Pơhiăp ƀơi mông jơnum, Khua dêh čar ơi Phạm Minh Chính lăi rơđah pran jua pok pơhai ngă tañ Tơlơi pơtrun Ping gah dêh čar tal 14, yua hnun kiăng pơphun jơnum hlao mơtăm kiăng ba tơlơi pơtrun mut amăng tơlơi hơdip.

Khua dêh čar lăi, hơdôm boh than ba glăi amăng rơwang bruă rơgao jing tơlơi pơtrut yom biă kơ bruă bơkơtưn apah bơni phrâo kơ rơwang bruă anai, hăng kiăng pơƀut amăng 9 jơlan ngă bruă prong kơ bơkơtưn apah bơni kah hăng Khua git gai Ping gah ơi Tô Lâm hơmâo lăi amăng mông Jơnum bơkơtưn khăp kơ lŏn ia tal 11 kah hăng: pơƀut pơplih pơčeh rơgơi, đĭ kyar bơwih ƀong huă mơnuih mơnam, ngă kjăp bruă pơgang lŏn ia - rơnuk rơnua, gru grua hăng akŏ pơdong anom bruă čar kjăp kơtang kiăng ba lŏn ia ta yak đĭ amăng rơnuk phrâo, đĭ kyar pơdrong sah, hơmâo kơdrưh, thâo rơgơi. Tui anun, kiăng čih pơkra akŏ bruă, jao bruă rơđah rơđông kơ rim anom bruă, đah mơ̆ng pok pơhai bơkơtưn ngă bruă. Khua dêh čar kiăng čih pơkra boh tơhnal hơmâo amăng lăm, tơlơi pơmin kjăp khŏp, bruă mă či pok pơhai bơkơtưn pơčeh phrâo hăng mă yua boh thâo mrô.