Ƀơi pơsat rơgŏm ơi Trần Phú, Khua git gai Ping gah blung a mơ̆ng Ping gah cộng sản Việt Nam, Khua git gai Ping gah ơi Tô Lâm pơpŭ bơni abih pran jua hăng hơdôm tơlơi gum djru, pran jua gum pơgôp prong prin mơ̆ng rơgŏm ơi Trần Phú hăng bruă ngă hơkrŭ hing ang mơ̆ng Ping gah, mơ̆ng djuai ania Việt Nam.

Kơnuih mơnuih ngă hơkrŭ, kơnuih tơhan khin hơtai sông kơtang hiam, kjăp pran jua, ƀu hŭi kơ ayăt mơ̆ng rơgŏm ơi Trần Phú bang bơngač na nao, kiăng djŏp rơnuk khua mua, mơnuih ping gah hăng abih bang mơnuih ƀôn sang hrăm tui, hla tui. Tŏ tui, ƀơi Anih gru phun dêh čar yom Ngã ba Đồng Lộc, Khua git gai Ping gah ơi Tô Lâm hăng khul khua nao čuh ñang, dưm bơnga ƀơi Gong kut čih anăn tơhan djai pơsăn drơi jing ƀing hlăk ai kơsung blah hăng pơsat 10 čô đah kơmơi glăk thun hlăk ai djai pơsăn drơi ƀơi Ngã ba Đồng Lộc. Tơlơi djai rơngiă mơ̆ng ƀing đah kơmơi ngă tơhan jing gru pơ ala brơi tơlơi gum djru tuh rơyuh pran jua mơ̆ng hơdôm klăk čô hlăk ai yua kơ lŏn ia wơr drơi pô, ƀu rơngôt kơ thun glăk tơdăm dra yua kơ bruă pơklaih rơngai djuai ania, pơlir lŏn ia ta.