Rơwang tal I/2026, djop gưl Ping gah ƀơi Dak Lak hơmâo pok pơhai ha amăng plĕ bruă jao pơđĭ kyar bơwih ƀong huă-mơnuih mơnam, pơhlôm wai pơgang rơnuk rơnua, hơđong, pơjing anih anom kơđi čar. Ping gah tơring čar hơmâo ba tơbiă jơlan hơdră bruă mă ngă tui tơlơi pơtrun mơng gơnong glông hăng hơnong pơkă pơđĭ kyar rơwang thun 2026-2030, ngă atur kiăng hơdôm anih anom ngă tui hăng hơdôm akŏ bruă sit nik. Bruă pơjing Ping gah, dưm dăp mơnuih apăn bruă, pel ĕp, krăo lăng, pơtô ba mơnuih ƀôn sang, pơplih ngă hră pơ-ar hơmâo ngă ha amăng plĕ; bruă djru brơi mơnuih mơnam ngă klă hăng bruă bơwih brơi tê̆t hăng prap lui hrơi plĕ hră ruah khua mua.

Pơđut mông jơnum, Kơ-iăng Khua git gai Ping gah tơring čar Dak Lak, yă Cao Thị Hòa An rơkâo djop gưl Ping gah ječ ameč dưm dăp anih anom, mơnuih apăn bruă tơdơi kơ hrơi plĕ hră, anăm brơi gun găn amăng bruă mă; đing nao djop ngăn rơnoh pơđĭ kyar, lăng boh than ba glăi ngă hơnong pơkă brơi bruă mă mơng ƀing apăn bruă. Hrŏm hăng anun, pơtrut tañ bruă jao prăk tuh pơ alin man pơdong, pơsir hĭ tơlơi gun, pơđut hĭ bruă hơdôm akŏ bruă man pơdong kraih ngă; hruă kjăp bruă mă, hrưn đĭ ngă klă amăng bruă mă, pơtrut pơplih ngă hră pơ-ar, pơplih mrô; pơhlôm hơđong mơng ƀon lan. Sit biă ñu, tơring čar Dak Lak rơkâo đing nao ngă tui hăng pok pơhai khut khăt 9 tơlơi pơtrun akŏ phun mơng Ding jum kơđi čar, ngă atur brơi pơđĭ kyar tañ, hơđong kjăp amăng rơwang pơ anăp.