Ră anai, rim hrơi, anih tuai čuă ngui Bàu Trắng U hăng ME, să Hòa Thắng, tơring čar Lâm Đồng hơmâo čơkă mơ̆ng 3000-4000 wơ̆t tuai nao ĕp lăng, čuă ngui, čơphil rup hăng dŏ glăi ngui mơak ƀơi kơdư lŏn čuah kô̆ tơbung rơbêh 2 ha. Ơi Nguyễn Văn Hùng Khua git gai anih tuai čuă ngui anun brơi thâo, mơ̆ng hrơi pơmut glăi tơring čar truh ră anai, rơnoh tuai mut tơbiă hyu ngui ngor ĕp lăng năng ai 20%, amra lu tui hloh tơdah dưi pơtruh nao rai dua tơring čư̆ siăng hăng hang ia rơsĭ, đĭ nao pơ hmua đang bơnga Đà Lạt:

“Dơ̆ng mơ̆ng hrơi pơmut hrŏm tơring čar truh ră anai, hơmâo anŏ mut hrŏm lŏn glai čư̆ siăng hăng ia rơsĭ hơmâo lŏn thar čuah kô̆ anun sa khul, bruă mă hrŏm prong, hơdai gum hrŏm ba tuai hyu ĕp lăng, gêh găl nao rai mơ̆ng čư̆ siăng trun pơ ia rơsĭ, đĭ nao pơ lŏn đang bơnga hiam. Ƀuh rơđah, kông ty hơmâo anăp nao bruă ngă hrŏm, pơtruh nao rai plah wah lu sang bruă, pô đang hmua, ba tuai hyu ngui, biă mă anom bruă apah prăk pơgiăng hyu tuai, dăp jơlan hơdră ngă hrŏm hruaih akŏ klôn, sit truh pơ Đà Lạt, hyu ngui hrăp pơ čư̆ siăng, trun nao pơ ia rơsĭ dơ̆ng pơblih anih hyu ngui, pơhưč pran jua ƀing tuai”.

Đơ đam tơring  čar hơmâo rơbêh 4.200 boh anih tuai jưh, dŏ glăi hyu ngui, giăm 1.400 boh sang jưh tuai hnơ̆ng pơkă hiam mơ̆ng 1 asar pơtŭ truh 5 asar pơtŭ, dưi djop čơkă truh 48 klăk wơ̆t tuai dŏ glăi rim thun. Kơnong amăng thun 2025 anai, tơring čar pơkă tơhnal čơkă 23 klăk wơ̆t tuai. Tui hăng nai prin tha TS Phan Bảo Giangm Kơ-iăng khua sang hră ngă rah khua anom bruă pơtô Marketing sang hră gưl prong Bơwih ƀong prăk kăk ƀôn prong Hồ Chí Minh, mơ̆ng thun 2025-2030, lơ̆m čih pơmut hăng mrô anăn djop anih či ba nao tuai hyu ngui, hơdră mă bruă mơ̆ng tơring čar či phara mơ̆n, laih dơ̆ng dưi pơtruh nao rai klă hăng djop sang bruă, anih tuai čuă ngui amăng Lâm Đồng amra jing tơmeh phun kơ tơlơi bơwih ƀong huă jing sit nik yơh:

“Ƀing ta kiăng kač ling rup phrâo lơkak, pơčrâo anih kơ tuai thâo djop anom či nao ngui ƀơi Lâm Đồng phrâo. Ƀing ta ƀuh rơđah lĕ, rim boh plơi pla mơ̆ng Dak Nông, Lâm Đồng truh pơ Bình Thuận hơđăp lêng kơ hơmâo style anŏ hiam phara soh anun sa amăng tơlơi kiăng ngă prong hloh khom hơmâo tơlơi bơ tŭ ư sa pran jua, gum tơlơi pơmin ngă bruă, sit mơ̆n kâo đăo ten lĕ djop tơlơi gun gan tơnap tap pơ anăp amra găn rơgao abih”.

Tui hăng hră pơtrun lăi pơthâo amăng mông jơnum ruah khua ping gah tơring čar Lâm Đồng tal I rơwang bruă thun 2025-2030, Bruă tuai čuă ngui sa amăng klâo tơmeh phun tơlơi bơwih ƀong huă yom ƀơi tơring  čar, hrŏm hăng bruă ngă hmua pla pơjing ba yua boh thâo ia rơgơi phrâo hăng bruă tuh tia pơkra ming-man pơdong tui hơdră phrâo ia rơgơi. Amăng thun blan, tơlơi pơhno amăng bruă mă kơtang, Lâm Đồng đing nao čih anăn, pơkra ming gơnam sĭ mơdrô tuai čuă ngui phara hơjăn, pơtrut bruă yua boh thâo ia rơgơi mrô pôr pơthâo hăng wai lăng, laih dơ̆ng kơtưn ngă hrŏm kơnuk kơna hăng mơnuih ƀôn sang kiăng pơhưč tuh pơ alin, pơđĭ kyar hơđong kơjăp anom bruă tuh tia pơkra ming ƀu hơmâo asăp. Ơi Nguyễn Văn Lộc, Khua Gơnong bruă Boh thâo, Pơrơguăt drơi jăn hăng Tuai čuă ngui tơring čar Lâm Đồng lăi lĕ, tơlơi yom hloh khom hơmâo tơlơi gum hrŏm mơ̆ng ƀing ngă bruă mơdrô. Tơdah pơphun bruă tuai čuă ngui mơ̆ ƀu hơmâo ƀing ngă bruă mơdrô sit mơ̆n amra ƀu anăm ngă ôh:

