VOV4.Jarai - Lơ̆m 72 thun, lu mơnuih hơdip mơ-ak hăng ană tơčô samơ̆ tơhan hơđăp ơi Phùng Văn Toàn dŏ ƀơi phường Nghĩa Tân, plơi prong Gia Nghĩa, tơring čar Dak Nông ruah bruă wai lăng pơsat. Giăm 10 thun laih rơgao, ñu pơ ala brơi bbing sang anŏ ling tơhan tŭi ñang, rơmet pơagaih jum dar pơsat tơhan djai pơsăn drơi ƀơi Pơsat dor tơhan djai pơsăn drơi tơring čar kiăng kơ hơdor tơngia na nao ƀing ling tơhan.

Hơdôm hrơi anai plơi prong Gia Nghĩa, tơring čar Dak Nông glăk ngă tui tơlơi črâo trun mrô 16 mơng Khua dêh čar ta pioh pơgang klin Covid-19. Samơ̆, ƀơi Pơsat dor tơhan djai pơsăn drơi tơring čar Dak Nông djop boh pơsat lêng kơ rơmet pơagaih prap pioh mông ngă lơphet hơdor Ling tơhan djai pơsăn drơi lơ 27/7. Ơi Phùng Văn Toàn, mơnuih wai lăng pơsat dor tơhan djai pơsăn drơi tơring čar Dak Nông brơi thâo, thun anai klin hơđut đĭ kơtang yua anun lu sang anŏ ling tơhan djai pơsă drơi  ƀu dưi nao tŭi ñang. Dua rơkơi bơnai ñu pioh hrơi mông nao rơmet pơagaih, dưm gơnam pioh ngă yang ƀơi djop boh pơsat, tơlơi anai amra ngă kơ sang anŏ ƀing tơhan pơđao amăng pran jua.

“Jang jai dŏ hơdip, kâo pơmĭn na nao amăng rơnuk blah wang tơnap tap lêng kơ hơmâo adơi ayong ling tơhan mơ̆ truh lŏn ia rơngai ƀing gơñu rơngiă. Đa hơmâo pơsat 1 thun, ƀudah 5 -7 thun ƀu hơmâo pô sang rai tŭi ñang samơ̆ kâo amra tŭi ñang pơ ala brơi pô sang ƀing tơhan djai pơsăn drơi ƀơi anai, kiăng kơ hơdor tơngia ƀing gơñu”.

Ơi Toàn bơră ruai tom, thun 1970, ñu nao ngă tơhan blah ayăt Mi ƀơi kual dơnung truh hrơi lŏn ia ta rơngai. Truh thun 1979, lơ̆m tal blah wang ƀơi guai lŏn ia kual Kơdư, ñu arăng iâu nao ngă tơhan wai pơgang lŏn ia dong. Thun 1992, ñu hrŏm hăng sang anŏ glăk hơdip pơ plơi pla ƀơi tơring čar Vĩnh Phúc laih anun nao pơ Dak Nông bơwih ƀong huă. Kiăng kơ hơdor tơngia ƀing tơhan djai pơsăn drơi, ñu rơkâo wai lăng pơsat, rĭm hrơi tŭi ñang brơi ling tơhan dor ƀơi pơsat dor tơhan djai pơsăn drơi tơring čar Dak Nông. Tui hăng ñu pơmĭn, wai lăng pơsat ƀu djơ̆ kơnong bruă mă đôč ôh mơ̆, ăt lĕ tơlơi gơgrong hơdor tơngia ƀing ling tơhan djai pơsăn drơi kiăng kơ pơklaih rơngai lŏn ia.

Ơi Phùng Văn Toàn giăm 10 thun wai lăng pơsat dor tơhan djai pơsăn drơi

Ayong Trương Văn Bình, kơ-iăng Khua git gai khul hlăk ai mut phung tơring čar Dak Nông brơi thâo, hơdôm bruă mă mơng ơi Toàn kiăng pơtrut pơsur ngă tui gru grua khăp kơ lŏn ia mơng hlăk ai tơring čar Dak Nông. Rĭm thun truh hrơi ngă yang thun phrâo, ƀudah hrơi ngă yang prong amăng dêh čar khul hlăk ai amăng tơring čar lêng kơ nao pơsat rơmet pơagaih djop boh pơsat tơhan djai pơsăn drơi.

“Wa lêng abih pran jua črâo brơi anih tŭi ñang brơi hơdôm khul grup rai hơ-ŭ hơdor tơngia. Hơmâo lu jơlan hơdră mah amăng hrơi hơjan hlim wa ăt gir run mơn hrŏm hăng djop khul grup, hlăk ai pơphun ngă tui jơlan hơdră pơhmutu lĕ ngă lơphet tŭi ñang pioh hơdor ling tơhan. Lăng tui pran hơdip mơng wa Toàn, ƀing hlăk ai ăt abih pran nao djru wa sa dua bruă anun lĕ rơmet pơagaih, hlă bơnga, dưm dăp glăi. Wa Toàn ăt lĕ mơnuih ba gru kiăng kơ ƀing gơmơi ngă tui hăng pran gơgrong mơng hlăk ai, anun lĕ ngă tui gru grua mơñumia hơdor kơ pô klơi”.

Djop pơsat hơmâo ơi Toàn rơmet agaih rĭm hrơi

Ră anai pơsat dor tơhan djai pơsăn drơi tơring čar Dak Nông glăk lĕ anih dor rơbêh 500 boh pơsat ling tơhan, amăng anun hơmâo rơbêh 200 boh pơsat aka ƀu thâo sang anŏ, plơi pla pơpă ôh. Yă Nguyễn Thị Hương, Kơ-iăng khua gơnong bruă mă, tơhan rơka hăng mơnuih mơnam tơring čar Dak Nông brơi thâo, giăm 10 thun wai lăng pơsat, rĭm hrơi ơi Toàn lêng kơ nao rơmet pơagaih jum dar, trơ̆i thun kyâo, sut rơgoh ƀơi kơƀang, tŭi ñang hăng tŭi apui kơđen ƀơi rĭm boh pơsat.

“Wa lăng bruă anai lĕ bruă mă yôm phăn kar hăng sa čô mơnuih tha rơma ngă hơdôm bruă hiam klă pioh hơdor kơ ƀing gŏp, ñu hok mơ-ak biă mă. Bơnai ñu ăt tui anun mơn, rĭm thun truh hrơi ngă yang thun phrâo ăt djru prap rơmet mông ngă yang pioh hơdor ƀing ling tơhan. Hăng rĭm thun ƀing gơmơi hơmâo lu bruă mă djru brơi wa kiăng ngă hiưm pă pơhlôm brơi bruă wai lăng pơsat, kah hăng kiăng kơ wa hơdip mơ-ak”.

Hăng hơdôm tơlơi gum pơgôp amăng bruă wai lăng pơsat dor tơhan djai pơsăn drơi tơring čar Dak Nông, thun 2020, ơi Toàn lĕ sa amăng 3 čô mơnuih amăng tơring čar Dak Nông hơmâo Ding jum bruă mă, tơhan rơka hăng mơnuih mơnam pơpŭ bơnai “Mơnuih ba gru amăng bruă djru brơi mơnuih mơnam”. Anai lĕ tơlơi pơpŭ kiăng kơ pioh hơdor pran gum pơgôp mơng ơi Toàn amăng bruă wai lăng pơsat tơhan djai pơsăn drơi hăng tơguăn sang anŏ ƀing tơhan anai rai pŭ glăi pơ plơi pla.

Siu Đoan: Pơblang