Ƀu kơnong djru plơi pla giăm guai dêh čar pơblih hiam klă đôč ôh, hơdôm ring bruă anun dŏ djru tơlơi gum pơgôp ling tơhan hăng ană plơi pla jai hrơi ƀuh tŭ yua, bruă wai lăng, pơgang jơlan guai dêh čar ăt klă hloh mơ̆n.

Hơdôm hrơi rơnuč thun, mơnuih ƀôn sang plơi Chiềng hăng plơi Đừng Nhạp, să Ia Lôp giăm guai dêh čar, či tơring glông Ea Sup, tơring čar Dak Lak hok mơak yơh sit truh 6 mông tlam či mơmŏt, ring bruă hrĕ apui lơtrik phrâo, yua tơhan pơgang guai dêh čar dưm truă brơi, ngă bơngač bang amăng plơi pla. Ơi Lang Văn Tuyển, Khua git gai ping gah plơi Chiềng brơi thâo, tơlơi bơngač apui lơtrik jơlan glông ngă hlai abih tơlơi kơnam mơmŏt, hlâo adih sang anŏ hlơi sit glăi mơ̆ng bruă hmua kret dŏ amăng sang đôč.

Mơ̆ng hơmâo apui lơtrik, jơlan glông plơi pla, mơmŏt mlam bơngač, ană plơi rô nao rai, čuă ngui, pơtum ră ruai, pơčrông sai bruă mă kơdok kơdor mơak, tơlơi khăp amăng plơi pla jĕ giăm hloh, rô nao rai mơak rơnuk rơnua hloh:

“Hơmâo tơlơi bơngač ƀơi djop gong apui lơtrik hrŏ ƀiă mơ̆n tơlơi truh rơdêh pơjrom, jơlan anai pơkra sui laih, yua kơ anun răm lu anih, ră anai hơmâo apui bơngač pơčrang amăng plơi, rô nao rai amuñ hloh. Dua dơ̆ng lĕ, tơlơi rơnuk rơnua ăt dưi pơhlôm hơđong mơ̆n. Ring bruă anai tŭ yua biă mă hăng mơnuih ƀôn sang amăng plơi pla djơ̆ anŏ dŏ čang rơmang mơ̆ng hlâo laih”.

Thiếu tá Vũ Văn Dương, khua bruă kơđi čar, Kơ-iăng Khua puih tơhan Ea Hleo brơi thâo, ring bruă “Tŭi bơngač kual giăm guai” ƀơi plơi pla Chiềng hăng plơi Đừng Nhạp lĕ ring bruă tal 4 yua Puih kơđông tơhan pơgang guai dêh čar ƀơi Ea Hleo pô pơphun brơi ƀơi să Ia Lôp. Rĭm kơ ring bruă hơmâo gong apui lơtrik hăng pul apui bơngač 200W, mă yua anŏ pơkĕ hăng pil pơđiă yang hrơi, dưm truă sit mơmŏt mlam gơ̆ bơngač mă hơjăn yơh.

Ră anai, puih kơđông hlăk iâu pơthưr ƀing ngă bruă sĭ mơdrô, mơnuih čơmah djru pran jua hrom, pơgôp prăk kăk pok pơhai lu ring bruă kiăng pơkĕ apui lơtrik brơi kơ plơi pla kual guai dêh čar, djru hrom pơtrut pơđĭ kyar bơwih ƀong huă mơnuih mơnam, pơgang rơnuk rơnua hơđong ană plơi pla:

“Thun blan pơ anăp adih, puih kơđông ăt ngă tui tơlơi git gai mơ̆ng khua ping gah, khua git gai tơhan pơgang guai dêh čar tơring čar, amra ngă hrom djop sang bruă, mơnuih tơpuôl, tơring glông, plơi pla iâu pơthưr lu sang bruă, mơnuih pơdrong čơmah djru hrom lu hloh klă hloh, dăng hrĕ apui lơtrik kơ kual giăm guai dêh čar. Yua dah jơlan nao rai lu črăn răm laih, hơmâo apui bơngač plai ƀiă hơmâo tơlơi truh, dưi pơhlôm rơnuk rơnua, djru pơgang hơđong amăng plơi pla mơnuih ƀôn sang, gơmơi amra ngă hrom man pơdong ring bruă  dăng hrĕ apui lơtrik bơngač kual guai dêh čar”.

