Yă Ka Hăng lĕ sa amăng hơdôm čô mơnuih ƀôn sang ngă hmua plơi Dă Rahoa, să Hiệp An, tơring glông Đưk Trŏng, Lâm Đồng hơmâo pĕ pơhrui glăi lu hloh kơ thun hlâo, yua thâo ba yua boh thâo ia rơgơi amăng bruă pla añăm, pla bơnga. Yă Ka Hăng brơi thâo, anih anom sĭ añăm pơtam hăng bơnga ñu thun 2023 ƀu kơtang kah hăng tơđar ôh, samơ̆ kơphê lĕ hơmâo rơnoh. Pơ alin hrŏm anun, yua kơ boh jor ƀiă hăng hiam klă, anun yơh 3 ar đang añăm, đang bơnga hăng kơphê sang anŏ ñu ăt hơmâo pơhrui glăi truh mơkrah klai prăk. Yă Ka Hăng brơi thâo:

“Thun anai, mah tơlơi bơwih ƀong huă ƀuh hrŏm dŏ lu tơlơi tơnap tap đôč, tơlơi hơdip mơda mơnuih ƀôn sang pơ anai dưi djă hnong pơhrui glăi hơđong hloh kơ hơdôm thun hlâo. Yua mơnuih ƀôn sang gir run hơduah ĕp hrăm tui, ba yua boh thâo ia rơgơi amăng bruă pla añăm pơtam, pla bơnga sĭ mơdrô tui hră rơkâo blơi hlâo kiăng hơđong nua hăng prăk pơhrui glăi. Ră anai, djop sang anŏ tuh pơ alin man pơdong hiam soh sang dŏ, jơlan rô nao rai amăng plơi pla lêng kơ tuh hăng ƀêtông, tuh kơsu dơnar, tơlơi hơdip mơda mơnuih ƀôn sang pơblih tui hăng pơđĭ kyar lu biă mă pơkă hăng hlâo adih”.

Hiệp An hơmâo 2.460 boh sang anŏ, amăng anun sang anŏ mơnuih djuai ƀiă lĕ 37%. Đơ đam să hơmâo giăm 2.500 ha lŏn ngă hmua, lu kơ ngă bruă tui hơdră phrâo, ba yua măi mok ia rơgơi anun yơh rơnoh pơhrui glăi amăng sa blah đang hmua đơ anun đôč pơhrui truh kơ 420 klăk prăk sa ha, sa thun. Ră anai, hơmâo 750 boh sang anŏ ngă hrŏm khul pơlir hơbit ngă hmua hăng ĕp anih sĭ mơdrô boh troh đang hmua. Pơđĭ tui rơnoh pơhrui glăi rim čô mơnuih mă bruă sa thun giăm 70 klăk prăk. Truh ră anai, mrô sang anŏ ƀun rin pơkă lăng lu mơta anŏ hơmâo kơnong dŏ 19 boh sang anŏ, jing dưm dưm hăng 0,58%.

Tui hăng ơi tha K'Lèn, dŏ pơ ƀôn K’Long lăi, hlâo adih mă bruă sư̆ rơbư̆ aka ƀu thâo ĕp jơlan hơdră ôh, ngă hmua kơnong tơjŭ pơdai sa bơyan sa thun, mơnuih ƀôn sang pơ anai khin ba yua boh thâo ia rơgơi amăng bruă ngă hmua pla pơjing, ră anai pơblih nao rai pơjeh phun pla tui hăng bơyan gêh găl, pla añăm pơtam, pla bơnga sĭ hăng rơnoh yôm ƀiă. Yua kơ anun, djop sang anŏ tơlơi hơdip mơda mơnuih ƀôn sang dưi pơblih pơđĭ tui pơkă hăng hlâo. Djop sang anŏ hur har mă bruă bơwih ƀong huă, ƀu hơmâo tơlơi pơmin ĭn glăi, tơguan kơnang tơlơi djru mơ̆ng kơnuk kơna hrup hlâo ôh. Tơlơi bơwih ƀong huă pơđĭ kyar, tơlơi thâo hluh, pơmin kơ bruă mă glăm ba hăng sang anŏ, plơi pla jai hrơi ƀuh tŭ yua hloh. Bruă ngă gum hrŏm man pơdong plơi pla phrâo hlăk ngă hăng pơring rai anŏ bơngač bang hyu prong amăng djop gưl mơnuih ƀôn sang. Tha plơi K'Lèn hok mơak ră ruai:

