Phara hăng tơlơi mơak kơdok kơdor kah hăng tơđar thun, anih juăt pla bơnga sĭ mơdrô bơyan têt kual Ngŏ tơring čar Dak Lak hơdôm hrơi hăng anai kret kruai hloh, yua tơdơi kơ hơmâo tơlơi truh lŏn adai ngă, kơthel 13 hlim hơjan ia ling dăo plah wah blan 11/2025 laih rơgao. Samơ̆ amăng djop anih ngă hmua pla bơnga mơnuih ƀôn sang ăt dik dăk mă bruă pla bơnga kah hăng bơkơtưn kiăo tui hrơi mông. Hơdôm blah đang hmua pla bơnga kuk bơrơbuh hĭ dưi rŭ đĭ, pơdong glăi hăng jăng gai ale djrao, phun bơnga djai laih, rơmet hĭ, pla glăi phun phrâo hlăk bluh đĭ čơnuh bơnga hiam dŏ glăi amăng ƀưh. Anai lĕ hrơi blan pơsit kiăng ngă pơhiam phun bơnga ba nao pơ anih sĭ mơdrô bơnga mơak čơkă ngă yang thun phrâo Tết Nguyên đán Bính Ngọ 2026.

Tơlơi tơnap tap prong hloh mơ̆ng mơnuih ƀôn sang ngă hmua mông anai, prăk kăk tuh pơ alin ba pla hăng ba hyu sĭ mơdrô. Tơdơi kơ bơyan ia ling dăo ngă, prăk tuh pơ alin blơi hơbâo pruai kmơ̆k dưm kơ phun bơnga, ia jrao pruih pơgang hlăt arong aruač hăng hrơi apah mă bruă lêng kơ đĭ hăng pơmă hloh, jai pơhrua tui tơlơi kơtrâ̆o kơ mơnuih ƀôn sang lơ̆m, rơnoh prăk tuh pơ alin abih kơ bơyan pla bơnga. Yă Nguyễn Thị Liên, phường Bình Kiến brơi thâo:

“Khom ngă glăi kah hăng mơ̆ng blung a mơtam, rŭ glăi, pla pơjing, pruih ia jrao, pruai kmơ̆k dưm hơbâo, tuh pơ alin glăi huăč prăk kăk biă mă. Čang rơmang djơ̆ bơyan kiăng hơmâo pơhrui glăi ƀiă yua kơ tal anai tuh pơplai lu prăk kăk đơi”.

Ƀơi đang sang, bruă wai lăng đang bơnga yak nao amăng črăn phun yom hloh: Pleh hĭ čơnuh bơnga añĕ ƀu tŭ yua laih anun pleh hĭ čơnuh tơdŭ čăt rơbêh, kiăng pơkă hrơi brơi čuh blang bơnga prong. Yua bruă mă lu laih anun kơđiăng biă mă djơ̆ hơdră, lu sang anŏ mơnuih ƀôn sang khom apah mơnuih mă bruă, anun yơh prăk pơplai jai lu hloh. Yă  Huỳnh Thị Nho lăi:

“Črăn anai jing hlăk ming pơkra ƀư̆ phun brơi bơnga čuh blang djơ̆ lăp, pruih ia hăng kmơ̆k hơbâo pruai brơi hiam. Tơdơi kơ tal kơthel ngă, bruă wai lăng răk rem tơnap biă mă, angin rơbŭ ngă răm lu, pran jua mă bruă đĭ lu hloh mơ̆n. Bruă pla bơnga kơnong čang rơmang dưi sĭ tloh, đah mơ̆ng hơmâo mă glăi ƀiă thâo”.

Tui hăng rơnoh jŭ yap jăng jai, phường Bình Kiến hơmâo rơbêh 50 hakter đang hmua pla bơnga djop mơta. Ră anai, năng ai 50% rơnoh đang bơnga bơbeč djơ̆ sat, samơ̆ hơmâo arăng rơkâo blơi tañ. Hơdôm đang dŏ glăi, mơnuih ƀôn sang pô hmua ăt hlăk dŏ wai lăng, pơgang tong ten, kiăng krăp hmư̆ lăng rơnoh sĭ mơdrô amăng anih anom mơdrô kiăng thâo ten. Yă Nguyễn Thị Hiển, brơi thâo:

“Ƀing hyu blơi rơkâo blơi laih hăng rơnoh gơñu kiăng, tơña na nao đôč. Ră anai đang bơnga ƀiă či giong laih, tơguan čuh blang đôč arăng amra pơsit yơh blơi hă ƀô̆”.

Pioh gum hrŏm mơnuih ƀôn sang, gong gai kơnuk kơna hơmâo dăp brơi hơdră, hyu ĕp anih anom sĭ mơdrô, djru arăng blơi tŭ kiăng plai ƀiă lui soh sel kơ mơnuih ƀôn sang tơdơi kơ sa thun tơlơi truh lŏn adai ngă răm ƀăm lu. Ơi Lương Thảo Nguyên, Kơ-iăng khua Jơnum min mơnuih ƀôn sang phường Bình Kiến, tơring čar Dak Lak brơi thâo, phường gơñu hlăk gir ngă hrŏm pioh hơduah ĕp anih ba sĭ mơdrô hơđong, djru mơnuih ngă hmua pla bơnga hơđong ƀiă pran jua amăng hrơi blan či truh bơyan sĭ mơdrô bơnga têt.

“Jơnum min mơnuih ƀôn sang phường hơmâo akŏ bruă pơphun brơi dăp  jơlan dưm bơnga ƀơi jơlan ¼, pok anih brơi pơdă bơnga sĭ, ngă hrŏm pơhrôp anih anom hiam anet pơjing anih pơhưč sĭ mơdrô, djru mơnuih ƀôn sang sĭ bơnga hăng ƀing blơi bơnga gêh găl hloh amăng bơyan čơkă ngă yang thun phrâo ƀong têt”.

Mah dŏ ƀơi anăp lu tơlơi pơblih ayuh hyiăng lŏn adai ngă hăng prăk tuh pơ alin lu, samơ̆ hăng pran jua mă bruă, khom thâo prăp lui hlâo, rŭ pơdong, pơsir glăi, mơnuih ƀôn sang ngă hmua, pla bơnga ƀơi Bình Kiến hlăk gir run abih pran jua kiăng kơ hơmâo bơyan bơnga hiam thun anai, sĭ mơdrô tŭ yua hloh.