Ƀơi Hà Nội, mơnuih ƀôn sang amăng plơi prong jưh jom hăng tuai jar kmar hyu ngui glăi pơtum ƀơi tong krah ƀôn prong, jum dar sang jơnum prong kơkuh pơpŭ, jum dar dơnao Hoàn Kiếm…čơkă Noel. Adai ayuh hyiăng amăng mlam Noel rơ-ơ̆ thu, ƀu rơ-ot đơi ôh, gêh găl brơi kơ bruă hyu ngui, rơbat amăng jơlan, anih ngui ngor amăng ƀôn prong.

Ƀu kơnong amăng jơlan glông ƀôn prong đôč ôh, jum dar dơnao Hoàn Kiếm, anih giăm sang jơnum kơkuh pơpŭ, sang Ơi Adai prong ăt pơhưč lu tuai nao ngui ĕp lăng mơ̆ng či tlam aka mơmŏt, hyu lăng, čơphil rup djă pioh. Hrŏm hăng ƀơi sang Ơi adai prong ƀudah sang jơnum prong, arăng pơhrôp hăng pul apui djop mơta ia iom hiam pơčrang trun, dŏ hơmâo anih pơdong pơhrôp hơdor glăi rup anih tơkeng kơ khua yang đưm adih, kiăng mơ-it nao sa tơlơi cang rơmang amăng mlam hiam mơak, rơnuk rơnua, pơhưč lu tuai hăng mơnuih ƀôn sang nao ĕp lăng, čuă ngui.

Bơyan ngui Noel ƀơi Dak Lak ƀuh dik dak mơ-ak djop plơi pla, apui kơđen lič lač amăng bơyan puih ƀơi kual Dap kơdư. Hơdôm ară jơlan nao pơ hơdôm tơring đăo, sang jơnum hơmâo tol yol apui kơđen. Rơngiao kơ sang jơnum Chính toà, hơdôm sang mơñum kơphê, sang sĭ gơnam lêng kơ tol apui lič lač…pioh glăi anih phĭn rup hiam. Sa bơyan ngui ngor mơ-ak mơ-ak, pơđao pran jua, neh met wa tui đăo anăp nao kơñ pơgi kiăng plơi pla jai hrơi pơđĭ kyar. Mơnuih ƀôn sang mut ngui hrŏm bơyan Noel ƀơi Sang jơnum Chính tòa Ban Mê pơđao pran jua hăng bă blai pran khăp pap tơdruă.

Mlam lơ 24/12, Đà Lạt kah hăng buh ao phrâo lu mơta ia iom. Amăng krah adai ayuh hyiăng kơthul gôm, apui pơčrang lăng hrup tơlơi mơyanghing ang ƀơi djop sang jơnum kơkuh pơpŭ hăng hmư̆ tơlơi adoh bơni hrơi Noel kơdok kơdor mơak hlak amăng djop glông jơlan lơ̆m plơi prong, pơƀuh brơi sa bơyan Noel rơnuk rơnua hơ̆k mơak amăng kual lŏn mơnai rơbâo rơbăn čơnuh bơnga hiam.

Anŏ lăp đing nao, khul sang jơnum hyơ̆k hyơr  apui bơngač ƀơi lan sang jơnum prong đăo khop Đà Lạt. Amăng anih lăng gru đưm, phun kyâo hơngô Noel prong prin hrŏm hăng hơdôm rơbăn pul apui pơčrang hơdai hyu čreng čruang hiam tloh noh, pơhưč hơdôm rơbâo čô tuai hăng mơnuih ƀôn sang pơtum nao ngui hrŏm. Laih dơ̆ng, 21 boh anih jơnum đăo khop ƀơi phường tong krah plơi prong Xuân Hương-Đà Lạt ăt bơngač bral apui pơčrang amăng mlam, jing anih nao ngui hiam gru grua ƀu dưi rơgao hĭ ôh, mơnuih ƀôn sang hăng tuai nao ĕp lăng khom djop. Ƀơi lu plơi pla, djuai ania K’Ho dik dăk čơkă Noel hăng jơnum mơak, kơkuh pơpŭ adoh bơni hrơi Noel laih anun čơkă thun phrâo mơak mơai rơnuk rơnua, trơi pơđao.