“Dơ̆ng mơ̆ng hơmâo ba yua boh thâo ia rơgơi amăng bruă ngă hmua pla pơjing, tơlơi bơwih ƀong huă mơ̆ng mơnuih ƀôn sang hơmâo pơđĭ kyar hloh hăng hlâo lu biă mă. Tơlơi hơdip mơda pơblih phrâo hăng đĭ tui, tơlơi thâo hluh mơ̆ng mơnuih ƀôn sang laih anun bruă mă glăm ba gum tơngan hrŏm hăng gong gai kơnuk kơna man pơdong plơi pla phrâo, pơdrong sah, dưi hơmâo mơnuih ƀôn sang ngă tui hur har. Djop pô hơduah ĕp kiăng thâo ba yua ia rơgơi amăng bruă ngă hmua, bơwih ƀong huă, truh pơdrong ƀiă laih kiăng pơdrong sah hloh”.

Ơi Nguyễn Văn Khanh, Kơ-iăng Khua git gai ping gah să Hiệp An brơi thâo, boh tơhnal anai lĕ sa bruă mă pơblih phrâo tơlơi thâo hluh, tơlơi pơmin amăng bruă mă mơnuih ƀôn sang djuai ƀiă lăi pha, mơnuih amăng să hnun mơ̆n. Yua kơ thâo hruaih ba yua ia rơgơi phrâo ngă hmua, đing nao pla phun pla pơjeh boh troh tui tơlơi pơkă hlâo ngă hră sĭ mơdrô hơđong, anun yơh lơ̆m bong glăi hăng tơlơi tơnap tap abih bang, tơlơi bơwih ƀong huă trun hăng prăk trun nua, rơnoh pơhrui mơ̆ng mơnuih ƀôn sang ƀơi Hiệp An ăt hơđong đôč. Yua kơ anun, hơdôm tơhnal pơkă yôm ngă tui bruă mă pơđĭ kyar bơwih ƀong huă mơnuih mơnam, tơhnal pơkă man pơdong plơi pla phrâo amăng să ăt ngă djơ̆ rơnoh pơkă mơ̆ng hlâo.

“Man pơdong plơi pla phrâo dưi pơđĭ tui rơnoh pơkă phrâo hloh să hơmâo pok pơhai ngă tui hăng hơmâo tơlơi tŭ ư mơ̆ng mơnuih ƀôn sang mơ̆n. Mơnuih ƀôn sang thâo hluh tơlơi anai, gir run mă bruă pơtrut tui bơwih ƀong huă mơnuih mơnam, gru grua mơak pran jua ăt đĭ tui mơ̆n. Mah thun anai, tơlơi bơwih ƀong huă tơnap tap samơ̆ abih bang sang anŏ mơnuih ƀôn sang ăt hơđong, jơlan glông nao rai, bruă man pơdong mơ̆ng kơnuk kơna dưi ƀuh pơđĭ kyar kơtang. Djop tơhnal mơ̆ să pơdah thâo ngă tui truh ră anai hơmâo ngă tŭ yua laih. Amăng thun 2023 să amra giong tơhnal pơkă plơi pla phrâo hiam hloh”.

Hrŏm hăng anŏ gêh găl pơđĭ kyar ngă hmua tui ia rơgơi phrâo, să Hiệp An dŏ hơmâo lu tơlơi gêh găl prong čơkă tuai hyu ngui hăng sĭ mơdrô klă yua dŏ ƀơi anih jơlan čơlah, tơkuh nao rai lu jơlan rai mơ̆ng Dơnung nao pơ plơi prong Đà Lạt, Lâm Đồng laih anun nao pơ lu anih anom, hyu ĕp lăng čuă ngui pơprong hlăk man pơdong đĭ. Anai lĕ hơdôm tơlơi gêh găl pioh kơ să Hiệp An ăt pơtrut pơblih phrâo, ƀu pơdơi ôh hrưn đĭ rim hrơi kiăng anăp nao trơi pơđao yâo mơak pơdrong sah.