Hơduah ĕp pơjeh phun pla djuai hlô mơnong rông, pioh pơđĭ tui hnong pơhrui glăi, rơbêh kơ 4 thun pơ hlâo adih, mơnuih ping gah hlăk ai, Lý Seo Lử dŏ pơ plơi giăm guai dêh čar Lũng Pô, să Amú Sung, tơring glông Bát Xát hơmâo blơi 100 phun boh pơ-ô̆ yuan pơjeh pơprong ba glăi pla ƀơi kual lŏn kơdư čư̆ sang anŏ ñu pô. Ñu ăt jak iâu mơnuih ƀôn sang amăng plơi pla ngă hrom pla boh čroh sĭ mơdrô. Ayong Lý Seo Lử, plơi Lũng Pô, să Amú Sung, tơring glông Bát Xát lăi:

Pla pơtơi lĕ arong aruač pơčram đơi, pla phun hơbơi plum lu thun lĕ lŏn tơba hĭ anun yơh kâo pơblih pla boh čroh, pơ anai kâo pla boh pơ-ô̆ yuan. Blung a, phun pla dŏ anet khom wai lăng răk rem tong ten samơ̆ truh thun tal 3 phun boh pơ-ô̆ boh yơh, sĭ mơdrô tŭ yua biă mă”.

Ơi Ma Seo Lằng, Khua git gai ping gah plơi Lũng Pô, să Amú Sung brơi thâo, đơ đam đang hmua pla phun boh pơ-ô̆ amăng plơi gơñu hơmâo 4 ha. Amăng anun, hơmâo lu đơ đam pla hlăk pĕ tui boh laih, thun tal sa, thun tal 2 hăng boh pơ-ô̆ phun jing pơjeh phun pla ba glăi boh tŭ yua amăng bruă bơwih ƀong huă či plơi.

“Dưi hơmâo tơlơi đing nao mơ̆ng să ba phun pla pơjeh boh pơ-ô̆ plơi Lũng Pô mă anăn gơnam OCOP să Amú Sung. Kâo dŏ pơmin anai lĕ phun pla djru kơ ta lui rơmon kŏn rin hơđong kjăp kơ plơi Lũng Pô kơñ pơgi”.

Hrom hăng tơlơi kiăng pơjing rai sa bruă mă pơtrut kơtang amăng pơđĭ kyar bơwih ƀong huă ƀơi plơi pla, 2 thun hlâo adih, ayong Chảo Láo Tả, Kơ-iăng Khua khul mơnuih ngă hmua să Dền Sáng lĕ sa amăng 10 boh sang anŏ kơsung nao hlâo ngă hrom hơdră pla boh kruăi hrĕ. Pơ anăp anai, đang boh kruăi hrĕ sang anŏ ayong Tả hơmâo pơhrui glăi yơh.

“Nao hlâo amăng bruă pla lông lăng 40 phun. Blung a hơmâo pơhrui glăi giăm 10 klăk prăk. Ăt čang rơmang mơnuih ƀôn sang amăng să hăng hơdôm să pơkŏn tơdah ayuh hyiăng gêh găl amra jing phun pla lu hloh pơsir tơlơi ƀun rin, pơđĭ kyar hơđong kjăp”.

Ayong Tẩn Láo Tả, plơi Nậm Giàng, să Dền Sáng, tơring glông Bát Xát ăt kiăng nao hrăm tui hơbô̆ anai pioh pla phrâo, pơđĭ tui mrô phun kruăi hrĕ, pơđĭ hnong pơhrui glăi kơ sang anŏ.

“Sang anŏ gơmơi tal anun ăt hơmâo čih anăn pla samơ̆ pla mă ƀiă đôč. Tal anai ăt kiăng hyu sem lăng lu sang anŏ pla lu hloh pơđĭ kyar phun pla hiư̆m pă giong anun ăt čang rơmang glăi pơ sang anŏ pla pơhrua tui dơ̆ng mơ̆ng 300-400 phun pioh pơđĭ kyar hnong pơhrui kơ sang anŏ”.

