Dak Lăk glăk hơmâo năng ai 42.000 ha sâu riêng, hăng rơbêh 26.000ha hơmâo pĕ pơhrui laih, hơmâo rơbêh 440.000 tơn, samơ̆ anih pla hơmâo hră pơsit anih pla kơnong hơmâo 7.400 ha đôč. Yua hnun yơh lu gơnam aka ƀu dưi ba sĭ sit nik hơmâo hră pơ-ar, jing ngă nua gơnam rơgêh ƀiă mơn. Pô pơ ala mơ̆ng anom bruă tơjŭ pla hăng blơi sâu riêng amăng tơring lăi, tơlơi tơnap ƀu kơnong gah dêh čar blơi gơnam đôč ôh, ăt hơmâo mơ̆ng hơdră dêh čar ta ngă bruă dong: “Ƀơi Dap Kơdư, anih pla plah phun sâu riêng anai prong biă mă, samơ̆ ƀu hơmâo ôh hră pơkă mrô đang hmua, ƀu djơ̆ mơ̆ng čar Khač ƀu brơi ôh, yua ƀing ta aka ƀu thâo hluh tong ten, anun jing pơdơi hĭ. Bơ tui tơlơi pơtrun 2481, 2480 čih rơđah lĕ yua gah ƀing ta pơkra mă, lăi pơthâo glăi laih anun Anom bruă wai lăng sĭ mơdrô hăng čar rơngiao kĭ brơi kiăo tui hră ta pơdah thâo. Yua hnun, ră anai tơdah ƀu lăp djơ̆ lĕ Gơnong bruă hmua hăng ayuh hyiăng khŏm pơplih glăi lăp djơ̆”.

Hră pơkă mrô anih pla jing tơlơi kiăng blung a kiăng ĕp ƀuh, thâo rơđah anih pla, samơ̆ kiăng dưi ba sĭ pơ čar rơngiao hơđong, bruă wai lăng khŏm hơmâo ngă na nao amăng mông pơkra gơnam. Hơdôm anih blơi gơnam ră anai ƀu kơnong kiăng thâo rơđah gơnam hơmâo mơ̆ng pơpă đôč ôh, ăt kiăng thâo rơđah bruă tơjŭ pla, mă yua gơnam ngă hmua, pĕ pơhrui, pioh amăng hruh, jep amăng kơthung hăng pơgiăng hiư̆m pă. Ƀơi anăp tơlơi kiăng anai, Ding jum bruă hmua hăng ayuh hyiăng glăk pơkra anih čih pioh anih pơkra, bruă pơkra gơnam mơ̆ng hmua djơ̆ hrŏm đơ đam čar ta, măi anai brơi čih pioh djŏp tơlơi pơhing kơ anih pla, bruă pơkra gơnam truh kơ kah pơpha hyu sĭ. Lơ̆m rim lô gơnam hơmâo mut hrŏm hăng hră mrô, bruă pel ĕp, sem lăng hăng pơsit tơlơi gơgrong bruă amra tañ hloh, rơđah hloh pơhmu hăng hơdră wai lăng hlâo adih.

Ơi Lê Anh Trung, Khua khul ngă sâu riêng Dak Lăk brơi thâo, bruă hơdai ĕp ƀuh anih pơkra gơnam amăng điện tử djru wai lăng abih bang bruă pơkra gơnam mơtăm. Ră anai khul glăk ngă hrŏm hăng anom mơdrô pơphun ngă lăng hlâo, pơ anăp lĕ mă yua hlao plang anai: “Gơmơi ăt ruah mă hơdôm anom bơwih ƀong amra mă yua lăng. Blung a, kiăng sa anom bơwih ƀong ngă lăng hlâo, či pơplih glăi dong tơdah aka ƀu djơ̆, tơdơi kơ anun kah mơ̆ng mă yua djŏp anih. Sit hơdôm anom bruă anun hlâo adih gơñu ngă laih bruă pơtruh nao rai, yua hnun lơ̆m pok pơhai ngă jing ƀu djơ̆ bruă tơnap đơi ôh. Samnơ̆ bruă ƀing ta kiăng lĕ khŏm pơplih mơ̆ng ƀrư̆, lăp djơ̆ hăng bruă pơkra sâu riêng. Ñu phara mơn mơ̆ng bruă pla, truh kơ bruă blơi, truh kơ bruă pơkra hăng ba sĭ pơ čar rơngiao”.

