Ơi Đinh Đăm - Tha plơi Kon Sơ Nglok, să Hà Đông, tơring glông Đăk Đoa, tơring čar Gia Lai bơră ruai glăi: Ƀơi să Hà Đông amăng rơnuk blah wang lu mơnuih rin rơpa, neh met wa ƀơi anai ƀu hơmâo sa asar braih či ƀong. Samơ̆ lơ̆m hơmâo tơlơi iâu pơthưr nao blah wang, hlơi hlơi lêng kơ ha pran sa jua kiăng ba truh tơlơi dưi amăng bruă ngă hơkrŭ. Lơ̆m anun, mơnuih ƀon sang amăng să gir kơtir bơwih ƀong huă kiăng hơmâo braih, hơmâo mơnong djru brơi ling tơhan. Rĭm boh sang anŏ sa mong braih, sang anŏ hlơi hơmâo lu pơgôp lu kiăng djru brơi ling tơhan. Ană plơi pla mah rơmŏn rơpa ƀong hơbơi pơtơi samơ̆ gir run ƀu brơi ling tơhan kơƀah asơi huă. Tha plơi Đinh Đăm hơdor glăi:

“Mơnuih ƀon sang hmư̆ hing ƀing apăn bruă glăk dŏ pơđăm amăng kual, ƀing gơñu pơphun jơnum, hrŏm hăng bruă pơklaih rơngai lŏn ia kiăng ba glăi tơlơi rơngai, hơdip trơi pơđao, ngă kơ mơnuih ƀon sang tui nao ĕp. Mơnuih ƀon sang ƀu gưt hmư̆ tui ayăt, kơtư̆ juă mơnuih ƀon sang, čang rơmang hơmâo tơlơi hơdip trơi pơđao yua anun mơnuih ƀon sang tui ƀô̆ đô̆i, gum pơgôp, pơgang nao rai, ƀu pơčlah ôh. Hlâo adih, ƀing ayăt mă pơkŏng, taih mơnuih ƀon sang djai hơdip, klĕ dŏp un mơnŭ yua anun neh met wa hil biă mă”.

Dŏ amăng kual čư̆ siăng kriang pơtâo tơlơi hơdip tơnap tap, Hà Đông pơplih sit nik lơ̆m hơmâo tơlơi đing nao mơng Ping gah hăng Kơnuk kơna djru brơi kual mơnuih djuai ania ƀiă. Yua anun, jơlan glông mơng să Đăk Sơ Mei nao pơ să Hà Đông amăng thun 2015 lĕ sa amăng hơdôm bruă pơtrut djru brơi Hà Đông hrưn đĭ. Kơnong giăm anai rơbêh 2 thun, mơng hơdră djru kơnuk kơna, tơdrông tua amăng plơi pla hơmâo plih hĭ man pơkra hăng ƀêtông glông 100 met, rơhaih 3 met, tô nao rai 5 boh plơi. Ayong Đinh Nhực, dŏ ƀơi plơi Ma Har, să Hà Đông hok mơ-ak brơi thâo:

“Hlâo adih, jơlan glông, tơdrông tuai nao rai tơnap tap biă mă. Ră anai hơmâo tơdrông phrâo, bruă nao rai, pơdŭ pơgiăng gơnam đang hmua mơng neh met wa gêh gal yơh, bruă bơwih ƀong, nao rai amuñ ƀiă. Ƀing ană tơčô amăng plơi pla huăi rơngiă hrơi mông, jơlan agaih rơnăk, bơni kơ Ping gah hăng Kơnuk kơna hơmâo đing nao hơdôm anih dŏ tơnap tap anai”.

Hlâo adih, mơnuih ƀon sang dŏ ƀơi să Hà Đông kơnong ngă hmua pơdai pơhrui ƀu hơmâo ôh. Ră anai, neh met wa hơmâo ngă pơdai 2 bơyan yơh. Hrŏm hăng anun, mơnuih ngă hmua amăng să hơmâo mă hơdôm pơjeh phun pla phrâo anun lĕ phun bơr, kơphê, mă yua boh thâo măi mok phrâo amăng ngă hmua, rông hlô mơnong kiăng pơđĭ kyar bơwih ƀong huă amăng sang anŏ. Ră anai, lăi nao mơnuih pơdrông asah djuai ania Bahnar Đinh Hùng dŏ ƀơi plơi Kon Sơ Nglok, neh met wa lêng kơ pơpŭ yua ñu lĕ mơnuih dŏ hlăk ai samơ̆ rơgơi amăng bơwih ƀong laih dong thâo djru brơi abih bang mơnuih. Ră anai, Đinh Hùng glăk ngă 4 ektar kơphê pơhrui glăk thun blan pĕ pơhrui, 5 ektar phun keo, 3 ektar phun hla bầu pơhrui glăi rơbêh 300 klăk rĭm thun. Mơng sang anŏ ƀun rin, truh thun 2019, Đinh Hùng jing mơnuih rơgơi bơwih ƀong huă amăng plơi pla. Ayong Đinh Hùng brơi thâo:

