Hăng amai Phạm Thị Thu Hằng dŏ amăng phường Tân Lập, tơring čar Dak Lak, hơdôm gơnam phara hmư̆ hing amăng tơring čar hơmâo kơphê, boh kruăi hrĕ, boh ƀơr, ƀu djơ̆ kơnong lĕ gơnam đang hmua-gơnam yua ƀong mơñum đôč ôh. Pơčeh rai anăn anăn gơnam ngă hiam Pơ Lang hơmâo ngă hơdôm gơnam đang hmua, gơnam yôm phara anai dưi pơkra rai gơnam phrâo- gơnam ngă hiam. Tơdơi kơ 5 thun mơng hrơi pơphun bơwih ƀon, ñu hơmâo kơsem min-pơčeh phrâo 11 gơnam pơkra rai mơng gơnam yôm mơng plơi pla, hơmâo lu mơnuih čơkă blơi yua. Amai Phạm Thị Thu Hằng brơi thâo, gơnang nao hơdôm anŏ hơmâo amăng ƀon lan amra jing tơlơi dưi prong brơi kơ ƀing mơnuih glăk pơphun bơwih ƀong:

“Pơđĭ kyar hơdôm gơnam pơkra klă hloh mơng gơnam đang hmua amăng ƀon lan hăng anăp nao gơnam mơtah, pơkra mơtah, blơi yua mơtah. Amăng thun blan pơphun bơwih ƀong mơng ƀing gơmơi, ƀing gơmơi ƀuh anai lĕ tơlơi kiăng anăp nao hăng hluai tui hơdôm akŏ bruă djru brơi anom bơwih ƀong sĭ mơdrô ngă bơdjơ̆ nao lu mơnuih kah hăng hơdôm anom bơwih ƀong mơtah, mă yua prăk kak mơtah, prăk kak hơđong kjăp”.

Hăng đah kơmơi djuai ania Raglai, K’ho hăng Chăm ƀơi să Phan Sơn, tơring čar Lâm Đồng gơnam ƀong Kataya lĕ gơnam juăt ƀong yơh. Samơ̆ hăng grup amai Tạ Huyền Thuật, anai lĕ gơnam gơnang nao phun amăng pơphun bơwih ƀong huă. Ăt yua akan, hra mơng kual ia rơsĭ, grup amai Thuật pơluk hrŏm hla kyâo, kyâo jrao ƀơi ƀon lan; pơplih ia ƀâo mơnâo, pơkra lăng brơi hiam, kiăng jing gơnam hơmâo lu mơnuih blơi yua. Amai Tạ Huyền Thuật brơi thâo, Kataya hơđăp ră anai pơplih jing gonam sĭ hmư̆ hing, ba glăi pơhrui lu.

“Gơnam pơkra mơng ƀing gơmơi ba glăi ia ƀâo mơnâo mơng glai rưng, yua ƀing gơmơi yua hơdôm hla kyâo mơng glai rưng kiăng pơkra gơnam ƀong anai. Ƀing gơmơi iâu anai lĕ “Ia ƀâo mơnâo mơng glai rưng-Bơngăt jua ană plơi pla”, hăng tơlơi pơsit “Ia ƀâo mơñao rông tơlơi hơdip kơñ pơgi”. Yua mơng hơdôm gơnam anai, lu adơi amai, sit biă ñu lĕ ƀing amĭ glăk rông ană anet hlâo anun ƀu hơmâo bruă mă hơđong, ră anai hơmâo bruă mă, hơdip jai đăo gơnang hăng hơmâo tơlơi dưi pơđĭ kyar sui pơ anăp”.

Ăt kar hăng hơdôm bruă jơlan glông, hơdôm ară jơlan hơđăp glăk hơmâo prap lui čuk pơkra jing jơlan prong, hơdôm gơnam yôm ƀơi Dak Lak ăt glăk ƀơƀrư̆ hơmâo ƀing pơphun bơwih ƀong ƀơi Dak Lak prap lui pơđĭ kyar jing gơnam sĭ hmư̆ hing. Ayong Lê Anh Thông, sa čô mơnuih pơphun bơwih ƀong hăng gơnam pơkra mơng rơmô-mơnŭ ƀơi să Sơn Hòa brơi thâo, rơmô jơman mơng ƀon lan, mơnŭ ri tui djuai phrâo ăt amra djă pioh rơnoh yôm phara mơng ñu lơ̆m hơmâo pơđĭ kyar tui jơlan gah lăp djơ̆. Samơ̆ kiăng dưi pok rai anăn sĭ mơdrô phrâo, kiăng hơmâo prăk tuh pơ alin hăng mơnuih mă bruă dong:

“Tơlơi tơnap tap hloh ră anai lĕ kơƀah prăk tuh pơ alin, bruă čan prăk djru ngă hmua dŏ tơnap; dua dong lĕ kơƀah mơnuih mă bruă hrŏm. Kâo čang rơmang hơmâo Kơnuk kơna đing nao djru brơi prăk tuh pơ alin, lăi pơthâo gơnam amăng hơdôm glông pôr pơhing ƀon lan, laih dong ngă gêh gal kiăng pơphun bơwih ƀong pơƀut, hơmâo dong lu sang anŏ mut hrŏm, pơgôp pơđĭ kyar bơwih ƀong huă hơđong kjăp brơi kual”.

Kual Tong krah-Dap kơdư, kual hơmâo lu gru grua, hơmâo lu gơnam amăng kual glai rưng-ia rơsĭ, glăk pơtrut hăng pran jua pơčeh phrâo, hrưn đĭ pơdrong sah, djă pioh gru grua hăng wai pơgang jum dar. Hơdôm gơnam anun lĕ gơnam ngă hiam mơng ia mơmuă boh ƀơr, akan tul Kataya ƀudah mơnong rơmô…brơi ƀuh tơdah thâo yua boh thâo hăng gơnam hơmâo ƀơi ƀon lan, hơdôm rơnoh yôm gru grua amra jing gơnam sĭ mơdrô phrâo, dưi ba hyu sĭ pơ lu anih./.