Dua bơnah hơmâo lăi pơthâo bruă pơčrong sai djop mơta anăp ngă bruă prong, pơtong rơđah hơdôm hơdră ngă rơđah rơđong hloh kiăng kơtưn ngă hrŏm laih anun pơđĭ tui tơlơi ngă giăng mah thun blan pơ anăp. Dua bơnah tŭ ư kiăng pơtrut tui bruă pơblih khua mua dua bơnah bưp nao rai, ngă hrŏm amăng bruă bơwih ƀong huă, pơtô hăng pơjuăt, kơsem min boh thâo ia rơgơi phrâo, mă bruă apah, gru grua hiam pơrơguăt drơi jăn tuai čuă ngui laih anun jĕ giăm rô nao rai mơnuih ƀôn sang dua bơnah.

Khua mir sir ơi Lương Cường brơi thâo: Dua bơnah pơtong rơđah, tơhnal pơkă kiăng pơđĭ tui hơnơ̆ng ngă hrŏm tuh pơ alin hăng rơnoh prăk pơhrui glăi sĭ mơdrô mơ̆ng dua bơnah; ngă tui djop hră pơkôl dua hơmâo kĭ ƀudah ngă hrŏm, biă mă ñu hneč mă đut tơhnal ngă gêh găl djop mơta mơ̆ng Hră pơkôl sĭ mơdrô rơngai Việt Nam-EU (EVFTA); pơđĭ tui tơlơi gơgrong mơ̆ng djop anom bruă ngă hrŏm, amăng anun Jơnum min pơlir hơbit kơnuk kơna ngă hrŏm bơwih ƀong huă hăng kơsem min boh thâo phrâo ia rơgơi. Laih dơ̆ng, dua bơnah tŭ ư pok jơlan ngă hrŏm phrâo mơ̆ dêh čar Bulgaria hơmâo anŏ gêh găl laih anun Việt Nam hơmâo tơlơi či kiăng kah hăng pơblih yua mrô, boh thâo ia rơgơi pla pơjing phrâo amăng bruă ngă hmua hăng gah bruă ia jrao....