VOV4.Jarai - Mơng pran khăp kơ wa Hô, ƀơi hơdôm plơi pla djuai ania Sêđăng, tơring čar Kontum, bruă hrăm hăng ngă tui tơlơi pơtô mơng wa Hô hơmâo mơnuih ƀon sang gơgrong ngă tui. Tha plơi A Bơ, Khua apăn bruă Pin ggah plơi Tua Tem, să Đăk Long, tơring glông Đăk Hà, tơring čar Kontum, lĕ sa amăng ƀing mơnuih hrăm hăng ngă tui tơlơi pơtô mơng wa Hô ƀơi kual mơnuih djuai ania ƀiă tơring čar Kontum.

Hơdôm hrơi rơnuč blan 8, klin Covid-19 ƀơi hơdôm tơring čar kual Dơnung glăk tơnap tap, ƀơi tơring čar Kontum hơmâo hơdôm pluh čô mơnuih glăi mơng kual hơmâo klin lĕ ƀă virus Sars-cov2. Ƀơi anăp kơ tơlơi pơhŭi hlâo klin amra lar hyu amăng ană plơi pla, tha plơi A Bơ, khua apăn bruă Ping gah plơi Tua Tem, să Đăk Long, tơring glông Đăk Hà juăt nao tơl djop sang anŏ kiăng pơtô pơblang, črâo ba mơnuih ƀon sang rơmet agaih jum dar sang, mă yua ia jrao rao tơngan, truă akhan gôm ƀô̆ lơ̆m tơbiă hyu gah rơngiao laih dong phaih gah ia jrao lơ̆m hơmâo ană amon ƀudah adơi ayong anong wa glăi mơng kual hơmâo klin. Rĭm boh pơhiăp mơng tha plơi A Bơ, mơnuih ƀon sang plơi Tua Tem lêng kơ hơdor hăng abih pran ngă tui. Lơ̆m arăng tơña bruă pơtô pơblang, pơsur neh met wa ngă tui soh, tha plơi A Bơ klao hok brơi thâo, ƀu hơmâo tơlơi hơget ôh, tơdah ta đing nao, abih pran djru brơi ană plơi pla, neh met wa amra hmư̆ hăng ngă tui hơdôm tơlơi ta črâo ba:

“Kâo juăt nao tơl sang anŏ kiăng kơ pơtô pơblang brơi neh met wa thâo hluh rơđah, biă mă ñu thâo pơmĭn, khin ngă kiăng pơđĭ kyar bơwih ƀong huă ngă tơlơi hơdip jai hrơi jơnap tui. Kơ pran gum pơgôp amăng plơi pla, laih dong bruă khŏ brơi ană tơčô nao hrăm hră. Pơjing tơlơi hơdip hiam klă amăng plơi pla, ngă hiưm pă kiăng neh met wa thâo ngă hmua, thâo rông hlô, pla pơjing kiăng pơđĭ kyar bơwih ƀong huă laih anun ană tơčô thâo rơgơi hrăm hră”.

Ơi A Bơ (gah ieo) bưp pơ alum pran jua ƀing tha rơma amăng plơi Pa Cheng, să Đắk Long

Thun anai mah phrâo yak nao 70 thun samơ̆ tha plơi, Khua apăn bruă Ping gah plơi ơi A Bơ ăt gir run nao djru bruă lơ̆m ană plơi pla kiăng. Hrŏm hăng pran gơgrong, abih pran jua, tơlơi găn rơgao lơ̆m hlâo adih ñu lĕ nai pơtô, laih dong ngă bruă wai lăng sang hră ăt djru brơi tha plơi lu biă mă. Thâo amăng bruă pơtô hrăm laih dong thâo pơhiăp hăng arăng, hơdră bruă mơng Ping gah, Kơnuk kơna, mơng gong gai djop gưl, hơmâo tha plơi ơi A Bơ lăi pơthâo tañ hloh brơi kơ ană plơi pla, hăng hơdră tañ hluh hăng jê| giăm. Sit biă ñu bruă ngă tui tơlơi pơtrun amăng pơđĭ kyar mơng Ping gah brơi kơ ană plơi pla tui đăo, Khul apăn bruă Ping gah plơi Tua Tem mơ̆ tha plơi ngă Khua git gai hăng 11 čô ding kơnan hăng 10 čô mơnuih mut Ping gah lĕ ƀing tui đăo. Lơ̆m ngă tui tơlơi črâo trun mrô 05 mơng Ding jum kơđi čar “Kơ bruă pơtrut kơtang amăng bruă hrăm hăng ngă tui tơlơi pơtô, hơdip hiam tui gru Hồ Chí Minh”, Khul apăn bruă Ping gah plơi Tua Tem lêng kơ ba jơlan hlâo amăng 9 Khul apăn bruă Ping gah amăng să. Khua git gai Ping gah să Đăk Long Trần Ngọc Trực brơi thâo:

