Mơguah lơ 7/9/2023, Khua dêh čar ơi Phạm Minh Chính hrŏm hăng ƀing khua mua amăng kual ASEAN laih anun hơdôm dêh čar ngă gŏp ăt jơnum ASEAN-India tal 20 laih anun Jơnum khua mua djop dêh čar kual Ngŏ ASIA (EAS) tal 18. Ƀơi mông jơnum ASEAN-India tal 20, hơdôm bơnah lăng yôm bruă ngă hrŏm hlom bom akŏ pơjing mơ̆ng thun 2022. Khua dêh čar India ơi Narendra Modi lăi pơtong, ASEAN jing kah hăng tơmeh phun amăng jơlan hơdră či ngă anăp nao pơ kual Ngŏ hăng anih phun amăng Tơlơi pơčeh phrâo kơ brưa ămng ia rơsĭ Ấn Độ Dương-Thái Bình Dương mơ̆ng dêh čar India.

ASEAN hăng India tŭ ư pơtum đing nao ngă hrŏm gah bruă ia rơsĭ hơđong kjăp, tơlơi bơwih ƀong huă amăng kual ia rơsĭ hơdjă rơgoh, pơgăn ƀing ngă pirat, tơlơi soh nao nao rai pơ lu dêh čar, pơđĭ tui tơlơi thâo gah bruă pơjrao duăm ruă, pơtrut bruă ngă hrŏm djru pơhing nao rai, ba yua boh thâo ia rơgơi phrâo, pơblih yua mrô, laih dơ̆ng pok pơhư prong bruă ngă hrŏm pơblih yua ia săng pơhrua nao, bong glăi anŏ pơblih ayuh hyiăng lŏn tơnah. Khua dêh čar India ăt pôr pơthâo akŏ pơjing keh prăk ASEAN-India yua kơ bruă mă mrô kơñ pơgi. Ƀơi mông jơnum khua mua ASEAN kual Ngŏ ASIA tal 18 (EAS-18), hơdôm bơnah ƀuăn, dong yua tơlơi gơgrong phun mơ̆ng ASEAN, hrŏm hơbit akŏ pơdong tơmeh kjăp mă bruă pok pơhư prong, tơpă, hlom bom hăng kơnang kơ atur tơlơi phiăn jar kmar laih anun phiah phiăn mơ̆ng Sang gum hơbit djop dêh čar.