VOV4.Jarai - Hăng tơhnal pơđĭ kyar kơtang plơi prong Đà Lạt (Lâm Đồng) tui jơlan gah đĭ kyar hơdjă, pơdŏng plơi prong dlai tlô ba jơlan hlâo đơ đam dêh čar, lơ 3/9/2015, Khua dêh čar mă yua laih Tơlơi pơsit 1528 kơ sa dua hơdră pơkă hơdră bruă pha ra pơđĭ kyar plơi prong Đà Lạt. Khă hnun hai, tơdơi kơ 7 thun pok pơhai ngă tui bôh tơhnal ba glăi ƀiă biă. Yua hơget hmâo čơkă mă laih hơdră pha ra mơ̆, Đà Lạt ƀu dưi pơplih phrâo pha ra.

Tui Tơlơi pơsit mrô 1528 thun 2015 mơng Khua dêh čar, hơdră bruă pơkă pha ra pơđĭ kyar Đà Lạt hăng kual jum dar, tơring čar Lâm Đồng, hmâo 5 bôh yôm, đing nao kơ bruă pơkă kual kăng pơpha bruă apăn, tuh pơplai kơ lŏn sang, đing nao prăk apah lŏn hăng hơdôm rơwang bruă tuai čuă ngui phun, ƀu mă jia blơi gơnam pioh kơ bruă pla bơnga, añăm pơtăm mă yua hơdră phrâo, đing nao pha brơi prăk mơng ngăn drăp Kơnuk kơna kơ hơdôm ring bruă anom mă yua yôm phăn mơng plơi prong Đà Lạt. Tơdơi kơ 7 thun ngă tui hơdră pơkă gum djru, bôh tơhnal rơđah hloh mơ̆ Lâm Đồng dưi hmâo lĕ ngă brơi Đà Lạt jing sa amăng hơdôm plơi pla ba jơlan hlâo đơ đam dêh čar ta gah pơđĭ kyar bruă đang hmua tui jơlan gah măi mok yôm, hăng hơdôm gơnam pha ra hmâo ƀơi djop anih anom sĭ mơdrô amăng dêh čar hăng ba nao sĭ pơ̆ dêh čar tač rơngiao. Ơi Nguyễn Văn Châu, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Lâm Đồng brơi thâo:

“Khom lăi lĕ, kiăng bruă đang hmua mă yua hơdră phrâo pơđĭ kyar dưm kơnar hăng hơdôm bôh dêh čar amăng kual hăng rŏng lŏn tơnah lĕ, bruă blơi mut hơdôm hơdră phrâo măi mok phrâo amăng dêh čar akă dưi pơkra lĕ, sa tơlơi kiăng biă, kiăng biă mă hăng anom bơwih ƀong. Amăng hơdôm hrơi rơgao, ngă tui hơdră pơkă pha ra pơđĭ kyar Đà Lạt, hơdôm bôh anom bơwih ƀong hmâo čơkă mă laih hơdră gum djru ƀu mă jia hăng hrŏ trun mă jia gơnam blơi mơng dêh čar tač rơngiao. Mơng anun pơjing hơdôm hơdră mă yua hơdră phrâo, mă yua bruă đang hmua hơdeč hmar klă hloh, mơnuih ƀôn sang čuă lăng hrăm tui tơlơi găn rơgao, lăng ƀuh bôh tơhnal hăng tuh pơplai. Bruă tuh pơplai anun hmâo ba glăi laih tơlơi bơwih ƀong ƀơi anăp kơ anom bơwih ƀong hăng mơnuih ngă đang hmua”.

Tơdơi kơ 7 thun ngă tui hơdră pha ra pơđĭ kyar Đà Lạt, bôh tơhnal akă djơ̆ hăng tơlơi čang rơmang ôh

Lăp đing nao lĕ, hơdră pha ra pioh kơ Đà Lạt phrâo hmâo mă pơđom pioh gru amăng bruă pơđĭ kyar đang hmua tui hơdră phrâo măo mok. Yua kơ lu bôh than ba truh pha ra, hơdôm bôh yôm pơkon amăng hơdră anai akă dưi hmâo tơring čar Lâm Đồng ngă tui ba glăi bôh tơhnal kiăng dưi djru plơi prong Đà Lạt pơđĭ kyar kơjăp kơtang.

Bơhmutu ñu kah hăng bruă brơi hơdôm mơnuih tuh pơplai bơwih ƀong sĭ mơdrô lŏn sang jao rơwang bruă pioh pơdŏng sang dô̆, ring bruă dăp hơdră man pơdŏng. Wot 21 rơwang bruă gah anăn ngă tui hơdră pha ra leng kơ akă djop pran ngă pơhư̆č pơjing tơlơi pơplih pha ta hăng bruă sĭ blơi lŏn sang ƀơi plơi prong Đà Lạt hăng kual jum dar, yua kơ hơdôm tơlơi gun akă ngă giong anom mă yua pioh jao glăi.

