Khua dêh čar rơkâo djop ding jum, gơnong bruă, ƀon lan gir run, gơgrong, hơdeč hmar, ngă tŭ yua ƀiă dong amăng pok pơhai bruă mă, pơsir hĭ hơdôm tơlơi gun, kiăo tui hơdôm tơlơi git gai mơng Ding jum kơđi čar, Ƀirô Khua pơ ala mơnuih ƀôn sang dêh čar, Kơnuk kơna. Amăng anun, pơgiong hơdôm hơnong pơkă lăp djơ̆, tơhnal pơkă, bruă mă, hluai tui tơhnal lăp djơ̆, tơlơi pơkă jar kmar samơ̆ lăp djơ̆ tơlơi sit nik ƀơi Việt nam kiăng ngă atur pok pơhai ha amăng plĕ, mut hrŏm amăng đơ đam dêh čar. Pơgiong hră pơ-ar tuh pơ alin, kah pơpha prăk tuh pơ alin djơ̆ tơlơi rơkâo, ngă djơ̆ hrơi blan, laih dong khut khăt pơgăn hưp ƀong kông ngăn, ngă soh, pơgang ba tơlơi dưi pô.

Khua dêh čar rơkâo djop ƀon lan đing nao git gai bruă pơhrui glăi lŏn mơnai, man pơdong plơi pla phrâo, pơhlôm tañ, lăp djơ̆, tơlơi hơdip mơnuih ƀôn sang ƀơi anih pơdong phrâo klă ƀiă anih hơđăp, pơhlôm djop anih anom brơi mơnuih mơnam, ĕp brơi bruă mă, tơlơi bơwih ƀong kơ mơnuih ƀôn sang. Khua dêh čar jao Ding jum prăk kak ječ ameč pel ĕp, tŭ yap akŏ bruă pơplih pơkra kông ti phun pơkra jơlan rơdêh treng Việt Nam; Ding jum sĭ mơdrô hăng tuh tia pơkra ming pơgiong hră pơ-ar kiăng mơ-it tŭ yap akŏ bruă pơđĭ kyar tuh tia pơkra jơlan rơdêh treng blan 3 thun 2026, laih dong tŏ tui rơkâo đĭ tơhnal pơkă, hơdră bruă hăng hơdôm anom bruă bơdjơ̆ nao.