Tui tơlơi čih mơng anom mă tơlơi pơhing dêh čar Malaysia-BERNAMA, hrơi plĕ hră pơphun lơm Việt Nam glăk pơtrut kơtang bruă ngă pơgiong hơdôm hơdră djru brơi hơnong pơkă yôm phăn pơđĭ kyar sui pơ anăp. Anom mă tơlơi pơhing čih, tal plĕ hră anai ƀu djơ̆ kơnong lĕ hrơi kiăng mơnuih ƀôn sang đơ đam dêh čar ngă tui tơlơi glăm ba mơng ƀing gơñu, ruah khua mua pơ ala brơi tơlơi kiăng, tơlơi čang rơmang mơng mơnuih ƀôn sang amăng Ƀirô Khua pơ ala mơnuih ƀôn sang dêh čar hăng Jơnum min pơ ala mơnuih ƀôn sang djop gưl rơwang phrâo đôč ôh mơ̆ ăt lĕ tơlơi yak nao pok pơhai tong ten tơlơi pơtrun mơng Jơnum tal XIV mơng Ping gah Cộng sản Việt Nam, pơlir hăng bruă ruah mơnuih apăn bruă hăng tơlơi glăm ba mơng djop gưl, djop gơnong bruă.

Ƀơi dêh čar Khač, anom mă tơlơi pơhing Tân Hoa Xã lăi pơtong tơlơi yôm hăng bruă pơphun plĕ hră, brơi thâo hơmâo giăm 79 klăk čô mơnuih ƀôn sang Việt Nam nao plĕ hră kiăng kơ ruah 500 čô Khua pơ ala mơnuih ƀôn sang dêh čar tal XVI, laih dong ruah khua mua Jơnum min pơ ala mơnuih ƀôn sang djop gưl rơwang ngă bruă phrâo. Ăt tui anun, hră pơhing Nikkei Asia mơng Japan ăt lăng tal plĕ hră anai lĕ hrơi mông kiăng mơnuih ƀôn sang nao ruah ƀing khua mua amra pơ ala brơi boh pơhiăp hăng tơlơi čang rơmang mơng mơnuih ƀôn sang.