Ƀơi Bát Xát, rơngiao kơ pơtrut bruă mă akŏ pơjing bơwih ƀong huă, lui rơmŏn kŏn rin, pơhrŏ ƀun rin, ƀing mut ping gah ăt ba jơlan hlâo amăng bruă hyu pơtô pơblang, jak iâu, pơčruh prăk dong yua man pơdong plơi pla phrâo. Kah hăng djru ba lu sang anŏ pơdong sang, man pơkra sang juă glai, pơkra jơlan glông…..Khua git gai Ping gah să ơi Trịnh Tường brơi thâo: Lầu A Páo hlăk djru hrom bruă man pơdong plơi pla phrâo ƀơi anih hơmâo tơlơi pơblih rơđah biă mă. Amai Tẩn Lở Mẩy dŏ pơ plơi Nà Đoong ră ruai:

“Sang sô mơ̆ng gơmơi dŏ pơ adih ia hơjan ƀruač kơtang biă mă, răm abih yơh. Hơmâo ayong Páo nao ĕp lăng ƀuh sang gơmơi anun rơkâo djru pơdong sang anet kơ gơmơi. Gơmơi mơak biă mă”.

Ơi Giàng A Sáo hăng amai Tẩn Lở Mẩy dŏ pơ plơi Nà Đoong kơnong dua amăng mrô lu sang anŏ ƀun rin amăng să Trịnh Tường dưi djru pơdong brơi sang. Kiăng dưi ngă bruă anun, Khua git gai ping gah să Lầu A Páo hơmâo lu tơlơi pơgôp prong biă mă.

“Kâo hrom hăng ƀing khua mua amăng să hyu ĕp lăng tum teč djop sang anŏ ƀun rin kiăng hơmâo rup, pô mơnuih sit nik pơƀuh kơ tơlơi hơdip mơda tơpă sit nik mơ̆ng mơnuih ƀôn sang, mơ̆ng anun kiăng dong yua, djru ba djop sang bruă, tơpuôl mơnuih mơnam djru man pơdong, hrêp pơkra glăi sang kơ mơnuih ƀôn sang”.

Thâo hluh kơ tơlơi bơwih ƀong huă mơ̆ng lu sang anŏ mơnuih ƀôn sang amăng să ƀun rin, bruă man pơdong sang kjăp či dŏ ƀudah pơkra jơlan rô nao rai hiam klă, gêh găl ƀu amuñ ôh. Khua git gai ping gah să Lầu A Páo ba jơlan hlâo, djru pơgôp hrom, jak iâu djop sang bruă bơwih ƀong huă sĭ mơdrô gum hrom man pơdong plơi pla phrâo. Ayong Lý Xá Xe, Kơ-iăng Khua anom pơtô lăi jak iâu mơnuih ƀôn sang să Trịnh Tường, tơring glông Bát Xát lăi:

“Hăng lu sang anŏ tơnap tap bơwih ƀong huă, ơi Páo hơmâo jak iâu lu sang mơdrô, čơmah, anom bruă bơwih ƀong huă sĭ mơdrô amăng tơring glông hăng gah rơngiao kơ tơring glông, tơring  čar djru ba hơdôm sang anŏ tơnap tap man pơdong sang hiam klă hloh, djơ̆ hăng tơhnal pơkă plơi pla phrâo”.

Pơđĭ tui tơlơi gơgrong ba kơsung nao hlâo, lu mơnuih ping gah ƀơi Bát Xát hơmâo ngă djơ̆ bruă jao jing mơnuih pơtrut a apui, kiăng ngă tui hơdră pơblih phrâo bơwih ƀong huă ƀơi tơring čar. 4.440 čô mơnuih ping gah amăng ping gah tơring amra jing ƀing ngă bruă phun gơgrong ba ngă tui djop tơhnal pơkă prong amăng tơring glông thun 2022 hăng kơ hơdôm thun pơ anăp adih.