Pơhiăp ƀơi mông jơnum, Khua git gai ping gah lăi nao 6 mơta bruă či ngă pơ anăp adih, bruă prong mơ̆ Khul git gai hăng djop ding jum, anom bruă wơ̆t hăng djop tơring čar khom ngă tui, amăng anun, pơtong rơđah bruă či ngă, tơhnal pơkă pơđĭ kyar boh thâo ia rơgơi phrâo, lir hơbit bruă pơđĭ kyar dêh čar, boh tŭ yua sui thun kơ lŏn ia.

Khua git gai ping gah pơtrun hiăp, pơblih phrâo kơtang hơbô̆ bruă ngă tui; pơtong rơđah bruă glam ba, tơlơi gơgrong mơ̆ng pô ngă khua; laih dơ̆ng, pơtrut ngă tui anih anom hơmâo pơphun bruă pơblih pơčeh phrâo ia rơgơi, djru kơ sang bruă mơdrô pơphun bruă mă hăng tơlơi pơčeh phrâo; hơdôm sang bruă mơdrô ba yua boh thâo ia rơgơi phrâo; akŏ pơjing anih anom pơtruh nao rai tơlơi pơčeh phrâo, ia rơgơi dưi djop, kơtang, hmar, beč bal pioh pơtruh nao rai bruă kơsem min anăp nao pơ anih anom sĭ mơdrô. Hrŏm hăng tơlơi kiăng anun, khom jŭ yap, ĕp glăi tong ten, ming pơkra glăi, dăp jơlan hơdră pơtô hrăm mơnuih mă bruă thâo rơgơi, djơ̆ hăng bruă mă phrâo. Khua git gai ping gah dêh čar lăi pơtong, abih glông bruă kơđi čar khom ngă bruă kơtang hloh, khut khăt hloh, tŭ yua hloh. Tơlơi či kiăng biă mă ñu kơ lŏn ia ta, mông anai khut khăt ngă tui ƀu kơnong bruă kơđi čar đôč ôh, kiăng ƀuh boh tơhnal sit nik, pơblih phrâo biă mă mơ̆ng glông bruă kơđi čar, khul mơnuih ngă bruă mơdrô, ƀing mơnuih rơgơi kơhnâo ƀơi lŏn ia, ƀing mơnuih kơsem min ia rơgơi hăng abih bang mơnuih mơnam.