Thun 2024, Jơnum min mă bruă kơnuk kơna kơ mơnuih Việt Nam pơ̆ dêh čar arăng gum hrŏm hăng Jơnum min mơnuih ƀôn sang ƀôn prong Hồ Chí Minh pơphun jơlan hơdră “Bơyan bơnga plơi pla” hăng tơlơi gum hrŏm năng ai ñu 3.000 čô tuai jak iâo. Jơlan hơdră pơphun mơ̆ng lơ 1/2 truh lơ 2/2/2024 (anun lĕ lơ 22 hăng 23 /12 blan di thun Quý Mão) hăng lu bôh yôm lu mơta.

Amăng rơwang jơlan hơdră “Bơyan bơnga plơi pla" 2024, Khua mir sir dêh čar ta Võ Văn Thưởng hăng bơnai ñu git gai sa dua bruă mă tŭ yua hrŏm hăng neh wa ta dô̆ pơ̆ dêh čar arăng. Biă ñu, Jơnum min mơnuih ƀôn sang ƀôn prong Hồ Chí Minh git gai pơphun jơnum bưp ƀô̆ mơta năng ai ñu 1.000 čô mơnuih dêh čar ta dô̆ pơ̆ dêh čar arăng “Mơ-ak bơyan bơnga Giáp Thìn 2024”, tơña bla hơ-ưč hmưi Tết neh wa, mơ-ak bơyan bơnga tum jơngum hăng Tết bưp glăi sang anô̆; mơ̆ng anun lăi pơthâo truh mơnuih dêh čar ta dô̆ dêh čar arăng hơdôm bôh than dưi pơđĭ kyar mơ̆ng ƀôn prong Hồ Chí Minh rơgao kơ 35 thun pơplih phrâo hăng pơđĭ kyar./.