Sang anŏ yă Ngô Thị Khải, mơnuih dŏ amăng plơi Phú Mỹ, să Đình Tổ, plơi prong Thuận Thành, tơring čar Bắc Ninh lĕ sa amăng hơdôm boh sang anŏ arăng ruah ngă lông lăng hơbô̆ bruă pơčlah asuk ruk ƀơi anih tui hơnong pơkă man pơdong plơi pla phrâo tui kru hle. Amăng sang anŏ, asuk ruk hơmâo pơčlah 3 kơthung-kơthung dưm asuk dưi pơkra glăi hơmâo get čai, kơsu, hră pơ-ar, kuăt pơsơi….Kơthung dưm asuk vô cơ hăng kơthung dưm asuk hữu cơ. Kơnong asuk hữu cơ sang anŏ ñu amra luk pơđăm hăng ia jrao EMO kiăng pơkra jing kmơk pruai phun pla. Yă Ngô Thị Khải brơi thâo, hơbô̆ bruă anai hơmâo mơnuih ƀon sang dong yua, yua dưi pơgôp amăng bruă wai lăng anih dŏ hơdip agaih rơnăk, plai ƀiă asuk ruk tuh raih lui gah rơngiao:

“Kâo lĕ sa čô mơnuih apăn bruă Ping gah lêng kơ ba jơlan hlâo amăng wai lăng anih dŏ hơdip jum dar. Sit biă ñu amăng sang anŏ, adơi ayong, met wa lêng kơ pơčlah asuk ruk amăng sang anŏ soh. Amăng sang anŏ gơmơi pơčlah jing 3 mơta asuk. Hơdôm asuk ruk anun lĕ añăm tam, asơi ƀâo mơ-ih ƀing gơmơi dưm ha bơnah hăng ƀing gơmơi pơluk đăm hăng ia jrao EMO kiăng pơkra kmơk pruai brơi añăm tam, tơdah lu amra pruai brơi hmua pơdai hlao”.

Să Đình Tổ, plơi prong Thuận Thành, tơring čar Bắc Ninh dưi đĭ plơi pla phrâo tui kru hle amăng thun 2021. Mơng anun ăt pơsir hĭ hơƀak jrak yua asuk ruk, eh, ia mơañă mơng hlô rông, ƀơi hơdôm anih bơwih ƀong, anai lĕ hơdră akŏ phun mơ să Đình Tổ ngă tui kiăng pơsir hĭ bruă hơƀak jrak amăng đơ đam să. Samơ̆, tui hơnong pơkă rơwang thun 2021-2025, hơnong pơkă mrô 17 kơ anih dŏ hơdip jum dar hăng pơhlôm mơnong ƀong huă hơdjă hơmâo lu tơlơi rơkâo klă ƀiă dong hăng tơnap ngă tui. Hơdôm tơlơi tơnap anai glăk hơmâo ƀon lan đing nao pơsir hĭ. Ơi Nguyễn Văn Thành, Khua Jơnum min mơnuih ƀôn sang să Đình Tổ brơi thâo:

“Ră anai, ƀing gơmơi bưp tơnap tal hloh lĕ pơsir hĭ ia djah pơđoh hyu gah rơngiao amăng plơi pla. Laih dong tơnap tal amăng hơnong pơkă anih dŏ hơdip. Ră anai tui hơnong pơkă phrâo, kiăng hơmâo rơbêh 65% mrô sang anŏ hơmâo ia yua hơdjă ƀơi hơdôm anih pơđoh hyu ia yua. Tui hơđăp kiăng kơnong hơdôm boh sang anŏ mă yua ia hơdjă”.

