Lơ 25/9, tơring čar Gia Lai pơphun yôm phăn Jơnum pơplông khăp kơ lŏn ia tal I, rơwang thun 2025-2030, hăng tơlơi mut hrŏm mơng 600 mơnuih ba gru amăng djop mơta bruă. 5 thun rơgao, tal pơplông khăp kơ lŏn ia ƀơi Gia Lai hơmâo lu boh than ba glăi pơprong: pơđĭ kyar bơwih ƀong huă dưm dưm giăm 7% ha thun; wai pơgang rơnuk rơnua pơhlôm kjăp, bruă tuh pơ alin, bơwih ƀong sĭ mơdrô tŏ tui pơplih. Amăng mông jơnum, ƀing mơnuih ba gru hơmâo pơlăi nao rai tơlơi găn rơgao, hơdră pơplih pơčeh phrâo, amăng anun yôm hloh lĕ: Ling tơhan wai pơgang guai tơring čar hăng jơlan hơdră “Čung čơđai nao sang hră, djru brơi sang anŏ ƀun rin ƀơi kual giăm guai”; tơlơi pơčeh mă yua boh thâo phrâo amăng khăm pơjrao ƀơi sang ia jrao pơjrao mơta Gia Lai; tơlơi bơră ruai mơng amai H’Uyên Niê (să Ia Ly) hăng hơbô̆ bruă tuai čuă ngui amăng ƀon lan pơlir hăng djă pioh bruă mơñam abăn ao, pơhlôm brơi tơlơi hơdip kơ mơnuih djuai ƀiă…

Amăng rơwang thun 2025-2030, tal pơplông khăp kơ lŏn ia amăng tơring čar Gia Lai amra đing nao 4 mơta bruă jao akŏ phun. Anun lĕ tŏ tui pơjing Ping gah hăng anih anom kơđi čar brơi hơbot, mă bruă tŭ yua; pơtrut pơđĭ kyar bơwih ƀong mơta, ngă hmua yua boh thâo phrâo,  pơkra pơjing gơnam tam hăng pơkra apui lơtrik phrâo; pơđĭ kyar gru grua-mơnuih mơnam, hrưn đĭ tơlơi hơdip mơnuih ƀôn sang; laih dong wai pơgang rơnuk rơnua hơđong hăng pok prong ngă hrŏm pơtom hiăp, sit biă ñu hăng hơdôm boh tơring čar Dơnung dêh čar Lao hăng Ngŏ kơdư dêh čar Kur.