VOV4.Jarai-Hrăm hăng hla tui gru hiam Wa Hồ, rơbêh 10 thun hăng anai, Jơnum min djop djuai ania mơnuih mơnam să Quảng Hiệp, tơring glông Čư̆ Mgar, tơring čar Dak Lak ngă tui bruă pơkrem prăk “Rông bui lŏn”. Bruă ngă anet samơ̆ tŭ yua sit nik, pơhưč lu mơnuih mơnam ngă hrom, pơkrem hơmâo hơdôm klai prăk, djru kơ mơnuih rin ƀun, mơnuih djuai ƀiă pơdong sang, pơđĭ kyar čem rông mơnong hrưn đĭ pơklaih mơ̆ng ư̆ rơpa ƀun rin.

Hrơi tŭ mă sang Gum pơgôp yua kơ Jơnum min djop djuai ania mơnuih mơnam să Quảng Hiệp djru, amai Nguyễn Thị Ngoan dŏ pơ plơi Hiệp Thịnh, să Quảng Hiệp, tơring glông Čư̆ Mgar, tơring čar Dak Lak ol kơdol pran jua mơak, yua dah dưi hơmâo sang dŏ anun kah hăng tơlơi bơrơpơi đôč, sang dŏ kjăp phik laih:

“Kâo rơwen rơwo mơ̆ng anet ră anai tơlơi bơwih ƀong huă tơnap. Yua kơ gong gai kơnuk kơna pơ anai djru ba, hơmâo ƀiă prăk kâo čan pơgôp hrom dưi pơdong sang anai. Ră anai, kâo gir mă bruă kiăng tla hnưh, hơmâo prăk rông ană bă nao hrăm hră. Sang anŏ gơmơi mơak biă mă, bơni kơ kơnuk kơna, ƀing mơnuih čơmah djru ba, laih anun sang bruă wai lăng djop djuai ania mơnuih mơnam gum kơ sang anŏ gơmơi”.

Sang anŏ amai Ngoan lĕ sa amăng hơdôm hơpluh boh sang anŏ dŏ pơ să Quảng Hiệp dưi djru man pơdong sang mơ̆ng rơnoh prăk pơkrem “ană bui lŏn” yua kơ Khul wai lăng djop djuai ania mơnuih mơnam să jak iâu. Ƀu kơnong djru sang dŏ đôč ôh, hơdôm drơi bui lŏn pơ să Quảng Hiệp dŏ djru kơ pơjeh phun pla, djuai hlô mơnong rông, ngă anŏ gêh găl pơtrut kơ sang anŏ ƀun rin hrưn đĭ pơđĭ kyar bơwih ƀong huă.

Tơlơi djru ba mơ̆ng Jơnum min djop djuai ania mơnuih mơnam să Quảng Hiệp djru hrom sang anŏ Lô Hoàng Thuận

hrưn đĭ pơklaih ƀun rin

Ơi Lô Hoàng Thuận, dŏ pơ plơi Hiệp Tiến lăi, thun 2018, ñu ruă drah nur ngă rơwen krơ̆n ha klah drơi jăn, sang anŏ gơñu tơnap tap biă mă. Hơmâo khul djop djuai ania mơnuih mơnam să blơi brơi kơ sang anŏ gơñu dua drơi bê tơnô ania pioh rông tuh ană. Truh ră anai, bê gơñu tuh ană hơmâo rơbêh hơpluh drơi laih. Tơlơi hơdip mơda sang anŏ plai ƀiă laih tơnap tap.

"Sang anŏ gơmơi hơmâo Jơnum min djop djuai ania mơnuih mơnam să Quảng Hiệp djru ba, brơi kơ sang anŏ dua drơi bê tơnô ania, gơmơi rông 2 thun ră anai tuh ană hơmâo truh 13 drơi, pioh kơ sang anŏ gơmơi gir run hloh ngă bruă bơwih ƀong huă, hrưn đĭ kiăng pơklaih mơ̆ng ư̆ rơpa ƀun rin”.

Să Quảng Hiệp ră anai hơmâo rơbêh 15 rơbâo čô mơnuih, hăng 13 djuai ania dŏ hrom, tơlơi hơdip mơda mơnuih ƀôn sang tơnap, boh nik ñu amăng plơi pla mơnuih djuai ƀiă. Mơ̆ng thun 2011, Jơnum min djop djuai ania mơnuih mơnam să Quảng Hiệp hơmâo jak iâu bruă mă rông bui lŏn, kiăng pơkrem prăk djru kơ mơnuih ƀôn sang čan, tuh pơ alin hrưn đĭ amăng bruă mă bơwih ƀong huă.

Ơi Hoàng Mạnh Quân, Khua Jơnum min djop djuai ania mơnuih mơnam să Quảng Hiệp, brơi thâo, truh ră anai, rơnoh prăk pơkrem dưm amăng bui lŏn hơmâo 2 klai, djru brơi kơ hơdôm hơpluh boh sang anŏ dưi pơklaih mơ̆ng tơlơi rư̆ rơpa ƀun rin.

“Amăng hơdôm thun rơgao, hơdră bruă anai hơmâo bang hyu lu anih, mơ̆ng ƀing tha rơma truh kơ ƀing mơnuih hlăk mơdrah biă mă ñu hơdôm thun giăm anai hơmâo lu ană amôn čơđai anet hai ăt ngă hrom rông bui lŏn. Amăng 11 thun rơgao, ƀing gơmơi hơmâo man pơdong brơi 27 boh sang kơ mơnuih ƀun rin, djru ming pơkra glăi sang kơ 12 boh sang anŏ, hmao kru djru ba kơ 60 boh sang anŏ, mơnuih hơmâo tơlơi truh, tơlơi dju djuăm duăm ruă mơ̆ng rơnoh prăk rông bui lŏn anai.

Mơ̆ng thun 2017, ƀing gơmơi pok pơhai hơdră bruă djru phun pla, pơjeh djuai hlô mơnong rông kơ sang anŏ ƀun rin, truh ră anai bê mơnuih ƀôn sang rông mơ̆ng prăk djru hơmâo 700 drơi laih”.

Rông bui lŏn, sa bruă mă mah anet đôč samơ̆ tŭ yua biă mă jing bruă ngă lar prong, pơhưč lu mơnuih ƀôn sang ngă hrom ƀơi să Quảng Hiệp, tơring glông Čư̆ Mgar, tơring čar Dak Lak ngă hrom hur har biă mă. Anai lĕ, hơdră ngă bruă djơ̆ lăp, gêh găl pioh akŏ pơdong tơlơi hơdip mơda phrâo amăng kual plơi pla.

                                                                                    Tuấn Anh pô čih-Nay Jek: Pơblang