Tui hăng yă Đặng Thị Thủy, Kơ-iăng khua Gơnong bruă hmua hăng ayuh hyiăng tơring čar Dak Lăk kiăng plang anai ñu mă bruă klă tŭ yua, tơlơi lông prong hloh ƀu djơ̆ boh thâo măi mok ôh, anun lĕ ta pơplih bruă ta juăt pơkra gơnam mơ̆ng hlâo. Mơnuih ngă hmua khŏm juăt hăng bruă čih pioh bruă ngă hmua amăng điện tử, djơ̆ tơlơi pơtô ba; anom bơwih ƀong khŏm tuh pơ alin hăng ngă rơđah hră pơ-ar; bơ gong gai pơtô ba, krăp lăng. Khă hnun, yă Thủy pơsit tơring glăk ngă hrŏm hăng hơdôm anom bruă bơdjơ̆ nao amăng bruă čih pioh hră pơ-ar tơlơi pơhing amăng plang đah mơ̆ng dưi ngă tui dưm kơnar, hơmâo ngă ƀơi djŏp anih:“Plang anai pơkă djơ̆ krĕp bruă pơkra gơna ăt kah hăng anih pla ră anai ta dŏ pơmin tơnap, ta ngă laih samơ̆ hơmâo mơn anŏ aka ƀu rơđah bơbeč djơ̆ mơn bruă ngă hmua sĭ mơdrô. Laih dong, plang điện tử djru pơđĭ tui anŏ klă, tơlơi hmư̆ ư hăng djơ̆ tui tơlơi kiăng ĕp ƀuh anih pơkra gơnam mơ̆ng dêh čar blơi, laih anun ƀơ ƀrư̆ akŏ pơjing anăn hmư̆ hing sâu riêng Dak Lăk lăi hrŏm hăng Việt Nam glăk đĭ kyar hơđong”.

Ơi Nguyễn Văn Long, Khua anom bruă boh thâo ia rơgơi, Ding jum bruă hmua hăng ayuh hyiăng brơi thâo, plang ĕp ƀuh anih pla pơkra gơnam glăk hơmâo ngă lăng hăng bruă pơkra sâu riêng hlâo či mă yua djŏp mơ̆ng lơ 1/7/2026. Anai hơmâo lăng jing pơplih mơ̆ng wai lăng tui đưm jing wai lăng tui plang mrô, yom biă kiăng dưi pơhno gơnam mơ̆ng Việt Nam: “Gơmơi čang rơmang plang ĕp ƀuh anih pơkra gơnam ƀu kơnong djru wai lăng đôč ôh, sit jing plang gêh găl, klă, ba glăi anŏ yom kơ anom bơwih ƀong laih anun mơnuih ngă hmua, djru pơđĭ tui anŏ kơdrưh, hmư̆ ư mơ̆ng sâu riêng Việt Nam ƀơi jar kmar”.

Mơ̆ng tơlơi tơnap brơi hră čih mrô anih pla truh kơ bruă kiăng wai lăng anŏ klă gơnam tam jai hrơi kjăp tui, bruă pla sâu riêng Dak Lăk glăk pơplih prong. Lơ̆m măi djă pioh anih pla, pơkra gơnam hơmâo ngă abih bang, rim mơta gơnam amra hơmâo hră pơ-ar rơđah rơđông. Anai jing phun atur kiăng pơsit anŏ klă, pơđĭ tui tơlơi kơdrưh, hmư̆ ư laih anun akŏ pơjing anăn sâu riêng Dak Lăk lăi hơjăn hăng sâu riêng Việt Nam hnun mơn ƀơi jar kmar./.