnuih phara ba bruă, amăng anun ƀing ngă bruă amăng gong gai să, ƀing ngă bruă amăng sang bruă mơdrô yơh phun, ngă hrŏm ba yua boh thâo ia rơgơi mrô. Dak Lak gir run ngă tui ƀơƀrư̆, ngă tui na nao re se, sơ̆n pran jua kiăng dưi truh pơ mơnuih ƀôn sang”.

Pioh pơđĭ tui lu hloh boh tŭ yua mơ̆ng djop grup boh thâo ia rơgơi amăng plơi pla, thun blan pơ anăp, tơring čar Dak Lak pơtrut kơtang bruă mă pơtô hrăm pơtô pơčrâo brơi, pơđĭ tui boh tŭ yua sit ba yua boh thâo ia rơgơi mrô kơ abih bang ƀing ding kơna. Hrŏm hăng anun, ngă hrŏm djop anom bruă pơdjơ̆ nao, boh nik ñu gah sang dăng kông djru pơkra brơi atur pioh ba yua tơlơi pơhing phrâo, ia rơgơi mrô, kiăng pơdưm amăng măi telephôn rơkơi mơnuih ƀôn sang djă hyu, anom bruă sĭ mơdrô thâo ba yua, bơwih brơi bruă mă. Mơ̆ng anun, djru hrŏm pơđĭ tui boh thâo ia rơgơi kơ mơnuih ƀôn sang yua lu hloh, tañ pơmut mrô rơnoh jŭ yap amăng mơnuih ƀôn sang.