Nao pơ akŏ plơi Canh Tiến, să Canh Vinh, tơring čar Gia Lai, hmư̆ ok or tơlơi adih ƀing čơđai sang hră gưl muai hlăk tơ-ua đĭ amăng kual čư̆ siăng glai klô. Amăng anih hrăm hơmâo 32 čô čơđai sang hră, ƀing čơđai hlăk adoh hăng suang tui er tơlơi adoh hơmâo pơdah thâo lăng amăng tivi, sang hră phrâo blơi. Jua adoh, gông brô̆ hăng tơlơi tlao mơak mut tơma hrŏm ok or nai hăng ƀing čơđai sang hră, ƀuh suh mơak biă mă. Adơi Đinh Thị An, hơ̆k mơak lăi:

“Hlâo adih nao hrăm hră aka ƀu hơmâo apui lơtrik ôh, phrâo anai hơmâo apui lơtrik laih, hơmâo măi pưh hô̆ wơ̆t hăng tivi dơ̆ng, kâo ƀuh hrăm hră mơak, amuñ thâo hluh tơlơi nai pơtô, adai pơ-iă hơmâo măi pưh hô̆, rơ-ơ̆ biă mă”.

Dua thun laih dŏ pơtô ƀơi sang hră kual ataih Canh Tiến, nai Nguyễn Thị Mỹ Trinh, 28 thun, ră anai ăt dŏ hling hlang mơ̆n, dlưh pran jua hơ̆k mơak yua ƀuh lu tơlơi pơblih phrâo. Hlâo kơ anun, kŏn sui lơi, anih anai kơƀah djop mơta, lăng črăn hơdră tơlơi adoh suang amăng tivi hă sa tơlơi ñu ƀu khin pơmin nao ôh. Nai Trinh, abih 2 thun, rim hrơi nao pơ anih hrăm, kah hăng sa tơlơi lông lăng prong biă mă kơ ñu. Jơlan găn rơgao 20 km mơ̆ng sang ñu, truh pơ sang hră či kơdư čư̆, jơlan nao rai hlŭ, lŏn tơdlut, tơbor, bơyan hơjan sit găn ia krông lĕ khom apah đĭ rơkĭ, jơlan nao rai wer ataih biă mă, sui mông kah mơ̆ng truh. Samơ̆ ră anai, rim hrơi nao pơ sang hră, ñu ƀuh pran jua mơak yua jơlan nao rai hiam klă gêh găl.

“Lơ̆m hơmâo jơlan hiam klă, amuñ yơh rô nao rai, gơnam yua mă bruă hăng sang hră ming pơkra pik ia iom hiam rô̆ lơ̆m hơmâo apui lơtrik djru kơ nai pơtô hăng čơđai sang hră gưl muai dưi hơmâo tivi ĕp lăng, adoh tui hăng ĕp lu jơlan hơdră hiam klă mơak hloh, djru ƀing nai pơtô klă hloh mơ̆n”.

Ƀu kơnong kơ nai pơtô mơ̆ng anih pơkŏn nao đôč ôh, lu mơnuih prô̆ tơdăm prăm dra ƀa tơsâo mơ̆ng kual lŏn ƀun rin Canh Tiến ăt ruah mă, glăi djru plơi pla kiăng pơblih phrâo. Nai neh Đinh Thị Trang, 22 thun, phrâo hrăm giong sang hră hrăm ngă nai pơtô čih hră rơkâo glăi mă bruă pơ plơi pla. Ră anai, tơdơi kơ 2 blan mă bruă, ñu ngă nai pô wai lăng anih 2C, sang hră amăng plơi Canh Tiến, nai Trang hơmâo ƀuh mơ̆n tơlơi pơblih phrâo amăng plơi pla gơñu, yua hơmâo tơlơi gêh găl pơtô hrăm, ba yua gơnam phrâo hloh pơkă hăng hơdôm thun hlâo adih:

“Pơkă hăng hơdôm thun hlâo, thun anai hơmâo tơlơi đing nao mơ̆ng sang să, djru man pơdong, ming pơkra glăi sang hră, blơi gơnam yua hrăm hră hăng pơtô čơđai sang hră, anun ƀing čơđai sang hră tañ thâo laih anun dưi mă yua gơnam hrăm hră phrâo hnang blung ƀing čơđai dŏ sư̆ rơbư̆ samơ̆ giong anun juăt tui. Jing nai pơtô gir pơtô tui ƀơƀrư̆ kơ ƀing čơđai laih anun pioh lu mông đing nao kơ ƀing čơđai  hloh, pơtô tum teč djop djel hăng pơčrâo ba kơ rim čô lu hloh mơ̆ng anun ƀing čơđai hơmâo atur tơlơi thâo pioh kiăo tui tơlơi hrăm hmao kru hăng thâo hluh tañ”.