“Sa tơlơi pơsit yom anun lĕ bruă ngă hrŏm hơmâo sang bruă mơdrô. Tơdah ta ngă bruă ba tuai hyu ngui ƀu hơmâo anŏ gum hrŏm mơ̆ng sang bruă mơdrô sit mơ̆n ƀu anăm ngă ôh. Anom bruă gru grua pơrơguăt drơi jăn hăng tuai čuă ngui gơmơi ƀuăn amra ngă hrŏm bruă tuai čuă ngui, hơmâo tơlơi djru mơ̆ng sang bruă mơdrô yak nao hrŏm. Lu anom bruă mơdrô djru ba tơring čar amăng bruă akŏ pơdong, pơjing rai rup rap mơ̆ng sa boh anih tuai čuă ngui ƀơi Lâm Đồng phrâo”.

Anăp nao tơhnal pơkă pơđĭ kyar bruă tuai čuă ngui tŭ yua hiam, tơring čar Lâm Đồng hlăk pơtum tuh pơ alin, man pơdong djop anih tuai či nao ngui gưl dêh čar hăng jar kmar kah hăng dơnao Tuyền Lâm, Mũi Né, Tà Dung, lir hơbit hăng gơnam sĭ mơdrô yom phara; bruă tuai čuă ngui hyu lăng amăng glai klô, pơdơi pơdă, đĭ čư̆ siăng rơjang drơi jăn, hyu amăng anih lông pran jua tơlơi khin hơtai, čuă ngui plơi pla, adoh suang, atông čing hơgor, wai lăng tơlơi suaih pral hăng găn rơgao ĕp lăng tơlơi juăt amăng kual plơi pla tơring čar. Ơi Hồ Văn Mười, Kơ-iăng khua git gai ping gah, Khua Jơnum min mơnuih ƀôn sang tơring čar Lâm Đồng, brơi thâo, Lâm Đồng jing anom hyu ngui tŭ yua hiam, sa tơlơi yom hloh lĕ kiăng râo pơdưh tơlơi gêh găl amăng klâo boh kual “đang bơnga, glai klô hăng ia rơsĭ”:

“Anŏ gêh găl mơ̆ng ƀing ta prong biă mă lăng nao pơ anăp. Tơlơi pơmin pơƀuh hlâo yom biă mă, pơblih kơtang, pơčeh phrâo, anun lĕ hơmâo anih anom đang bơnga prong, kual glai klô hăng ia rơsĭ prong kah hăng pơtâo kan klâo ƀĕ tơkai, amra kơjăp samơ̆ aka ƀu bơkơnar ôh. Kiăng kơ tuai nao ĕp lăng, hyu čuă jơmư, pơhưč pran jua, tơhnal pơkă khom pơhlom pơgang tơlơi rơnuk rơnua. Khom pơkra ming hơmâo jơlan hiam rô nao rai klă, laih anun pơgang tơlơi suaih pral kơ ƀing tuai rơnguai. Rim čô mơnuih ƀôn sang lĕ kah hăng pô pơtô ba anih hyu ngui, lăi pơthâo gru grua đưm djuai ania, plơi pla anih tuai čuă ngui. Djop anih tuai hyu ngui, khom čơkă jum hăng tơlơi mơak, pĕ tlao rơhmač hăng tuai jing hĭ tơlơi hiam amăng tơlơi hơdip mơda gru grua”.

Hăng anŏ lăng nao pơ anăp adih, yom hloh, khut khăt pơsit bruă ngă mơ̆ng gong gai kơnuk kơna laih anun hơmâo tơlơi gum hrŏm mơ̆ng sang bruă mơdrô laih anun mơnuih ƀôn sang, tơring čar Lâm Đồng hlăk ngă tui tum teč tơlơi či kiăng prong, jing anih anom phun tuai čuă ngui hiam klă, tŭ yua, gơgrong kơjăp bruă pơtrut tơlơi pơđĭ kyar bơwih ƀong huă mơnuih mơnam amăng kual Dap Kơdư hăng amăng lŏn ia ta. Bruă tuai čuă ngui ƀơi Lâm Đồng-mơ̆ng tơlơi gêh găl, anŏ hơmâo laih hlâo truh kơ bruă či ngă tui tum teč anŏ kiăng pơđĭ kyar glăk amăng yak rơbat nao pơ anăp adih, jơlan phrâo kơ sa bruă mă phrâo mơ̆n.