VOV4.Jarai - Să Dă Chais, tơring glông Lạc Dương, tơring čar Lâm Đồng hmâo giăm truh 85% mrô mơnuih ƀôn sang lĕ djuai ania K’ho. Gơnang kơ ngă tui phiăn juăt khăp kơ lŏn ia mơng kual ngă hơkrŭ đưm, mơng să Khul tơhan Sông kơtang mơnuih ƀôn sang, hrom hăng tơlơi lăng ba tuh pơplai mơng Ping gah hăng Kơnuk kơna amăng djop bruă, Dă Chais hmâo tañ yak rơgao tơlơi tơnap, hrưn đĭ tơtlaih mơng rin rơpa hăng jing să djơ̆ tơhnal pơkă mơng dêh čar gah pơdŏng plơi pla phrâo.

Mơng plơi prong Đà Lạt, găn rơgao rơbêh kơ 60km ƀơi jơlan 27C tui anăp nao gah ia rơsĭ Nha Trang lĕ truh kual ngă hơkrŭ đưm Đồng Mang, ră anai lĕ să Dă Chais mơng tơring glông Lạc Dương (Lâm Đồng) – kual ngă hơkrŭ đưm dưi lăng lĕ ƀu tek rơwek nao ôh, jing anih gơnang kơjăp, pơgang pơhlôm klă kơ ling tơhan amăng rơnuk blah ayăt Mi pơtlaih lŏn ia hăng ƀing ngụy quân, ngụy quyền, djă kơjăp glông bruă tô nao rai hơdôm bôh tơring čar kual Dơnung Dăp Kơdư hăng Khánh Hòa, Ninh Thuận.

Tui hăng ling tơhan hơđăp Kơ Dơng Ha Dương, ƀơi plơi Tu Poh, să Dă Chais, hmâo laih 17 čô ană bă djuai ania K’ho ƀơi anai rơbuh trun hăng dưi čih djă pioh anăn ƀơi Gŏng kut hơdor glăi mơng să hăng tơring glông. Gơñu lĕ pô ba gru hlâo mơng ană bă khin hơtai mơng dlai tlô čư̆ siăng hmâo ha tal gum hrom hăng plơi pla mơng pô, pơjing kual ngă hơkrŭ đưm anai. Ră anai, ƀơi anai jing laih să plơi pla phrâo, hăng lu tơhnal gal hăng amuñ phrâo kiăng pơđĭ kyar dong, djơ̆ hăng anăn să Khul tơhan sông kơtang mơnuih ƀôn sang.

“Hlâo adih kual ngă hơkrŭ đưm, juăt pơplih nao rai lu wot, ră anai pơhlôm dô̆ plơi pla, ngă đang hmua hơđong, bơwih ƀong hơđong, tơlơi hơdip mơda ƀu dô̆ tơnap tap kah hăng đưm hlâo dong tah. Gơnang kơ kơnuk kơna lăng ba pơtô glăi hơdră pla kơ phê, bôh hông, bôh mắc ca... djop djuai phun pla, anun tơlơi hơdip mơnuih ƀôn sang hơđong laih. Jơlan hơdră plơi pla phrâo dưi pok pơhai, apui lơtrik, jơlan nao rai, anom ia jrao leng kơ dưi tuh pơplai klă hiam, tơlơi hơdip mơda pơđĭ kyar, jơnap trơi pơđao”.

Anom bruă Jơnum min mơnuih ƀôn sang să plơi pla phrâo Dă Chais klă hiam agaih hơdjă

Dong mơng sa bôh să tơnap tap, kơƀah tơnap kuh thun hăng giăm truh ha mơkrah mrô sang anô̆ ƀun rin, gơnang kơ pok pơhai ha amăng plĕ hăng hmâo bôh tơhnal hơdôm jơlan hơdră, hơdră bruă mơng Ping gah hăng Kơnuk kơna, biă ñu lĕ khin hơtai mă yua bôh thâo phrâo amăng bruă bơwih ƀong huă, ngă đang hmua, pơlar phun pla sui thun... pơhrui glăi hơnong ñu rim akô̆ mơnuih mơng Dă Chais hmâo đĭ laih 43 klăk prăk sa thun, sang anô̆ ƀun rin ră anai kơnong kơ dô̆ rơbêh kơ 6%. Hơdôm bruă pơtô pơhrăm, bruă ia jrao, bôh thâo đưm leng kơ hmâo yak pơđĭ kyar klă, rơnuk rơnua bruă kơđi čar hăng hơđong pơhlôm mơnuih mơnam dưi wai lăng kơjăp. Ƀơi anăp tơlơi pơplih mơng plơi pla pô, ơi Bon Tô Xa Nga, ƀơi plơi Đưng K’Sị, să Dă Chais brơi thâo amra pơsur dong ană amôn gum tơngan hrom hăng plơi pla ngă tui ba glăi bôh tơhnal hơdôm jơlan hơdră yua kơ plơi pla pơphun, pơsit pran jua ngă brơi Dă Chais pơđĭ kyar hrưn đĭ amăng ƀrư̆:

