Ƀơi sang măi pơkra kơphê mơ̆ng Kông ti pơčruh ngăn Tuh pơ alin hăng Đĭ kyar An Thái, bruă pơkra tơpung kơphê hăng kơphê lik amăng ia hơmâo ngă bruă na nao, đah mơ̆ng hmao mơit gơnam kơ ƀing blơi mơ̆ng čar rơngiao. Ơi Nguyễn Xuân Lợi, Khua prong kông ti brơi thâo, hơdôm mơta gơnam akŏ thun hơmâo prăp giong laih, gơnam hơmâo ba trun pơ tơdrun tum păn, geh găl či đĭ kyar thun 2026: “Anom bơwih ƀong thâo hơduah ĕp mă, thâo mă yua klă djŏp tơlơi pơtrun, hơdră djru mơ̆ng Kơnuk kơna amăng bruă pơkra gơnam sĭ mơdrô. Anai jing tơlơi akŏ phun kiăng gơmơi pok prong anih mơdrô, pơđĭ tui anŏ kơtang pơhno, kơtưn bơwih ƀong hăng đĭ kyar hơđong pơ anăp”.

Thun 2025, prăk pơhrui sĭ gơnam pơ čar rơngiao mơ̆ng Dak Lăk hơmâo năng ai 2,8 klai USD, đĭ giăm 40% pơhmu hăng thun hlâo, amăng anun gơnam mơ̆ng hmua ăt jing bruă bơwih ƀong akŏ phun hăng hơdôm mơta gơnam kah hăng kơphê, sâu riêng, mak ka…Tơlơi anai pơtrut pran jua kiăng anom bơwih bong mut amăng thun phrâo pơkra gơnam hơmâo hloh. Ơi Nguyễn Tiến Dũng, Kơ-iăng khua Kông ti TNHH Sa ding kơna Blơi sĭ gơnam 2-9 Dak Lăk (Simexco Daklak) brơi thâo, jing anom bơwih ƀong kơnuk kơna nao hlâo amăng bruă ba sĭ gơnam mơ̆ng hmua, mut amăng thun 2026, anom bơwih ƀong ngă hrŏm hloh dong hăng hơdôm anom bruă jar kmar kiăng pơđĭ tui kơphê jơman, pok prong anih mơdrô hăng pơđĭ tui nua kơphê amăng tơring čar: “Ƀing gơmơi hơmâo hơdră ngă bruă rơđah rơđông, anun jing jơlan đĭ kyar mrô gơnam, pơđĭ tui anŏ kla kơ mơnuih ngă hmua ăt kah hăng anih anom pơtruh hrŏm mơ̆ng ƀing gơmơi či akŏ pơjing sa bruă bơwih ƀong kơphê jơman hmư̆ hing mơ̆ng Việt Nam amra hơmâo ƀơi djŏp dêh čar”.

Hrŏm hăng hơdôm anom mơdrô kơphê, lu anom ngă ƀong hrŏm sĭ boh troh ăt hơmâo hơmăi mơn. Ƀơi anom ngă ƀong hrŏm Xanh Cao Nguyên, să Čư̆ M’gar, tơring čar Dak Lăk, boh kruăi hrĕ săt glăk amăng bơyan ba sĭ pơ dêh čar Khač, Mi hăng Canada…Ơi Nguyễn Văn Thanh Bình, Khua anom ngă ƀong hrŏm brơi thâo, hrŏm hăng ba sĭ boh kruăi hrĕ săt, anom ngă ƀong hrŏm glăk tuh pơ alin pơkra gơnam či pơđĭ tui hơdôm gơnam pơkra tong ten, pơkra klă hlao: “Rơngiao kơ bruă ba sĭ boh troh săt, anom ngă ƀong hrŏm glăk tuh pơ alin man pơkra sang măi či pơkra gơnam pioh rơ-ơ̆, ƀhu krô hăng bơrơpih ia boh kruăi hrĕ sĭ kơ čar rơngiao. Anom ngă ƀong hrŏm ăt prăp rơmet jơlan đĭ kyar hơdôm mơta gơnam pơkra dlăm pơkra tong ten mơ̆ng boh kruăi hrĕ kah hăng ia boh kruăi kuit, djet mă ia hiam hloh či pơđĭ tui anŏ yom mơ̆ng gơnam. Kiăng pơhlom hơmâo boh kruăi hrĕ hơđong, anom ngă ƀong hrŏm glăk pơtruh hăng ding kơna hăng pok prong kual pla boh kruăi hrĕ tui jơlan hơdră pơkra gơnam pơƀut ha anih, bơwih brơi bruă pơkra gơnam hăng ba sĭ sui thun”.

Hrŏm hăngg anŏ pơplih anŏ yom, mrô gơnam pơkra rai hăng anŏ klă gơnam ba sĭ pơ čar rơngiao, hơdôm anom bơwih ƀong gơnam mơ̆ng hmua ƀơi Dak Lăk ăt rơgơi hloh laih amăng bruă pơkra gơnam klă yom. Tui hăng ơi Hoàng Danh Hữu, Khua Khul wai lăng ding kơna, Kông ti gơgrong bruă tui prăk pơčruh sĭ mơdrô bơwih bơwang Ê Đê, pơkra gơnam klă yom djru hơdôm anom mơdrô pơkra lu mơta gơnam, ĕp ƀuh anih sĭ mơdrô phrâo, đĭ kyar anăn gơnam. Hơdôm anom bơwih bong čang rơmang dưi pơtruh hrŏm hloh dong hăng ƀing gŏp ngă hrŏm kiăo tui bruă pơtrut sĭ mơdrô. Ơi Hoàng Danh Hữu lăi: “Gơmơi ăt čang rơmang Ding jum pơkra gơnam sĭ mơdrô pơtrut hơdôm bruă pơtrut sĭ mơdrô hrŏm hăng hơdôm boh dêh čar mơ̆ ƀing ta glăk ngă hrŏm yom hăng ngă hrŏm abih ban hlom bom, či pơtrut gơnam blơi yua amăng anun hơmâo kơphê Việt Nam mut amăng anih mơdrô anai, plih hĭ kĭ pơkôl hăng hơdôm hră sĭ mơdrô rơngai hrŏm lĕ ƀig ta ngă hrŏm lu hloh kiăng hơmâo hơdră djru”.

Thun 2026, Dak Lăk kiăng hơmâo prăk pơhrui mơ̆ng bruă sĭ gơnam rơbêh 2,9 klai USD, pơƀut pok prong anih sĭ mơdrô hăng pơđĭ anŏ yom gơnam mơ̆ng hmua kiăo tui bruă pơkra klă yom. Hăng pran jua ngă bruă dik dak amăng akŏ thun phrâo, anom bơwih ƀong gơnam mơ̆ng hmua tơring čar glăk pơƀuh anŏ klă, akŏ pơjing anăn gơnam hăng ba gơnam mơ̆ng hmua Dak Lăk hrưn ataih hloh pơ anih sĭ mơdrô jar kmar. Tơlơi anai djru pơđĭ tui prăk kơ mơnuih ƀôn sang, anom bơwih ƀong hăng pơtrut đĭ kyar bơwih ƀong huă -–mơnuih mơnam mơng tơring čar, anăp nao rơnoh đĭ kyar dua mrô pơ anăp anai./.