Amăng bơyan mơyan angin wơ̆t tơthưt mơ-ak, hmua pơdai ia 132 ƀơi să Čư̆ Êlang, tơring glông Ea Kar phuang ƀâo phu pơdai glăk tơkui. Rơkơi bơnai ơi Y Teng Ksor, ƀuôn Ea Knôp, să Čư̆ Ni gir nao čuă hmua, lăng pơdai kiăng mơboh hiam. Ñu lăi, hmua giăm 4.000m2 anai hơmâo kơnuk kơna brơi kơ sang anŏ ñu mơ̆ng thun 2004 laih. Bruă brơi lŏn tui hăng Tơlơi pơsit 132 thun 2002 mơ̆ng Khua dêh čar kơ djru lŏn ngă hmua kơ neh met wa djuai ƀiă hơđăp ƀơi Dap Kơdư. Lơ̆m hơmâo brơi lŏn, 5 čô amăng sang anŏ ñu huăi hŭi rơmon dong tah amăng bơyan glăk rah pơtem pơdai, tap năng ăt hơmâo pơhrui glăi hơdôm pluh klăk ƀơ̆i prăk sĭ pơdai rim thun. Ơi Y Teng hok mơ-ak brơi thâo:

“Kâo anŏ kâo hơmâo 5 čô, hơmâo brơi giăm 4 sao pơdai. Rơngiao kơ anun, ăt hơmâo Kơnuk kơna djru brơi prăk čong jơnah jah glai hăng prăk thim rim sao 6 kg pơjeh pơdai T25. Rim thun pơhrui rim sao hơmâo rơbêh 6 tă pơdai, ha thun lĕ rơbêh 2 tơn. Hơmâo pơdai ia baih huăi bơngơ̆t ƀu hơmâo asơi huă amăng bơyan glăk tơjŭ tui hăng mơ̆ng thun hlâo dong tah”.

Kar kăi hnun mơn, sang anŏ ơi Y Khiêng, dŏ ƀơi ƀuôn M’Briu, să Čư̆ Huê ăt hơmâo Kơnuk kơna djru brơi 3.700 m2 lŏn ngă pơdai ia 132 Čư̆ Êlang. Ơi Y Khiêng brơi thâo, bruă hơmâo hmua ngă pơdai djru ba sang anŏ ñu hơmâo braih huă hơđong amăng lu thun rơgao, hơmâo thim drăng, pơdai či rông rơmô, un, mơnŭ bip, pơđĭ tui prăk pơhrui:

“Ƀing gơmơi hơmâo brơi lŏn amăng hmua Čư̆ Êlang, prong giăm 4 sao. Jum dar hmua hơmâo hơnoh ia rô truh pơ hmua mơtăm, laih anun hơmâo jơlan nao rai mơ-ak. Gơmơi rah pơdai 1 thun 2 wơ̆t, rim thun hơmâo giăm 2,5 tơn pơdai. Pơdai anai ƀong abih năng ai 7-8 tạ đôč amăng thun, dŏ glăi gơmơi uă hĭ pioh rông un ania tuh ană hăng rơbêh ha pluh drơi un ngă añăm mơnŏng laih anun pioh čem mơnŭ. Prăk mơ̆ng mơnŭ, mơ̆ng un hơmâo năng ai 50-60 klăk lơ̆m ha thun. Yua hnun mơn, sang anŏ tơklaih mơ̆ng rin rơpa, hơmâo prăk pioh ngă jơlan plơi pla phrâo”.

Nhữ Đinh Tuyến - Khua Jơnum min mơnuih ƀôn sang să Čư̆ Ni, tơring glông Ea Kar lăi pơthâo, să hơmâo 544 boh sang anŏ djuai ania ƀiă hơđăp ƀơi 3 boh plơi anun lĕ Ea Knôp, Ea Păl hăng Ega. Mơ̆ng sem lăng ƀơi 3 boh plơi anai, hơmâo 201 boh sang anŏ kơƀah lŏn ngă hmua, hơmâo anăn kiăng brơi lŏn tui Tơlơi pơsit mrô 132/2002 mơ̆ng Khua dêh čar. Đơ đam lŏn pơpha brơi hơmâo 68 ha, rim boh sang hơmâo mă mơ̆ng 3.500 -4.500 m2 hmua pơdai 2 bơyan. Ơi Tuyến pơtŏng glăi, pơdai ia ƀơi anai mơboh, rim ha juăt hơmâo mơ̆ng 5 truh 6 tơn/sa bơyan. Hơmâo tui anai lĕ yua neh met wa thâo ngă hmua; hơmâo hơnoh rô truh pơ hmua, hơmâo ia amăng bơyan phang wơ̆t hăng bơyan hơjan. Ơi Tuyến brơi thâo dong, să glăk prăp rơmet akŏ pơdong grup ngă hrŏm, pơtô brơi neh met wa ngă hmua hăng pơđĭ kyar pơdai tŭ yua hloh amăng bơyan pơ anăp anai.

