VOV4.Jarai - Ƀơi anăp kơ tơlơi tơnap tap mơng klin Covid-19 amăng djop dêh čar tar ƀar rŏng lŏn tơnah, kah hăng amăng dêh čar ta, amăng hrơi blan laih rơgao, hơdôm tơring čar giăm guai hăng dêh čar Kur hơmâo lu hơdră bruă sit nik ba glăi tŭ yua, pơgôp pơgang pơgăn klin, wai pơgang kjăp kual giăm guai lŏn ia ta.

Tui hăng ơi Trần Hòa Hợp, Khua Jơnum min mơnuih ƀon sang tơring glông An Phú, tơring čar An Giang, amăng tơring lông hơmâo jơlan guai ataih giăm 40 km, ha guai hăng tơring glông Angkor Bourei, Bourei Cholsar, Koh Thum tơring čar Kandal hăng Takeo, dêh čar Kur. Ƀơi anăp kơ tơlơi tơnap tap mơng klin Covid-19 ră anai, An Phú, arăng lăng lĕ anih tơnap tap amăng bruă wai pơgang kiăng kơ ngă tui hơdôm tơlơi pơkă ƀơi kual giăm guai. Kơnong mơng akŏ thun truh ră anai, hơdôm anom bruă bơdjơ̆ nao ĕp ƀuh rơbêh 700 čô mơnuih mut rai lŏn ia ča čot.

Ngă tui hơnong pơkă ƀu brơi hlơi ôh mut nao rai lŏn ia ča čot, ƀu brơi klin kman lar hyu amăng mơnuih mơnam, kơtuai tui jơlan guai lŏn ia anom bruă bơdjơ̆ nao ăt glăk dŏ wai kjăp hloh ƀơi jơlan juăt ƀuh mơnuih mut nao rai hăng găn nao ia krông. Ơi Trần Hoà Hợp brơi thâo dong:

“Ƀing gơmơi hơmâo pok pơhai bruă abih bang mơnuih djru pơgang klin. Mơng tal pơphun anai, mơnuih ƀon sang răng kơđiăng tui yơh, gơgrong amăng bruă pơgang, pơgăn klin kheng; hmao tlôn ƀuh, pơgăn, črâo ƀô̆ mơta ƀing ngă soh, biă mă ñu lĕ ƀing mut rai lŏn ia  ča čot mơng dêh čar Kur”.

Kiăng kơ pơgăn mơnuih mut rai lŏn ia ta ča čot, laih dong ngă klă bruă pơgang klin, laih dong wai lăng kjăp guai lŏn ia, amăng hơdôm hrơi giăm anai, tơring glông An Phú hơmâo pok pơhai bruă abih bang mơnuih djru pơgang klin Covid-19, “Rĭm čô mơnuih lĕ sa čô tơhan”, djru brơi gong gai ƀon lan ĕp ƀuh ƀing mơnuih găn nao rai guai lŏn ia ča čot, pơgang klin Covid-19 hŭi lar hyu amăng mơnuih mơnam. Ayong Nguyễn Minh Trí, sa čô mơnuih dŏ hơdip ƀơi să Vĩnh Hội Đông, tơring glông An Phú brơi thâo.

“Kâo lĕ mơnuih ƀon sang yua anun kiăng răng kơđiăng…Kâo mut hrŏm hăng grup amăng ƀon lan hyu tir giăm rơbêh ha blan laih … Bruă mă anai kiăng pơhlôm brơi tơlơi suaih pral kơ ană plơi pla hăng kơ pô dong”.

Bruă ƀing mơnuih găn nao rai lŏn ia ča čot mơng dêh čar Kur mut nao dêh čar Việt Nam ƀơi tơring čar An Giang, amra ngă klin lar hyu amăng tơring čar ƀu hmao thâo. Hăng hơnong pơkă “Ƀu brơi mơnuih mut rai lŏn ia ča čot, ƀu brơi klin kman lar hyu amăng mơnuih mơnam”, mơnuih apăn bruă, ling tơhan ƀơi hơdôm anih gak, pơphun hyu tir, wai lăng tơhrơi kah hăng mlăm, wai lăng kjăp ƀơi bah amăng jang, jơlan juăt nao rai, dua gah ia krông ƀơi kual giăm guai …pơgăn hĭ mơtăm ƀing mơnuih găn nao rai ča čot. Ayong Trần Minh Chiến, Kơ-iăng Khua anom bruă git gai ling tơhan să Vĩnh Hội Đông, tơring glông An Phú brơi thâo dong.

“Hăng pran jua hur har, gơgrong hloh. Grup hơmâo kah pha 2 phung mơnuih, 1 phung nao pơ plơi Vĩnh Hòa, phung dŏ glăi nao pơ phường Vĩnh Ngươn kiăng pơhlôm klă amăng bruă pơgang klin”.