Čơđai sang hră mơak, nai pơtô ăt hơ̆k mơak hrŏm mơ̆n kơ djop mơta tơlơi pơblih phrâo ƀơi plơi pla Canh Tiến, să Canh Vinh, tơring čar Gia Lai. Samơ̆ mơak hloh dơ̆ng lĕ, ƀing amĭ ama čơđai sang hră, yua kơ anŏ gêh găl hơmâo gơnam djă ngui, ba yua hrăm hră mơ̆ng khul ană bă gơñu djop laih, gơñu hơđong yơh pran jua mă bruă ngă hmua pla pơjing. Amai Đinh Thị Yến, hơmâo ană  dŏ hrăm ƀơi sang hră gưl sa Canh Tiến, kah pơpha:

“Pơkă hăng hlâo adih ră anai, sang hră, gơnam yua hơmâo pơblih laih, sang hră, amăng jang war pơga  jum dar sir krep, amăng sang hră lĕ wơ̆t hơmâo tivi, nai pơtô pok brơi ƀing čơđai sang hră ĕp lu jơlan hơdră phrâo, anun hrăm tañ thâo. Ƀuh mô̆ anet hrăm thâo hloh kơ hlâo, mô̆ ñu glăi pơ sang ñu thâo adoh, suang kơdưt mơak biă, pơđok tơlơi pơtưh thâo hluh lu hloh hăng hlâo kơ anun”.

Tui hăng ơi Dương Hiệp Hòa, Khua Jơnum min mơnuih ƀôn sang să Canh Vinh, să hơmâo tuh pơ alin 300 klăk prăk kơ dua boh sang hră amăng plơi, sang hră gưl muai laih anun sang hră gưl sa hăng man phrâo 5 boh anih hrăm, djru pơblih klă hloh kơ bruă pơtô hăng hrăm.

“Hăng pran jua kiăng bơwih brơi kơ mơnuih ƀôn sang, ƀing nai pơtô hrăm hră pơ anai gir dŏ glăi mă bruă ƀơi sang hră kual ataih čư̆ siăng tơnap tap, hơmâo jơlan hơdră pơtô hrăm djơ̆ lăp, tui tơlơi phiăn pơkă. Čơđai sang hră ƀơi Canh Tiến hơ̆k mơak biă mă, boh nik ñu thun phrâo rơgao, ƀing čơđai thun blung a tŭ mă tơlơi mơak mut thun hrăm phrâo, hlâo kơ anun, ƀu hơmâo jơnum ngă yang mut thun hrăm phrâo ôh, anun kơƀah biă mă, ƀing nai pơtô gir run abih pran jua yua kơ ƀuh lu tơlơi kơƀah, pap drap kơ ƀing čơđai sang hră, gơñu gir run pơ ala glăi hăng bruă ngă hiam, khăp pap. Pơ anăp anai, să rơkâo pok prong tui, blơi gơnam, ming pơkra sang hră kiăng hơmâo anih hrăm hiam klă, djru  ba djop anŏ či kiăng gêh găl brơi bruă pơtô hăng hrăm”.

Lơ̆m ƀơi kual čư̆ siăng glai klô, đĭ kơdư trun dơnung lăng hyu hñơr hñip kơ kyâo pơtâo, glai klô jum dar, hơdôm anih hrăm ăt bang bơngač apui yua ƀơi Canh Tiến ră anai ƀu kơnong hơjăn tơlơi mơak kơ ƀing čơđai đôč ôh, dŏ jing boh tơhnal mơ̆ng tơlơi gir run ƀu pơdơi ôh, mơ̆ng ƀing nai pơtô, mơ̆ng gong gai kơnuk kơna să, plơi pla. Canh Tiến ăt kah hăng lu kual ataih tơnap tap pơkŏn amăng tơring čar Gia Lai hlăk dưi hơmâo kơnuk kơna tuh pơ alin sa hnơ̆ng, djop anŏ gêh găl kiăng mut hrŏm anŏ pơđĭ kyar hrŏm amăng dêh čar ta, rơnuk hrưn đĭ phrâo ƀơi lŏn ia.