Amăng mông mă bruă, Khua git gai Ping gah ƀôn prong Hải Phòng Lê Tiến Châu pơtŏng sit, mơnuih ƀôn sang Việt Nam djă pioh na nao hăng hơdor tơngia hơdôm pran jua tơpă sit, tơlơi gum djru prong prin mơ̆ng mơnuih ƀôn sang Bulgaria amăng rơnuk blah ngă dưi mă tơlơi rơngai djuai ania, pơdŏng lŏn ia. Khua mir sir dêh čar Bulgaria Rumen Radev pơtŏng sit, Bulgaria pơpŭ na nao tơlơi rô nao rai giăng mah mơ̆ng hlâo klă hiam kơplah wah dua bôh dêh čar.

Amăng tal nao čuă ƀôn prong Hải Phòng anai, Khua mir sir Bulgaria čang rơmang Hải Phòng lăi pơthâo nao rai tơlơi găn rơgao pơđĭ kyar wot bruă pôr pơhing hăng phrâo rơnuk anai; tơlơi găn rơgao mơ̆ng ƀôn prong amăng ngă pơhưč tuh pơplai, pơsir hơdôm tơlơi bơdjơ̆ nao lơm pơđĭ kyar tañ samơ̆ ăt djă pioh hăng pơđĭ kyar mơn anô̆ yôm phun mơ̆ng djuai ania. Khua mir sir Bulgaria Rumen Radev čang rơmang 2 bơnah amra hmâo hơdôm bruă gum hrŏm rơđah amăng hơdôm mơta bruă hơdai đing nao, djru pơtrut tơlơi rô nao rai giăng mah mơ̆ng hlâo hăng gum hrŏm kơplah wah dua bôh dêh čar Việt Nam - Bulgaria mut dơlăm hăng ba glăi bôh tơhnal hloh./.