“Pơdŏng plơi pla phrâo lĕ khom hrưn đĭ pơđĭ kyar bơwih ƀong, pơđĭ tui prăk pơhrui glăi hăng drơi pô rim mơnuih ƀôn sang leng kơ khom thâo gum hrom. Kâo khom lăi pơthâo pơsur, čung ba ƀing hlăk ai mơ̆ kiăng dưi ngă tơlơi anun lĕ drơi pô khom ba jơlan hlâo ngă gru hlâo”.

Anom mă yua dưi tuh pơplai klă hiam, pơphun hmâo gru mơng plơi prong phrâo thâo rơgơi

Hluai tui hơdôm bôh tơhnal dưi ngă, să Dă Chais glăk hrưn đĭ amra djơ̆ hăng tơhnal phrâo pơkă plơi pla phrâo amăng thun 2022. Tui hăng ơi Liêng Jrang Ha Thuyên, Kơ-iăng Khua Jơnum min mơnuih ƀôn sang să Dă Chais, yua bơdjơ̆ nao mơng klin ruă Covid-19, anun bruă ngă giong tơhnal pơkă anai tui djơ̆ kơčăo bruă lĕ tơnap tap biă. Khă hnun hai, ƀơi anăp hơdôm bôh tơhnal rơđah rơđông mơng bruă ngă juăt hăng tơlơi hơđong phrâo amăng pơgang, pơgăn klin ruă Covid-19 mơng Kơnuk kơna, hrom hăng gum tơngan hrom, sa jua mơng mơnuih ƀôn sang hăng abih bang glông bruă kơđi čar, Dă Chais amra gir run abih pran jua kiăng djơ̆ hăng să plơi pla phrâo tui tơhnal pơkă phrâo amăng thun anai. 

“Dong mơng gum pran hrom, sa jua mơng neh wa lĕ să dưi hmâo laih abih bang 19 tơhnal pơkă plơi pla phrâo amăng thun 2019. Kiăng ngă tui dong hơdôm bôh tơhnal dưi ngă, pơhlôm hơdôm tơhnal pơkă dưi ngă hăng anăp nao să plơi pla phrâo tui tơhnal pơkă phrâo amăng thun 2022 hăng hơdôm thun tô̆ tui, rơngiao kơ tơlơi lăng ba tuh pơplai mơng Ping gah hăng Kơnuk kơna, kiăng hmâo tơlơi gum tơngan hrom mơng abih bang glông bruă kơđi čar gum hrom. Amăng anun, biă ñu lĕ khom dưi ngă tui bruă mơng ƀing ling tơhan hơđăp, hơdôm mơnuih hmâo arăng đăo gơnang ƀơi hơdôm bôh plơi pla kiăng kơtang hloh dong bruă lăi pơhing, pơsur djop mơnuih ƀôn sang gum hrom, gum pran mut sa jua kiăng pơdŏng giong să plơi pla phrâo tui tơhnal pơkă phrâo”.

Dă Chais lĕ să Khul tơhan sông kơtang mơnuih ƀôn sang, jing kual ngă hơkrŭ đưm ha pran jua hăng ƀing ană bă, gir run abih pran jua amăng bruă tơgŭ hơkrŭ hăng hur har amăng bruă bơwih ƀong huă. Yua anun, tơhnal pơkă ngă giong să djơ̆ hăng plơi pla phrâo pơplih phrâo amra tañ dưi ngă amăng pơgi kơdih anai, tañ pơdŏng Dă Chais jing sa amăng hơdôm kual bơwih ƀong kơdrom mơng tơring glông Lạc Dương lăi ha jăn hăng tơring čar Lâm Đồng lăi hrom./.

Quang Sáng: Čih – Siu H’ Prăk: Pơblang