VOV4.Jarai - Pơsit tong amăng mông jơnum hăng ƀing mă tơlơi pơhing phrâo rơwang tal 3 hăng lăi pơthâo akŏ bruă pơtrut bơwih ƀong sĭ mơdrô amăng hơdôm blan rơnuč thun 2021 hăng anăp nao thun 2022 pơphun amăng mơguah lơ 5/10 ƀơi Hà Nội, Kơ-iăng khua ding jum ngă hmua hăng pơđĭ kyar ƀon lan Phùng Đức Tiến brơi thâo, bruă rông hlô hăng akan hơdang lĕ 2 mơta bruă amra pơtruh gơnong bruă ngă hmua đĭ tui rơnoh pơhrui amăng thun anai. 9 blan laih rơgao gơnong bruă ngă tui tŏ tui hơđong kiăng kơ glăm ba bruă bowih ƀong huă, tŏ tui rơnoh pơđĭ kyar 2,74%, rơnoh pơhrui mơng sĭ mơdrô pơ tač rơngiao gơnam đang hmua, akan hơdang, kyâo pơtâo him lăng 35 klai 500 klăk đôlar Mi, đĭ 17,7%. Kiăng kơ pơhlôm sĭ gơnam ƀong huă amăng rơnuč thun anai, sit biă ñu amăng bơyan ƀong čơkă thun phrâo Nhâm dần 2022 hăng ba gơnam sĭ pơ tač rơngiao, gơnong bruă ngă hmua pơsit 4 mơta bruă kiăng ngă. Tui anun, đing nao git gai bơwih ƀong sĭ mơdrô brơi lăp djơ̆ hăng ayuh hyiăng, klin Covid-19 ƀơi rĭm tơring čar, ƀôn prong; pơsir hĭ hơdôm tơlơi ngă tơnap tap, pơtrut bruă sĭ mơdrô pơ tač rơngiao ngă gêh gal brơi bruă sĭ mơdrô amăng lŏn ia hăng pơtrut sĭ pơ gah rơngiao. Laih dong ngă klă dong amăng bruă pơgang ayuh hyăng pơplih sat.

Siu Đoan: Pơblang