Lăi pơthâo hơdôm tơlơi tơnap tap mơng ling tơhan lơ̆m hyu tir, Đại úy Chau Ône, Kơ-iăng khua anom bruă git gai ling tơhan Vĩnh Hội Đông, Ling tơhan wai pơgang guai lŏn ia tơring čar An Giang brơi thâo:

“Mơmŏt mlăm lăng hyu bơbrui ƀu rơđah ôh lơ̆m ling tơhan tơbiă hyu tir ..Dua lĕ dong hơjan hlim ngă tơnap tap biă mă. Samơ̆ hăng pran gir run kơtang hloh mơng ling tơhan … ƀing gơmơi hmao tlôn pơsur pran jua, pơtrut bruă hyu tir amăng djop kual”.

Tơring čar Đồng Tháp hơmâo rơbêh 50 km jơlan ha guai hăng tơring čar Pray-veng, dêh čar Kur, hơmâo 2 bah amăng jang jar kmar lĕ Thường Phước hăng Dinh Bà. Hăng kual lŏn hơmâo lu ară ia krông, lu ară ia krông anet kơčep yua anun amuñ brơi ƀing mơnuih đuăi dŏp hŭi kơ ling tơhan ĕp ƀuh.

Ayong Nguyễn Quốc Triệu, Tơhan amăng să Thông Bình, tơring glông Tân Hồng brơi thâo, ling tơhan wai amăng plơi ngă klă amăng bruă gum hrŏm hăng tơhan pơkŏn ƀơi hơdôm anih dŏ gak, hmao tlôn ĕp ƀuh hăng pơsir hĭ khut khăt ƀing mơnuih, khul grup djru brơi bruă ngă soh, ba mơnuih mut rai dêh čar ča čot…

“Wai lăng hơdôm rơdêh đuăi nao rai, pơtă pơtăn mơnuih ƀon sang truă akhăn gôm ƀô̆, rao tơngan hăng ia jrao…tơdah ƀuh hlơi aka ƀu thâo krăn khŏm pel ĕp amăng kơthung rơdêh, hră pơ-ar pioh pơgang klin Covid-19 hăng găn nao rai lŏn ia ča čot”.

Ơi Nguyễn Văn Cọp, Khua Jơnum min mơnuih ƀon sang tơring čar să Thông Bình, tơring glông Tân Hồng brơi thâo, hơdôm hrơi giăm anai, Gong gai ƀon lan hrŏm hăng djop khul ling tơhan djru gah bruă pơgang klin kơtuai tui jơlan guai lŏn ia, pơtrut bruă pơtô pơblang, pơtrut pơsur mơnuih ƀon sang ngă tui hơdôm hơdră pơgang klin Covid-19, anăm pơgang brơi ƀing mơnuih găn nao rai lŏn ia ča čot, črâo ƀô̆ mơta lơ̆m ƀuh mơnuih găn nao rai lŏn ia ča čot lĕ bruă gong gai hăng ling tơhan glăk ngă tui.

“Truh ră anai bruă pơtô pơblang ngă kơ mơnuih ƀon sang răng kơđiăng tui yơh, thâo rơđah amăng bruă pơgang klin kheng. Sit biă ñu lơ̆m ƀuh ƀing mơnuih aka ƀu thâo krăn ƀô̆ mơta ƀudah rai mơng kual pơkŏn, mơnuih ƀon sang lêng kơ tañ ƀuh hăng lăi pơthâo hmao tlôn”.

Hơdôm tơring čar anun lĕ Kiên Giang hăng Cà Mau ăt hơmâo pok pơhai hăng ngă klă bruă gum hrŏm hyu tir, wai lăng mơnuih găn nao rai; kiăng kơ tañ ĕp ƀuh hăng pơsir hĭ hmao tlôn hơdôm bruă mơnuih găn nao rai lŏn ia ča čot amăng hơdôm hrơi anai.

Mah ră anai klin glăk dŏ ngă tơnap tap, aka ƀu thâo hlâo, samơ̆ lơ̆m ling tơhan hăng mơnuih ƀon sang gum tơngan hrŏm, djop tơlơi tơnap tap amra găn rơgao. Amăng tal pơgang, pơgăn klin glêh tơnap ră anai, pran gum pơgôp sa wŏt hơmâo ngă tui. Amăng mơmŏt mlăm kơtuai tui guai lŏn ia, ling tơhan hăng mơnuih ƀon sang ăt ha pran sa jua amăng bruă pơgang klin. Djop bruă kiăng pơgi kơdih hiam klă, hơđong hăng rơnuk rơnua.

VOV4

Siu Đoan: Pơblang