VOV4.Jarai - Kơ-iăng khua dêh čar ơi Lê Minh Khái phrâo kĭ tơlơi pơsit mrô 1639/QĐ-TTg lơ 29/9/2021 kơ bruă pơhrua dong prăk blơi hăng tŭ mă 20 klăk liều vaccine pơgang klin Covid-19 Vero Cell mơng grup Sinopharm, Khač. Tơlơi pơsit lăi rơđah: pơhrua dong prăk kak brơi kơ Ding jum ia jrao kiăng kơ blơi hăng tŭ mă 20 klăk liều vaccine pơgang klin Covid-19 Vero Cell mơng Grup Sinopharm, Khač kar hăng tơlơi rơkâo mơng Ding jum prăk kak hăng Ding jum ia jrao. Ding jum prăk kak, Ding jum ia jrao gơgrong kơ boh tơhanal hăng tơlơi lăi pơthâo. Bruă wai lăng, mă yua, jao prăk kiăng kơ ngă tui tơlơi pơkă, djơ̆ hăng tơlơi kiăng, thâo pơkrem, tŭ yua, tong ten, tơpă sit. Ding jum ia jrao lăi pơthâo Khua dêh čar kơ bruă mă yua prăk kak anai djơ̆ hăng tơlơi pơkă.

Siu Đoan: Pơblang