Boh tơhnal anai brơi ƀuh, tal ruah khua amăng tơring čar hơmâo pơphun tŭ yua biă mă, djơ̆ akŏ bruă jao, hăng mrô mơnuih ƀôn sang ruah khua nao plĕ hră tum djop. Tơring čar hơmâo 2 klăk 400 rơbâo čô mơnuih hơmâo anăn plĕ hră, mrô mơnuih nao plĕ hră truh 99,84%.

Mơnuih ƀôn sang ruah khua ƀơi Gia Lai hơmâo ruah 16 čô pô pơ ala mơnuih ƀôn sang dêh čar tui hăng tơlơi dăp hlâo. Hăng ƀing pơ ala mơnuih ƀôn sang gưl tơring čar lĕ ruah 85 čô pơ ala djop laih. Gưl să, phường hơmâo ruah 2.964 čô pơ ala, dŏ kơƀah 13 čô. Ƀơi anih plĕ hră ruah khua mrô 8, să Tuy Phước Bắc, yua kơ aka ƀu djop ruah 2/3 mrô khua pơ ala, Jơnum min ruah khua să brơi ruah pơhrua 1 čô khua dơ̆ng amăng lơ 19/3.