Sang anŏ ơi Hà Văn Tân, dŏ ƀơi thôn 11, să Ya Tờ Mốt jing sa amăng hơdôm boh sang anŏ ngă pơdai Briêt hơmâo hră pơsit pơdai hơdjă blung a mơ̆ng tơring glông Ea Súp. Ơi Tân lăi: ngă pơdai hơdjă, huăi yua ia jrao tơnap hloh kơ pơdai ta juăt ngă, kmơk pruai, jrao arah khŏm hơmâo pơkra hơdjă hăng sinh học. Tui anun tơlơi suaih pral hơmâo pơhlôm klă mơn yua dah huăi djơ̆ ia jrao hóa chất. Prăk ngă hmua hrŏ ƀiă mơn truh kơ 40%, samơ̆ ba sĭ hơđong, hơmâo nua đĭ 1,5 wơ̆t pơhmu hăng pơdai juăt ngă:“Mơ̆ng bruă ngă hrŏm hăng anom ngă ƀong hrŏm hrŏ trun ƀun rin Ea Súp ngă gêh gal brơi sang anŏ gơmơi ngă pơdai hơdjă Briêt, blung a lĕ pơgang ayuh hyiăng, tal dua lĕ pơhlôm tơlơi suaih pral laih anun tal klâo hơmâo prăk kơ sang anŏ. Truh mông anai, sang anŏ gơmơi hơmâo ngă mơ̆ng anet truh kơ prong laih. pơ anăp anai, gơmơi iâu pơthưr hơdôm boh sang anŏ ngă djuai pơdai anai lu hloh”.

Briêt jing djuai pơdai braih jơman mơ̆ng kual Dap Kơdư, hơmâo lăng jing braih ñiar Briêt. Djuai braih anai ñu jơman, ƀong klă kơ pran jua, hơmâo lu săt, xơ, vitamin hăng djŏp mơnŏng pơgăn oxy hoá anun jing hơmâo lu mơnuih amuaih blơi. Ơi Nguyễn Việt Đức, Khua anom ngă ƀong hrŏm Hrŏ trun ƀun rin Ea Súp, tơring glông Ea Súp, tơring čar Dak Lăk brơi thâo: Kơđiăng lui mơ̆ng lu bơyan hlâo, Anom ngă ƀong hrŏm ngă hrŏm hăng mơnuih ƀôn sang, ruah mă kual lŏn hiam djơ̆ hăng djuai pơdai Briêt. Amăng anun, ia, lŏn, ayuh hyiăng hơdjă jing tơlơi yôm hloh. Thun hlâo, Anom ngă ƀong hrŏm hơmâo ngă dưi hơbô̆ bruă pơkra braih Briêt hơdjă tui hơnong pơkă JAS (Japan) 3 ha, hăng braih Briêt hơmâo hră pơsit OCOP 3 asar pơtŭ gưl tơring čar. Tui hăng ơi Nguyễn Việt Đức, Khua anom ngă ƀong hrŏm Hrŏ ƀun rin Ea Súp, hrơi blan pơ anăp, Anom bruă amra ngă hrŏm hăng mơnuih ƀôn sang pơđĭ tui hmua ngă pơdai hơdjă, amăng ƀrư̆ pơplih tơlơi pơmin, hơdră ngă hmua mơ̆ng mơnuih ƀôn sang, pơđĭ tui anŏ klă, nua braih, nua pơdai mơ̆ng tơring glông.

“Blung a lĕ gơmơi pơƀut kơ hơdôm mơta gơnam hơmâo anăn gơnam hơdjă, hơmâo anăn. Tal dua gơmơi pok thim hmua ngă pơdai tui Global GAP kiăng hơmâo lu mơnuih ngă hmua tŭ mă yua tơlơi gêh gal”.

Tui hăng ơi Nguyễn Bá Bân, Khua anom bruă hmua tơring glông Ea Súp, mah mrô hmua aka ƀu lu ôh, samơ̆ braih Briêt hơmâo brơi hră pơsit braih hơdjă, pơsit brơi tơlơi pơplih amăng bruă gă hmua kual Ea Súp, ƀu mă yua ia jrao, ngă hmua pơkra gơnam hơdjă. Laih dong brơi ƀuh, bruă pơplih ngă hmua hơdjă mơ̆ng tơring čar Dak Lăk jing jơlan nao djơ̆ lăp, ba glăi nua yôm pơplih tơlơi hơdip mơ̆ng neh met wa ƀơi guai dêh čar:“Bruă Anom ngă ƀong hrŏm Hrŏ trun ƀun rin Ea Súp hơmâo brơi hră pơkra gơnam hơdjă, mă yua djah djâo, jing tơlơi pơphun brơi bruă pơkra gơnam hơdjă. Amăng hrơi blan pơ anăp, amra hơmâo lu anom bruă, mơnuih ƀôn sang djru ba hơdôm anom ngă ƀong hrŏm, anom bơwih ƀong pơsit gơnam hơdjă jai hrơi lu hloh, ba glăi gơnam tam hơmâo hră pơsit anăn”.