“Pơđĭ tui boh than amăng bruă ngă hmua pơdai ƀơi Čư̆ Êlang kơ neh met wa, să glăk pơtô pơblang, iâu pơthưr neh met wa akŏ pơdong grup ngă ƀong hrŏm pơtruh nao rai. Hrŏm hăng ngă pơdai pioh huă, amra pơplih ha bơnah hmua pioh ngă pơdjuai pơjeh pơdai pioh sĭ, kiăng neh met wa hơmâo prăk lu hloh”.

Yap abih bang tơring glông Ea Kar hơmâo laih 448 boh sang anŏ amăng 7 boh plơi anun lĕ: M’Oa, M’Briu, Tơng Kroa, Duôn Tai să Čư̆ Huê; hăng hơdôm boh plơi Ea Knốp, Ea Păl hăng Ega mơ̆ng să Čư̆ Ni hơmâo brơi lŏn ngă hmua, prong 250ha. Tui hăng ơi Nguyễn Đăng Kai, Kơ-iăng khua wai lăng Djuai ania tơring glông Ea Kar, blung a kơčăo bruă ƀu hơmâo tui hăng tơlơi kiăng ôh yua dah kơƀah ia, jơlan nao pơ hmua tơnap mơn, lŏn phrâo ngă anun jing pơdai ƀu hiam ôh. Kiăng pơsir brơi hơdôm tơlơi anai, Jơnum min mơnuih ƀôn sang tơring čar Dak Lăk hăng tơring glông Ea Kar tuh pơ alin thim giăm 17 klai prăk pơkra bơnư̆, amăng bưng pơđoh ia pơtruh hăng dơnao ia Ea Rớt; čuk dor hmua kiăng tơphă, pơkra jơlan bê tông nao pơ hmua, djru ba pơjeh pơdai ngă 2 bơyan...Yua hnun mơn, hmua pơdai ia phrâo ƀơi Čư̆ Êlang hơmâo biă, laih anun hơđong na nao. Ơi Nguyễn Đăng Kai brơi thâo, hmua pơdai 132 ƀơi Čư̆ Êlang amra ƀu kơnong jing hmua pơdai klă đôč ôh mơ̆ ăt amra jing hmua pơdai hiam, gêh gal kơ bruă bơwih ƀong pơkra gơnam:

“Anom bruă Djuai ania pơphô bruă kơ Jơnum min mơnuih ƀôn sang tơring glông Ea Kar pơtô brơi, iâu pơthưr neh met wa pơčruh prăk ƀudah mă prăk pơpă thơ mơ̆ng tơring glông djru pla kyâo mơtah ƀơi hơdôm glông jơlan nao rai pơ hmua kiăng tơ-ui, ngă anih neh met wa pơdơi pơdă lơ̆m ngă hmua. Dua lĕ tơdah hơmâo prăk djru mơ̆ng abih bang mơnuih lĕ pơdong tông sang pơ hmua kiăng neh met wa pioh gơnam jăng jai amăng hrơi hơjan hlim, ia dăo lơ̆m aka ƀu hmao pơdŭ glăi pơ sang”.

Hăng tơlơi gum djru klă mơ̆ng anom apăn bruă, tơlơi gir ngă hmua mơ̆ng neh met wa djuai ƀiă, kual lŏn krô krañ hlâo adih jing hmua pơdai djru hơmâo asơi huă amăng bơyan glăk tơjŭ, ƀudah djru neh met wa tơklaih mơ̆ng rin rơpa. Mơ̆ng anun pơsit, Tơlơi pơsit 132 mơ̆ng Kơnuk kơna jing djơ̆ laih, djru ba hơdôm rơtuh boh sang anŏ djuai ƀiă ƀơi tơring glông Ea Kar, Dak Lăk hơmâo tơlơi hơdip trơi pơđao, plơi pla kual Dap Kơdư jai hrơi pơdrong sah.