Thun 1993, tơdơi kơ glăi mơ̆ng ngă tơhan, Y Tuyên Ƀuôn Krông (B.Krông) dŏ pơ Ƀuôn Drai H’Ling, să Hòa Xuân, plơi prong Ƀuôn Ma Thuôt, tơring čar Dak Lak hur har biă mă ngă hrŏm bruă mă kơ mơnuih mơnam amăng plơi pla, djru hrŏm khul mơnuih mơnam mut phung kah hăng tơdăm dra mut phung, Khul tơhan hơđăp ƀơi plơi pla. Truh thun 2015, arăng ruah ñu ngă Kơ-iăng Khua ping gah plơi, Khua Ƀuôn Drai H’Ling.

Amăng 30 thun ngă bruă mơnuih mơnam, ơi Y Tuyên B.Krông yơh jing mơnuih pơtruh nao rai ba jơlan hơdră, tơlơi pơtrun mơ̆ng ping gah, tơlơi phiăn kơnuk kơna truh pơ mơnuih ƀôn sang djuai ania Êđê să Hòa Xuân lăi hrŏm hăng Ƀuôn Drai H’Ling hnun mơ̆n. Mah mă bruă hơgĕt, ñu ƀu kơdun ôh hăng tơlơi tơnap tap, nao tơl sang phyiang tơl adring, pơpoh bah amăng sang hyu pơtô lăi, jak iâu mơnuih ƀôn sang ngă djơ̆ tơlơi jơlan hơdră ping gah, tơlơi phiăn kơnuk kơna pơtrun. Ơi Y Tuyên B.Krông lăi:

“Ƀơi ƀuôn Drai H’Ling mrô mơnuih lêng kơ djuai ania Êđê soh, truh 93%, tơlơi hrăm hră ƀu bơkơnar ôh. Hăng tơlơi gir run abih pran jua, kâo pơtrut pơsur ană plơi pla amăng plơi ngă tui djơ̆ jơlan hơdră hăng tơlơi pơtrun mơ̆ng ping gah hăng kơnuk kơna ta. Thun blan rơgao, mơnuih ƀôn sang ăt ngă tui djơ̆, djop tơlơi pơtrun anun pơkă hăng hlâo adih, ră anai ƀuh mơak yơh”.

Ơi Y Tuyên B.Krông brơi thâo, hlâo adih mơnuih ƀôn sang amăng plơi, dŏ djă pioh tơlơi phiăn hơđăp ƀu găl, kah hăng pơdŏ rơkơi bơnai, djai brŭ pơphun rơngiă lu hrơi, huač prăk kăk, kông ngăn; bơ tơlơi pơdŏ rơkơi bơnai pŭ pơnŭ, mă lu gơnam tam prăk kăk kah pơdong rơkơi bơnai....Ñu yơh nao yơh nao tơl rim sang anŏ ră ruai, pơtô lăi, kiăng mơnuih ƀôn sang thâo hluh hăng pơđing hmư̆ tơlơi rơkâo mơ̆ng mơnuih ƀôn sang, tơlơi kiăng gơñu mơ̆ng anun pơtô kiăng gơñu thâo hluh lu hloh, lui hĭ tơlơi phiăn ƀu klă hơđăp, tơbiă đuăi mơ̆ng tơlơi hơdip mơda ană plơi pla. Hrŏm hăng anun, ơi Y Tuyên Ƀuôn Krông hur har djru pơtô lăi djru ană plơi pla pơblih tơlơi pơmin, hơdră ngă hmua pla pơjing, khin čan prăk tuh pơ alin pơđĭ kyar bơwih ƀong huă. Yă H’I Ƀuôn Yă juăt iâu amĭ Bảo mơnuih ƀôn sang amăng plơi lăi, mơnuih ƀôn sang pơpŭ hăng ngă tui djop tơlơi pơtô mơ̆ng ơi Y Tuyên Ƀuôn Krông yua kơ ñu hơmâo pran jua hur har, tong ten jĕ giăm ană plơi biă mă.

