VOV4.Jarai - Ƀơi tơring čar Dak Lăk hơdôm hrơi rơnuč thun anai, hơdôm anom bruă, plơi pla glăk ječ ameč pơkra giong hĭ hơdôm rơtuh boh sang djru ba hơdôm boh sang anŏ rin hơđong tơlơi hơdip. Amăng hrơi mông tơnap tap yua klin ngă, hơdôm boh sang dŏ mơnuih ƀon sang gum pơgôp jing ngă pơđao laih kơ hơdôm boh sang anŏ rin amăng hrơi adai rơ-ot.

Amăng sang dŏ phrâo ăt dŏ ƀâo ia kulơr mơn, ană đah rơkơi anet amai H’Nuyn Êban, dŏ ƀơi ƀuôn Jung A, să Ea Ktur, tơring glông Čư̆ Kuin, đuăi nao đuăi rai amăng sang yua klao hok. Hmư̆ čơđai klao jing ba pơđuăi abih tơlơi rơ-ot rơngoh amăng bơyan anai. Amai H’Nuyn ol kơdol:

“Kâo mơ-ak biă yua mơng hrơi anai hơmâo sang phrâo laih. Hlâo adih sang anŏ gơmơi dŏ ƀơi sang dŏ tơ̆i phơ̆i, sang ƀu rup rap, bơ hơane huăi bơngơ̆t kơ adai pơ-iă ƀudah hơjan. Kâo bơni kơ abih bang anom bruă djru kâo pơkra brơi sang dŏ kơ gơmơi”.

Hơdôm anom bruă brơi sang dŏ kơ amai H’Nuyn Êban.

Ăt hơmâo Kông ti apui lơtrik Dak Lăk djru 60 klăk prăk man pơdong sang dŏ tal anai, amai H’Blinh Niê, dŏ ƀơi ƀuôn K’Niêt, să Ea Ktur, hok mơ-ak, 2 rơkơi bơnai, 4 čô ană ñu ră anai huăi bơngơ̆t dong tah amăng hrơi hơjan hlim.

“Rơkơi bơnai gơmơi tơnap biă mă, bơ ră anai hơmâo anom bruă apui lơtrik djru pơdong brơi sang dŏ phrâo jing mơ-ak mơ-ai biă yơh. Rơkơi bơnai gơmơi bơlăi nao rai kiăng gir bơwih ƀong dong”.

Sang dŏ phrâo mơng sang anŏ amai H’Blinh Niê.

Yă H’Kim Hoa Byă, Khua Jơnum min djŏp djuai ania mơnuih mơnam Việt Nam tơring čar Dak Lăk brơi thâo, tơdơi kơ hrơi blan dŏ pơčlah mơnuih mơnam yua klin Covid-19, hơdôm hrơi rơnuč thun, hơdôm anom bruă, plơi pla amăng tơring čar pơtrut tui bruă man pơdong hơdôm rơtuh boh sang dŏ djru ba sang anŏ rin hơđong tơlơi hơdip. Tui anun, rim boh sang hơmâo djru 50 - 60 klăk prăk, sang anŏ hăng hơdôm khul grup djru ba hrơi mă bruă, prăk kăk đah mơng pơkra sang prong hloh hiam hloh.

“Kơnong amăng thun anai lĕ Jơnum min djŏp djuai ania mơnuih mơnam tơring čar hơmâo djru ba prăk mơng prăk ƀing thâo čơmah, ƀing thâo pap mơnuih mơnam djru ba 9 klai prăk, jing pơpha brơi hơdôm boh tơring glông laih, truh mông anai hơmâo ngă 165 boh sang. Anun lĕ tui prăk kah pơpha hyu, bơ pơ anăp dong lĕ Jơnum min djŏp djuai ania amra djru mơng prăk pơkŏn dong, ăt kah hăng ƀing thâo pap mơn, anom bruă juăt ngă bruă hiam arăng hơmâo prăk kăk lĕ arăng djru ba mơn kơ ƀing sang anŏ rin”.

Minh Huệ: Čih - Siu H’Mai: Pơblang