Hăng akŏ pia “Pơtrut ngă hrŏm bơwih ƀong huă, pok pơhư prong anŏ gêh găl tuh pơ alin dua bơnah”, jơnum pơčrong sai anai, hơmâo 400 boh sang bruă mơdrô dua boh dêh čar, pơtum pơčrong sai nao kơ bruă kphun : boh thâo ia rơgơi pơkra ming mơnong ƀong huă hăng ia mơñum & ICT, boh thâo ia rơgơi pơgang anŏ mơtah mơda, apui yua pơkra ming glăi, bruă dăng kông, man pơdong, bruă tuh tia pơkra pơjing măi mok pơdjơ̆ nao pơsơi pơsă, prăk kăk, bruă pơkra ming gơnam yua gah ling tơhan, ia jrao, pơkra ia jrao, pơgang rơnuk rơnua tơlơi pơhing plang internet, bruă pơhlom nua gơnam sĭ mơdrô hăng tač rơngiao, bơwih bơwăng djru ba tơlơi phiăn….

Đĭ pơhiăp ƀơi mông jơnum, Khua dêh čar Slovakia lăi pơtong, tơlơi rô nao rai dua bơnah dêh čar dưi akŏ pơdong tui atur ngă hrŏm sui thun laih, laih anun boh tơhnal anăp nao tal rai čuă jơmư anai kiăng bơtŭ ư hrŏm rơđah rơđong hloh, pơđĭ tui bruă ngă giăng mah yom phara. Khua dêh čar Slovakia, ơi Robert Fico lăi pơtong, Việt Nam lĕ bơnah ngă hrŏm sĭ mơdrô prong hloh mơ̆ng Slovakia ƀơi kual Đông Nam Á (Dơnung ngŏ ASIA). Slovakia čang rơmang kơtưn bruă sĭ mơdrô hăng pok pơhai ngă tui rơđah rơđong tum teč hloh ƀơi Việt Nam, boh nik ñu amăng bruă kơtưn sĭ mơdrô kah hăng gah bruă pơkra ming pơgang lŏn ia, tuh tia pơkra ming măi mok, pơgang rơnuk rơnua tơlơi pơhing, tuh tia pơkra rơdêh ôtô hăng bruă ia jrao. Ƀơi mông jơnum, Khua dêh čar ơi Lê Minh Hưng brơi thâo, ƀrô djơ̆ tal rai čuă jơmư Việt Nam tal anai, dua čô khua dêh čar pơsit tơlơi pôr hrŏm kơ bruă pơđĭ tui bruă rô nao rai dlông hloh Việt Nam-Slovakia; mơ̆ng anun, ba Việt Nam jing lŏn ia blung a ƀơi kual Ngŏ Dơnung ASIA ngă gơyut gơyâo giăng mah tong ten hloh hăng Slovakia; pơtruh brơi tơlơi kiăng kơtang hloh kơ bruă ngă khut khăt mơ̆ng dua bơnah, kiăng ngă kơtang hloh pok prong anih mă bruă phrâo, pioh kơ dua bơnah dêh čar hrŏm hơbit yak na amăng črăn phrâo dlông tui, kơdrưh ang hăng prong hloh.