“Ping gah lăng Khul anai pok pơhai ngă tui tơlơi črâo trun mrô 05 klă biă mă. Kơ bruă pok pơhai tơl ƀing ding kơna. Hơmâo hơdôm hơbô̆ bruă, pơphun bruă mă klăk ba glăi tŭ yua. Ping gah, mơnuih ƀon sang ngă tui soh. Lăng glăi 5 thun ngă tui tơlơi črâo trun mrô 05, Khul apăn bruă Ping gah hăng tha plơi A Bơ hơmâo Ping gah să rơkâo đĭ Khul apăn bruă Ping gah tơring glông jao hră pơpŭ brơi kơ khul anai hăng ƀing ding kơna lơ̆m ngă tui klă tơlơi črâo trun mrô 05”.

Ơi A Bơ (tal dua yap mơng gah ieo) črâo brơi mơnuih ƀon sang bruă pla kơphê

Ngă tui tơlơi gơgrong mơng ƀing gơñu, tha plơi, Khua apăn bruă Ping gah plơi Tua Tem ơi A Bơ hơmâo lu tơlơi pơgôp amăng bruă pơđĭ kyar hrŏm amăng plơi pla hăng amăng să Đăk Long. Giăm 7 thun hlâo anun lơ̆m să Đăk Long akŏ pơjing mrô sang anŏ ƀun rin rơbêh 73%. Ră anai mrô anai dŏ 37,2%. Lơ̆m pơđĭ kyar bơwih ƀong huă tơlơi hơdip jai jơnap tui, tha plơi A Bơ lĕ mơnuih ba gru rah, hyu črâo ba, pơtô brơi mơnuih ƀon sang thâo amăng bruă rông hlô, pla pơjing phun kơphê, cao su; pơgang klin ƀă ƀơi rơmô kơbao, rông bơbui glai lu tui dong … Ơi A Sự, Khua jơnum min djop djuai anai mơnuih mơnam Việt Nam să Đăk Long brơi thâo, tha plơi Tua Tem hơmâo 125 boh sang anŏ djuai ania Sêđăng, tha plơi A Bơ lĕ mơnuih ba jơlan hlâo amăng bruă pơtrut thâo gum pơgôp, mut hrŏm amăng ană plơi pla, lĕ mơnuih arăng lăng yôm biă mă:

“Tha plơi A Bơ lĕ mơnuih hur har pran jua hăng ñu lĕ mơnuih ba gru brơi kơ ană tơčô hăng ană plơi pla ngă tui. Rĭm wŏt jơnum plơi pla, ơi A Bơ lăi hiưm pă, neh met wa lêng kơ ngă tui soh”.

Hrŏm hăng ngă tơlơi hơdip kơ neh met wa jai hrơi jơnap tui, hơdôm thun giăm anai ƀơi să Đăk Long, tơring glông Đăk Hà, tơring čar Kontum, yua kơ hơmâo mơnuih ba jơlan hlâo kar hăng ơi A Bơ, hơdôm gru grua yôm phara mơng djuai anai Sêđăng dưi djă pioh hăng lăi pơthâo. Să Đăk Long hơmâo 5 boh plơi, abih bang lêng hơmâo sang drông man pơdong djơ̆ hăng gru grua sang djuai ania Sêđăng anai lĕ anih jơnum pơ ƀut amăng plơi pla. Hơdôm grup atông čing hơgor, adôh suang ăt hơmâo mơn hăng pơphun pơtô brơi na nao kơ ană tơčô. Sa, dua bruă mơñam abăn ao, hơkă rô … glăk pok rai tơlơi dưi phrâo kơ djuai anai Sêđăng kiăng hơmâo dong gơnam sĭ mơdrô hơmâo dong prăk pơhrui mơng sang anŏ.

Siu Đoan: Pơblang