Ngă tui jơlan hơdră akŏ pơjing đang ngă gru hlâo, ơi Trần Anh Lang, ƀơi plơi Mỹ Sơn, să Duy Phú, tơring glông Duy Xuyên, tơring čar Quảng Nam nao hlâo pơplih đang mơ̆ng sang anŏ ñu, prong giăm 2 hek, pla djŏp djuai hơmâo nua pơmă kah hăng boh hyiăng, boh kruăi mih, kơtor...Ơi Trần Anh Lang brơi thâo, hlâo adih đang anai juăt pla lu djuai phun, ƀu hơmâo đơi ôh. Hơmâo gong gai lăng ba, ơi Lang pơplih glăi đang hmua ñu. Ră anai, đang boh troh ơi Trần Anh Lang mơboh biă mă, pơhrui prăk lu mơn. Ơi Trần Anh Lang dŏ pla plah phun ƀiă hrơi dong kah hăng  rơtă, boh dơyan, añăm hla rok, wơ̆t hăng rông akan kiăng hơmâo lu prăk.

“Akŏ pơjing đang ngă gru, blung a bơwih ƀong klă kơ sang anŏ, laih dong thâo pơtô brơi kơ sang anŏ pơkŏn dong. Kơnuk kơna djru kơ ta lơ̆m akŏ pơjing đang ngă gru hlâo lĕ 5 klăk prăk laih anun đang anai hơmâo pơhrui prăk lu biă”.

Ƀu kơnong sang anŏ ơi Trần Anh Lang đôč ôh, mơ̆ng hrơi ngă hơbô̆ bruă kual plơi pla phrâo ngă gru ba jơlan, lu sang anŏ ƀơi să Duy Phú, tơring glông Duy Xuyên, tơring čar Quảng Nam, pơplih tơlơi pơmin, hơdră ngă bruă kiăng akŏ pơjing đang hmua anih anom hiam, agaih, pơtrut pơkra gơnam, pơđĭ kyar bơwih ƀong, pơđĭ tui prăk kăk. Yă Trần Thị Dương, Khua Jơnum min mơnuih ƀôn sang să Duy Phú, tơring glông Duy Xuyên brơi thâo: Truh ră anai să glăk pơkra glăi, akŏ pơdong 70 blah đang, prong 15 hek ta, amăng anun, 10 blah đang ngă gru tui hơnong pơkă. Hơbô̆ bruă đang ngă gru hơmâo prăp kač gru hăng pla djuai kyâo tui tơlơi pơkă, amăng ƀrư̆ ba glăi boh tŭ yua, pơđĭ tui prăk kăk kơ mơnuih ngă hmua. Tui hăng yă Trần Thị Dương, truh ră anai mrô sang anŏ rin mơ̆ng să dŏ glăi 4,88%, prăk pơhrui yap tui akŏ mơnuih hơmâo rơbêh 47 klăk/thun.

“Hơdôm hơbô̆ bruă đang ngă gru jing ngă pơplih tơlơi pơmin kơ mơnuih ƀôn sang, mơ̆ng anun hơdôm boh sang anŏ ieo gah pơƀut ngă djơ̆ hăng lŏn tơnah či pla djuai phun pla tŭ yua, yôm hloh lĕ akŏ pơjing anih hơdip mơ-ak. Gong gai hơmâo djru anah phun pla, pơƀut pơkra tui boh thâo kĭ thuâ̆t kơ mơnuih ƀôn sang, neh met wa kơnong kơ prăp rơmet lŏn hăng wai lăng đôč yơh”.

Rơngiao kơ djru ba rim boh sang 5 klăk prăk pơphun ngă hơbô̆ bruă đang ngă gru, tơring glông Duy Xuyên tơring čar Quảng Nam pơtrut pôr pơthâo, pơtô lăi, iâu pơthưr mơnuih ƀôn sang thâo pơmin ngă agaih anih hơdip. Laih dong, pơtô brơi, ba djuai phun pla phrâo mơboh jor kiăng hơmâo gơnam lu hloh, pơđĭ kyar kual ngă hmua, plơi pla tui jơlan bơwih brơi kơ tuai čuă ngui hlao. Ơi Đặng Hữu Phúc, Kơ-iăng khua jơnum min mơnuih ƀôn sang tơring glông Duy Xuyên, brơi thâo: Hơdôm thun rơgao, Anom bruă ngă hmua hăng gong gai tơring glông djru ba mơnuih ƀôn sang rơbêh 1 klai prăk pioh tuh pơ alin ngă hơbô̆ bruă đang hmua ngă gru. Mơ̆ng anun pơplih phrâo tơlơi pơmin truh kơ bruă mă mơ̆ng rim čô mơnuih amăng bruă pơđĭ kyar ngă hmua pla pơjing, akŏ pơdong anih anom, plơi pla hiam, pơdrong sah, hơmâo tơlơi hơdip mơ-ak.

“Kơ boh tŭ yua hăng hơdôm blah đang, rơngiao kơ ngă hiam anih hơdip, ngă agaih plơi pla, laih dong djru mơnuih ƀôn sang hơmâo prăk mơ̆ng đang hmua dong, pơplih tơlơi bơwih ƀong mơ̆ng sang anŏ. Mơ̆ng prăk kơnuk kơna pioh man pơdong plơi pla phrâo, amăng anun hơmâo djru ngă hơbô̆ bruă kơ hơdôm boh sang anŏ či pơplih phrâo đang hmua akŏ pơjing anih hơdip, tơlơi bơwih ƀong kơ mơnuih ƀôn sang. Mrô prăk anai pơtrut đĭ boh tŭ yua hăng rim blah đang ngă gru”.

Ră anai, tơring čar Quảng Nam hơmâo 170 kual plơi pla phrâo ngă gru hăng rơbêh 250 hơbô̆ bruă đang hmua ngă gru. Ƀơi rim blah đang, mơnuih ngă hmua mă yua măi mok boh thâo phrâo kah hăng dưm truă măi pruih mă hơjăn, ƀudah mă yua djuai phun pla phrâo kiăng mơboh lu. Rim blah đang anai hơmâo pơhrui glăi mơ̆ng 150 truh 200 klăk prăk/thun. Ơi Hồ Quang Bửu, Kơ-iăng khua Jơnum min mơnuih ƀôn sang tơring čar Quảng Nam brơi thâo: Bruă akŏ pơdong kual plơi pla ngă gru, akŏ pơdong đang ngă gru blung a tŭ yua laih, ngă atur anăp nao akŏ pơjing bruă ngă hmua hơdjă, ngă hmua mă yua kmơk pơkra mă, ƀơ ƀrư̆ akŏ pơjing anih anom hiam hơđong kơjăp.