Ƀơi mông jơnum jao pri apah bơni, Khul apah bơni hơmâo pơpŭ bơni kơ 22 mơta rup hiam amăng tal pơplông thun anai, ruah mă mơ̆ng 128 pok rup hiam ba pơplông, pioh pơdă, lăi pơthâo hăng mơnuih ƀôn sang nao ĕp lăng amăng djop anih amăng dêh čar, mơnuih ƀôn sang Việt Nam dŏ ƀơi dêh čar tač rơngiao hăng gơyut gơyâo jar kmar. Khul čom puang tal blung a hơmâo pơsit, hrŏm hăng lu rup ba pơplông, rup hiam, tŭ yua thun anai ăt ƀuh bruă mă pơplông hơmâo boh yom phun pia pơđĭ tui rơđah biă mă.

Pơhiăp ƀơi mông jơnum, Khua anom pơtô bruă ping gah dêh čar ơi Nguyễn Trọng Nghĩa bơni biă mă ƀing čơphil, kač rup hiam ba pơplông. Kiăng pơđĭ tui boh tŭ yua hiam hloh, pơtô pơblang kơ bruă pơtom hiăp, tơlơi pơhing pơtom hiăp lăi nao bruă wai pơgang jơlan guai dêh čar pơ anăp anai, Khua anom pơtô bruă ping gah rơkâo, djop sang bruă, khul grup, tơpuôl mơnuih mơnam, mơ̆ng gơnong dlông truh pơ plơi pla ăt pơtô lăi tong ten jơlan hơdră mơ̆ng ping gah hăng Kơnuk kơna ta kơ bruă pôr pơthâo jơlan guai dêh čar, ngă pô lŏn ia amăng tơlơi pơhing phrâo ră anai, tui hăng Hră pơtrun Jơnum ping gah dêh čar tal 13 hơmâo pơsit laih.