Ngă tui Hră pơtrun mrô 154 thun 2025 mơ̆ng Kơnuk kơna, lơ 29/1/2026 tơring čar Lâm Đồng čih dăp akŏ bruă brơi pơhrŏ mrô mơnuih mă bruă thun 2026. Akŏ bruă anai, kiăng dăp glăi bruă mă brơi hơbôt hloh amăng sang bruă kơnuk kơna, pơđĭ tui boh tŭ yua kơ bruă mă djop sang bruă čar, pơsir hră pơar brơi mơnuih ƀôn sang, anom bruă kơnuk kơna amăng đơ đam tơring čar. Tui hăng anun, amăng thun 2026, tơring čar Lâm Đồng him lăng amra hơmâo 605 čô khua mua, mơnuih apăn bruă amăng 104 boh sang bruă, plơi pla amra ngă tui pơhrŏ mrô mơnuih mă bruă sit nik.

Amăng anun, 468 čô mơnuih tŭ mă jơlan hơdră djru prăk pơdơi abih thun mă bruă hlâo kơ truh thun pơdơi hăng 137 čô tŭ mă prăk pơdơi bruă hlao tui tơlơi phiăn pơkă. Tơring čar Lâm Đồng pơtong rơđah tơhnal pơkă kơ bruă mă ƀu kơnong pơhrŏ mrô mơnuih mă bruă đôč ôh, dŏ dăp glăi sang bruă, pơđĭ tui boh tŭ yua kơ mơnuih mă bruă čar, kiăng dưi ngă djop tơlơi pơtrun amăng bruă mă rơnuk phrâo, anăp nao akŏ pơdong atur bruă mă amăng kơnuk kơna hơbôt hloh, samơ̆ mă bruă kơhnăk, thâo rơgơi, tŭ yua hloh.