Kpuih Trí, 10 thun dŏ ƀơi plơi Nú, drit droai mơ̆ng anet laih. Ñu hơdip hăng yă ñu, yă ñu hai tha mơn, ƀu hơmâo pran jua, rin biă. Pơ anăp anai Trí ƀu thâo ngă hiư̆m pă ôh tơdah ƀu hơmâo tơlơi gum djru mơ̆ng ƀing khua, ling tơhan pơgang guai Ia Nan, Tơhan pơgang guai tơring čar Gia Lai:“Kâo hok mơ-ak, bơni biă mă lơ̆m hơmâo ƀing met rông ba. Ƀing met pơtô brơi kâo hrăm hră, pit đih, hơdip hrim hrơi khŏm thâo rơmet set, agaih ƀu dưi ngă hlŭ hlañ ôh”.

Kpuih Trí jing sa amăng lu čơđai sang hră mơ̆ng sang hră gưl sa Kpă Klơng đôč sang anŏ tơnap tap, hơmâo tơhan pơgang guai Ia Nan čơkă rông ba. Hơmâo mơnuih đa, hơmâo ƀing tơhan tŭ nao pơ puih kơđông hlao mơtăm či čem rông ba, hơmâo đa dong lĕ djru prăk 500 rơbâo rim blan djru kơ bruă hrăm hră. Thiếu tá Rahlan Thức, mơnuih apăn bruă kơđi čar Puih kơđông tơhan Ia Nan brơi thâo:“Puih kơđông hơmâo djru ba mơnuih ƀôn sang pơ anăp mơtăm. Biă ñu anom bruă pơphun jơlan hơdră čơkă čem rông ba ƀing čơđai, hơbô̆ bruă pla añăm gum hrŏm hăng čơđai sang hră dŏ glăi tơhrơi, kơthung braih khăp pap. Ƀing tơhan ăt thâo pơmin, gơgrong bruă hloh, ƀu hŭi kơ glêh glar, gir ngă bruă hơmâo jao”.

Sang hră gưl sa Kpă Klơng hơmâo 371 čô čơđai sang hră mơ̆ng anih 1 truh anih 5, 100% mrô čơđai lĕ djuai ania Jarai. Ƀơi anai mrô sang anŏ rin lu, lơ̆m anun tơlơi pơmin kiăng hrăm hră mơ̆ng mơnuih djuai ƀiă pơ anai aka ƀu dlăm ôh. Nai pơtô Trần Thị Nhung, Khua sang hră lăi pơthâo: hơdôm thun laih rơgao, sang hră pơsir hĭ abih djŏp tơlơi tơnap tap kiăng pơđĭ tui anŏ klă bruă pơtô hăng hrăm. Yua hơmâo lu sang anŏ nao pơ hmua ƀu ba ană bă nao pơ sang hră ôh anun jing ƀing čơđai rơbat tơkai nao hrăm. Kiăng čơđai nao hrăm amuñ ƀiă, sang hră brơi anih sa hăng anih 2 hrăm pơ hơdôm boh sang hră giăm sang ƀiă. Bơ ƀing čơđai anih prong ƀiă lĕ hrăm pơ sang hră phun. Lu čơđai sang hră sang anŏ ñu ataih đơi, ƀing nai hrŏm hăng ƀing tơhan mơ̆ng Puih kơđông tơhan pơgang guai Ia Nan nao tơl sang tŭ čơđao nao sang hră. Nai Trần Thị Nhung ăt brơi thâo dong, rơngiao kơ pơđĭ tui mông hrăm Tiếng Việt, rim wơ̆t hrơi tơjuh, sang hră pơphun pơtô hrăm thim 2 wơ̆t dong ƀu hơmâo mă prăk ôh. Abih bang ƀing čơđai lêng kơ hơmâo ƀơk brơi hră čih, gai čih kiăng ƀing gơñu khăp kơ sang hră, hor nao sang hră rim hrơi:“Hơmâo djru ba rơdêh, hră čih, gai čih, jĕp buh kiăng ƀing čơđai nao hrăm hră. Akŏ thun hrăm khŏm prăp lui hră, gai čih. Him lăng ta hơmâo 370 čô čơđai lĕ ta khŏm prăp lui hơdôm hơdrôm hră hrăm hră čih mơn kiăng ƀing čơđai rai pơ anai mưn mă ding dăng či hrăm”.

Ƀơi să Ia Nan, tơring glông Đức Cơ, tơring čar Gia Lai amăng 7-8 thun giăm anai, 100% mrô čơđai amăng thun hrăm hră hơmâo nao hrăm. Tơlơi gir run mơ̆ng sang hră hrŏm hăng djŏp gong gai, khul grup tơhan pơgang guai djru ba ƀing čơđai nao hrăm hră plai ƀiă tơnap tap./.