Ngă hrom hăng tơhan pơgang guai dêh čar či Dak Lak, amăng bruă pok pơhai lu ring bruă tŭi bơngač kual guai dêh čar, thun blan rơgao hơmâo lu sang bruă, mơnuih ƀôn sang hăng ƀing djru tơlơi khăp pap ngă hrom ngă. Amai Bùi Thị Nữ pô pơ ala kơ khul djru tơlơi khăp pap anăn NDG, mơ̆ng ƀôn prong Hồ Chí Minh nao tơl să Ia Lôp ƀliah pơ guai dêh čar adih, ñu lăi, ƀuh tơlơi tơnap tap mơ̆ng mơnuih ƀôn sang hăng tơlơi gleh glar mơ̆ng tơhan pơgang guai dêh čar, ƀing tơhan akă grat mơtah, khul gơñu hlăk ngă hăng hơmâo ngă laih hur har biă mă jak iâu djru pơdong lu ring bruă tu yua hiam klă:

“Kâo ƀuh ƀing tơhan pơgang guai dêh čar hiam biă mă hăng gum hrom mơnuih ƀôn sang. Mơnuih ƀôn sang dŏ ƀơi kual guai dêh čar lu tơlơi tơnap tap, mơnuih ƀôn sang dŏ ƀơi kual ataih ƀu tơphă hrup hăng ta dŏ pơ ƀôn prong ôh anun yơh ruah anih guai dêh čar pioh djru ba mơnuih ƀôn sang hơmâo ƀiă thơ plai ƀiă tơnap tap. Khul hơmâo ruah puih tơhan pơgang guai dêh čar djru hrom yua gơñu lĕ dŏ jĕ giăm mơnuih ƀôn sang djru ba tong ten hloh. Rơngiao kơ hơdră tŭi bơngač amra hơmâo lu hơdră pơkŏn khul gơmơi amra dăp hrơi mông pioh hyu ĕp lăng djru dơ̆ng”.

Rơgao 3 thun pok pơhai hơdră tŭi bơngač kual giăm guai truh ră anai, tơhan pơgang guai dêh čar tơring čar Dak Lak hơmâo ngă giong 10 ring bruă apui lơtrik kơ djop plơi pla ƀơi 4 boh să kual guai dêh čar tơring glông Ea Sup hăng Ƀuôn Đôn, hăng rơnoh prăk hơdôm rơtuh klăk prăk. Đại tá Đỗ Quang Thấm, Kơ-iăng khua kơđi čar, ping gah anom bruă tơhan pơgang guai dêh čar tơring čar Dak Lak lăi, hơdră anai hlăk bang hyu kơtang biă mă, hrom hăng lu ring bruă tơhan akă grat mơtah pơphun, hơmâo lu mơnuih ƀôn sang djru hrom laih anun djop plơi pla dăng hrĕ apui lơtrik truh pơ plơi pla.

Hơdôm ring bruă anun, djru hrom ngă pơblih ƀô̆ mơta kual plơi pla, man pơdong plơi pla phrâo ƀơi kual guai dêh čar. Mơ̆ng anun, djru kơ bruă wai lăng, pơgang tơlơi dưi ngă pô lŏn ia, rơnuk rơnua dêh čar klă hloh:

“Ngă tui hơdră man pơdong plơi pla phrâo, ƀing gơmơi ngă hrom lu plơi pla pok pơhai hơdră tŭi bơngač kual giăm guai. Ră anai, ƀing gơmơi ăt pok pơhai hơdôm hơbô̆ bruă ƀơi hơdôm să guai dêh čar, djru hrom ngă klă bruă pơtrun man pơdong plơi pla phrâo. Kơnang kơ anun, ngă klă bruă pơtô lăi, jak iâu ană plơi ngă tui djơ̆ jơlan hơdră ping gah, tơlơi phiăn kơnuk kơna, biă mă ñu pơđĭ tui tơlơi glăm mơ̆ng mơnuih ƀôn sang amăng bruă man pơdong, wai lăng, pơgang ngă pô dêh čar, tơlơi rơnuk rơnua hơđong ƀơi guai dêh čar”.

Hơdôm ring bruă tŭi bơngač kual giăm guai dêh čar ƀing tơhan pơgang guai dêh čar hlăk ba glăi lu tơlơi mơak kă kơ neh met wa ană plơi pla dŏ ƀơi kual guai dêh čar tơring čar Dak Lak. Ƀu kơnong djru plơi pla pơblih phrâo đôč ôh, hơdôm ring bruă anun dŏ djru tơlơi gum pơgôp djuai ania laih anun mơnuih ƀôn sang hăng ling tơhan jai hrơi jĕ giăm hloh, wai lăng, pơgang guai dêh čar tŭ yua hloh.