“Hlâo adih neh met wa kơnong ngă đang hmua đôč samơ̆ tơdơi anai hơmâo hrăm tui arăng pla phun keo, pơđĭ kyar kơphê mă yua boh thâo phrâo. Kơnong phun hla bầu hơmâo Ping gah să hăng gong gai să pơkiăo nao hrăm pơ să Đăk SơMei. Tơdơi kơ pla phun kyâo anai ƀuh hơđong tơlơi hơdip hăng kâo pô ăt črâo brơi neh met wa amăng plơi pla pơđĭ kyar pla pơjing”.

Ƀuh hơdôm anŏ pơplih mơng să Hà Đông amăng hơdôm thun laih rơgao, ơi Hoàng Cam, Khua git gai Ping gah să Hà Đông brơi thâo: Tơlơi hơdip kơ mơnuih djuai ania Bahnar ƀơi să Hà Đông truh ră anai mah dŏ tơnap tap mơn samơ̆ hơmâo lu anŏ pơplih phrâo pơhmu hăng hlâo adih. Hơmâo tơlơi đing nao mơng djop gưl, gong gai, man pơkra jơlan, dăng hyu apui lơtrik, hơmâo sang hră, sang ia jrao djơ̆ hăng tơlơi kiăng mơng neh met wa. Anai lĕ să tơnap tap hloh yua anun bruă ngă tui Jơlan hơdră tui hơnong pơkă dêh čar amăng plơi pơdong plơi pla phrâo, să Hà Đông dưi ngă 9/19 hơnong pơkă. Pơhrui rĭm akŏ mơnuih amăng thun 2022 rơbêh 11 klăk prăk. Pơ anăp anai, kiăng djru brơi Hà Đông pơđĭ kyar ƀiă dong, gưl Ping gah, gong gai să hăng tơring glông Đăk Đoa ăt ba tơbiă lu hơnong pơkă, jơlan gah kiăng ba Hà Đông hrưn đĭ.

“Să glăk đing nao čih anăn kiăng pok pơhai jơlan hơdră tui hơnong pơkă dêh čar amăng pơđĭ kyar bơwih ƀong huă mơnuih mơnam kual mơnuih djuai ania ƀiă kah hăng jơlan hơdră tui hơnong pơkă dêh čar amăng pơhrŏ trun ƀun rin. Ră anai glăk hơmâo akŏ bruă dưm dăp man pơdong kiăng hơđong anĭ dŏ hơdip, pơčlah brơi rơhôi ƀiă mơng 5 boh plơi pla, man pơdong plơi pla phrâo. Ƀơi anai hơmâo dăng nao hrĕ apui lơtrik, jơlan glông, ia hơdjă kiăng mơnuih ƀon sang nao dŏ hăng ƀing rơnuk tơdơi amra nao dŏ pơ anai mơn. Tơlơi anai pơtrut pơđĭ kyar kơtang ƀơi ƀon lan, tơlơi hơdip kơ mơnuih ƀon sang hrưn đĭ, pơhrŏ trun ƀun rin, djru brơi neh met wa pơđĭ kyar”.

Nao pơ Hà Đông ră anai, amra ƀuh tơlơi pơplih phrâo mơng kual ngă hơkrŭ, ră anai hơmâo lu sang pơdong phrâo, hmua pơdai mơtah mơda, đang kơphê hiam mơboh. Hrŏm hăng tơlơi đing nao mơng Ping gah hăng Kơnuk kơna hluai tui hơdôm jơlan hơdră tui hơnong pơkă dêh čar amăng pơhrŏ trun ƀun rin, neh met wa ƀơi kual sông kơtang anai tŏ tui djă pioh gru grua, hrưn đĭ amăng rơnuk phrâo hăng jai hrơi pơđĭ kyar./.