Gah hơdră dưi đing nao pơpha prăk mơng ngăn drăp kơnuk kơna (amăng anun hmâo prăk ODA, sĭ hră pơkrem prăk kơnuk kơna, hơdôm jơlan hơdră djru hmâo tơhnal pơkă, prăk čan mă kơmlai ƀiă) kiăng tuh pơplai hơdôm ring bruă, rơwang bruă phun, rơwang bruă pơkă anom mă yua yôm phăn mơng plơi prong Đà Lạt, hơdôm rơwang bruă jơlan nao rai hmâo tơhnal rô nao rai sĭ mơdrô, pơtom hiăp pơlir hơbit kual... ăt akă ba glăi bôh tơhnal rơđah mơn. Bôh nik, Jơnum min mơnuih ƀôn sang tơring čar Lâm Đồng hmâo lăi pơthâo laih kơ Ding jum wai lăng kơčăo bruă hăng tuh pơplai, Ding jum prăk kak rơkâo pơpha năng ai ñu 19.650 klai prăk pioh ngă tui 21 rơwang bruă, ring bruă phun pơđĭ kyar Đà Lạt. Truh ră anai, phrâo hmâo mă 2 rơwang bruă dưi hmâo kơnuk kơna đing nao pơpha brơi prăk, 2 rơwang bruă hmâo tơlơi pơsit pơtrun tuh pơplai. Hăng akă hmâo rơwang bruă hơpă dưi ba mut amăng anăn đing nao iâu pơthưr tuh pơplai mơng Kơnuk kơna tui hơdră pha ra kơ Đà Lạt.

Hăng sa čô mơnuih kĕ phĭ hăng Đà Lạt mơng hơdôm thun tơdơi kơ tlaih rơngai lŏn ia truh ră anai, ơi Nguyễn Quốc Dũng, ƀơi phường 8, lăi lĕ, anom mă yua ƀơi plơi prong kaih tuh pơplai hăng kơƀah ha amăng plĕ, pơkă kual ƀu hmao hăng rơnoh đĭ kyar, ngă Đà Lạt hmâo hơdôm mơta tơlơi akă gal. Rơđah biă ñu lĕ tơlơi gun ƀơi jơlan nao rai amăng bơyan tuai hyu čuă ngui, ia ling dăo lip ƀơi sa dua bit anih kual lom hmâo hơjan prong, laih anun tơlơi phă dlai tlô mă lŏn, pơdŏng mă ča cot ƀơi djop anih. Plơi prong Đà Lạt khom tañ pok prong anih anom hăng sut lui mơtăm bruă ngă đang hmua amăng krah plơi prong.

“Đà Lạt hmâo laih hơdôm hơdră pha ra kiăng đing nao samơ̆ tuč rơnuč ñu hmâo lu anô̆ ngă gun mơ̆, anô̆ gun anun lĕ yua kơ hơdră pha ra akă rơđah. Sang gôm mơnil păng rưng lĕ hơdư̆ hor ngă ha jăn mơ̆, lŏn pơkă kơ đang hmua lĕ dŏng đam amăng krah plơi prong, laih anun tơlơi hơđong man pơdŏng lĕ, akă pơtrut kơtang wai lăng ba truh sit hơjan thơ ia lip hĭ. Khom ngă mơtăm bruă pơkă kual, pok prong plơi prong anăm tŭn hĭ ñu ôh, ñu amra dưi pơsir mơtăm djop mơta tơlơi".

Đà Lạt kiăng biă pơđĭ kyar pok prong plơi prong

Lăi nao kơ bruă ngă tui hơdră pơkă gah hơdră bruă pha ra kơ Đà Lạt, ơi Trần Văn Hiệp, Khua Jơnum min mơnuih ƀôn sang tơring čar Lâm Đồng lăi lĕ, khă plơi prong hmâo gir run laih samơ̆ bưp lu tơlơi tơnap, biă ñu yua kơ gun hơdôm tơlơi pơkă mơng tơlơi phiăn:

“Bôh tơhnal lĕ akă kah hăng tơlơi čang rơmang ôh, amăng anun tơnap tap hloh lĕ ăt hơdră pơkă, hăng tơlơi tơnap kơ ngăn rơnoh djru. Amăng Tơlơi pơsit tơdah rơđah thơ đing nao pơpha prăk mơng ngăn drăp kơnuk kơna pioh ngă tui hơdôm rơwang bruă phun pơđĭ kyar plơi prong Đà Lạt, laih anun ba tơbiă hơdră pơkă tuh pơplai kiăng tañ pok pơhai sa dua rơwang bruă anom mă yua yôm phăn hmâo tơhnal pơtom hiăp, pơlir kual. Bơhmutu ñu kah hăng jơlan đuăi hmar lĕ bôh than khom dưi nao hlâo, samơ̆ bôh nik ăt ƀơi rơnoh mơn”.

Dưi thâo, Jơnum min mơnuih ƀôn sang tơring čar Lâm Đồng hmâo laih hră pơ-ar lăi pơthâo glăi bruă ngă tui Tơlơi pơsit mrô 1528 hăng rơkâo Khua dêh čar pel ĕp pơplih pơkra sa dua hơdră, hơdră bruă pha ra pioh kơ Đà Lạt ngă hiưm hơpă djơ̆ hrom hăng hơdôm tơlơi pơkă amăng tơlơi phiăn hăng lăp djơ̆ hăng tơlơi kiăng pơđĭ kyar bơwih ƀong - mơnuih mơnam mơng plơi prong. Amăng anun, biă ñu đing nao hơdră bruă djru anô̆ pha ra hăng hơdôm rơwang bruă gah tuai čuă ngui, pơdơi pơdă, lŏn sang, bruă đang hmua tui hơdră phrâo ƀơi plơi prong Đà Lạt hăng kual jum dar. Hơdră bruă djru gum hmâo laih mơng 7 thun hlâo adih, samơ̆ ngă tui ƀu ba glăi bôh tơhnal, ră anai khom rơkâo pơplih pơkra glăi, akă thâo hơbin Đà Lạt, Lâm Đồng mơng dưi pơplih pha ra kiăng jing plơi prong dlai tlô ba jơlan hlâo đơ đam dêh čar hăng amăng kual kah hăng tơlơi čang rơmang./.

Quang Sáng/VOVTN čih

Siu H’ Prăk pơblang