Hlâo adih, hăng hơnong pơkă anih dŏ hơdip jum dar amăng să plơi pla phrâo, kiăng kơnong mơnuih ƀon sang hơmâo hơdră pơsir mă, duñ pơƀut asuk ruk lĕ dưi yơh. Samơ̆ tui hơnong pơkă să plơi pla phrâo rơwang thun 2021-2025, tơlơi pơkă khŏm ngă ƀiă biă mă ñu 30% mrô sang anŏ amăng să kiăng ngă tui bruă pơčlah asuk ruk ƀơi anih, mrô asuk ruk kơsu hơmâo duñ pơƀut, mă yua glăi, pơkra pơjing, pơsir hĭ tui tơlơi pơkă kiăng mơng 50%. Anai lĕ tơlơi ƀu amuñ ôh hăng hơdôm boh plơi pla yua ƀơi anai mơnuih ƀon sang aka ƀu thâo phe pho ôh. Yă Hoàng Thanh Bình, Kơ-iăng khua Jơnum min mơnuih ƀôn sang să Cao Đại, tơring glông Vĩnh Tường, tơring čar Vĩnh Phúc brơi thâo: Kiăng pơsir hĭ tơnap tap mơng hơnong pơkă ayuh hyiăng amăng man pơdong plơi pla phrâo, Ping gah, Jơnum min mơnuih ƀôn sang să hơmâo pơkiăo nao mơnuih apăn bruă nao tơl plơi pla gum hrŏm, črâo ba, pơsir hĭ tơnap tap, gum găn lơm pok pơhai ngă tui. Laih dong, pơphun lu bruă mă sit nik pơlir hăng bruă pơsur “pơjing sang anŏ 5 mơta ƀu ngă, 3 agaih rơnăk”-lăng ƀing apăn bruă Ping gah hăng mơnuih apăn akŏ djop gưl, khul grup lĕ akŏ phun amăng bruă pơtô pơbalng, ba jơlan ngă tui:

“Ping gah Jơnum min gơmơi ăt hơmâo jao brơi khul đah kơmơi, mơnuih ngă hmua, ƀing mơnuih ngă akŏ amăng ƀut plơi pla, ƀing mơnuih apăn bruă Ping gah lĕ ƀing mơnuih ba jơlan hlâo amăng bruă pơtô pơblang kiăng ƀing gơmơi ngă tui blung a. Tơdơi anun ƀing gơmơi amra pok prong. Truh ră anai mơnuih ƀon sang juăt laih amăng bruă pơčlah asuk ruk ƀamăng sang anŏ pioh kơ ngă kmơk compot”.

Arăng lăng anai lĕ hơnong pơkă amuñ ngă, ƀu kiăng lu prăk kak tuh pơ alin mơng Kơnuk kơna, samơ̆ hơnong pơkă anih dŏ hơdip glăk jing tơlơi ngă tơnap tap hăng hơdôm boh ƀon lan. Tui ơi Phùng Xuân Tiến, kơ-iăng khua anom bruă djru ngă tui jơlan hơdră man pơdong plơi pla phrâo Vĩnh Phúc, kiăng pơsir hĭ hơdôm tơlơi tơnap tap anai, gong gai kiăng ba jơlan hlâo, kah hăng pơtrut kơtang kiăng ngă pơgiong tañ hơdôm hơnong pơkă phrâo. Hrŏm hăng anun, kiăng jak iâu gum pơgôp mơng abih bang mơnuih, tơlơi mut hrŏm mơng djop anih anom tuh pơ alin amăng bruă wai pơgang anih dŏ hơdip.

“Bruă jak iâu mut hrŏm mơng mơnuih ƀon sang, anom bơwih ƀong sĭ mơdrô lĕ yôm hloh. Tơdah ƀing ta ngă klă bruă jak iâu mơnuih mơnam, pơtrut pơsur gum pơgôp mơng anom bơwih ƀong sĭ mơdrô, khul grup, rĭm čô mơnuih; pơtrut mut hrŏm mơng mwonuih ƀon sang, hơdôm hơnong pơkă gru grua, anih dŏ hơdip, ia yua hơdjă…amra pok pơhai tŭ yua”.

Tuh pơ alin, ba tơbiă hơnong pơkă hăng tơlơi črâo ba tong ten ngă tui hơnong pơkă anih dŏ hơdip jum dar amăng man pơdong plơi pla phrâo, anai amra jing hơdră pơsir hĭ tơnap tap pơhlôm brơi anih dŏ hơdip amăng plơi pla jai hrơi pơplih phrâo./.