“Âm Ha ngă khua plơi ƀing gơmơi sui laih. Sit hơmâo jơlan hơdră, tơlơi pơtrun mơ̆ng Ping gah pơtrun, tơlơi phiăn kơnuk kơna pơtô ñu lăi pơthâo kơ abih bang ană plơi pla, pơtô pơblang glăi kiăng thâo hluh rơđah tong ten; sit hơmâo tơlơi pơblih arăng pơpha pơjeh phun  pla ñu lăi pơthâo mơnuih ƀôn sang tơña bla hrăm tui hơdră pla pơjeh phun pla phrâo. Mơnuih ƀôn sang khăp pơpŭ biă mă kơ khua plơi”.

Ơi Y Niwa Ƀuôn Yă (Ƀyă), Kơ-iăng khua jơnum min mơnuih ƀôn sang să Hòa Xuân, plơi prong Ƀuôn Ma Thuôt, tơring čar Dak Lak brơi thâo, ơi Y Tuyên B.Krông lĕ sa čô mơnuih ping gah ba jơlan hlâo djop bruă mă. Hăng tơlơi glăm ba ngă Kơ-iăng khua ping gah plơi, ngă rah khua plơi Ƀuôn Drai H’Ling, Y Tuyên B.Krông ngă bruă nao hlâo soh djop tơlơi pơtrun. Mơ̆ng thun 2016 truh ră anai, ñu hrŏm hăng mơnuih ping gah amăng plơi laih anun mơnuih ƀôn sang pơčruh truh 200 klăk prăk hăng hơdôm rơbâo hrơi bruă pioh tuh ƀêtông pơkra jơlan plơi rơbêh 2 km. Truh ră anai, 85% mrô sang anŏ amăng plơi ngă djơ̆ tơhnal pơkă plơi pla rơguăt, tơlơi pơhing tơkeng ană tal 3 hrŏ laih, tơlơi hơdip mơda, mơak pran jua ană plơi jai hrơi pơđĭ tui. Ơi Niwa Byă, Kơ-iăng Khua Jơnum min mơnuih ƀôn sang să Hòa Xuân lăi nao kơ Y Tuyên Ƀ.Krông ngă bruă hơmâo lu tơlơi thâo pơčeh phrâo hiam, hor hơduah ĕp kiăng thâo, pơblih hơdră mă bruă kiăng ngă tui djơ̆ tơlơi pơčrâo ba, hră pơtrun mơ̆ng ping gah mut tơma amăng bruă mă, tơlơi hơdip mơda rim hrơi.

"Ơi Y Tuyên Ƀ.Krông hăng tơlơi thâo thăi rom găn rơgao amăng bruă mă 15 thun laih ngă khua plơi, kơ-iăng khua ping gah plơi Ƀuôn Drai H’Ling laih anun ñu mơ̆n mơnuih ƀôn sang đăo kơnang ruah na nao amăng 10 thun hăng anai. Hăng pô ngă khua plơi, ngă rah kơ-iăng khua ping gah, ñu ƀu pơdơi ôh ba gru hlâo mă bruă, hur har pơtrut man pơdong plơi pla phrâo, laih dơ̆ng pơtô lăi mơnuih ƀôn sang, jak iâu gum hrŏm pơyơr lŏn đang, sang dŏ djơ̆ jơlan čuk pơkra jơlan brơi rơhaih rơhong rô nao rai klă hiam, ñu yơh pô pơtruh nao rai yôm plah wah gong gai kơnuk kơna hăng mơnuih ƀôn sang”.

Ơi Y Tuyên Ƀ.Krông lĕ sa čô mơnuih ping gah arăng đăo kơnang biă mă, thâo mă bruă laih anun abih pran jua hăng bruă mă. Tơlơi gir run mơ̆ng mơ̆ng ñu hơmâo djru hrŏm akŏ pơdong khul gum hơbit djuai ania, ngă tui lu bruă pơtrun pơplông khăp kơ lŏn ia, pơtrut bơwih ƀong huă pơđĭ kyar plơi pla Ƀuôn Drai H'Ling. Hăng tơlơi gir run mơ̆ng ñu, ơi Y Tuyên Ƀ.Krông lĕ mơnuih ping gah ngă giong bruă jao tŭ yua lu, mơnuih arăng đăo kơnang ba gru hiam amăng plơi pla mơnuih djuai ƀiă.