Ƀơi plơi prong jưh jom Hà Nội, amăng hơdôm blan blung a pok pơhai ngă tui Hră pơtrun mơ̆ng jơnum ruah khua pơ ala ping gah ƀôn prong tal XVIII, rơwang bruă thun 2025-2030, lu mơta jơlan hơdră pơprong hơmâo ngă tui tum teč hloh hăng lu ring bruă, kơčăo bruă yom. Dua kơčăo bruă prong phun, anun lĕ jơlan prong rô nao rai ngă rơnăk, hiam ter hang ia krông Hồng hăng kual plơi prong phrâo, pioh pơphun bruă pơrơguăt drơi jăn Olympic, amra pơjing rai anih anom hiam yak nao pơđĭ kyar phrâo, pok rai hơdră anăn “Anŏ djă gru ia krông Hồng” kơñ pơgi adih. Ding kơna ding jum kơđi čar, Khua git gai ping gah ƀôn prong Hà Nội, ơi Nguyễn Duy Ngọc brơi thâo:

“Anai lĕ 2 kơčăo bruă hơmâo boh tŭ yua yom bia mă, djru pơtrut pơđĭ kyar plơi prong jưh jom, kual lŏn dăo ter hang ia krông Hồng hăng amăng dêh čar, anăp nao ngă pơhiam anih anom hyu ngui čuă lăng ter hang ia krông Hồng, bơwih brơi sĭ mơdrô, pơđĭ kyar rơnoh pơhrui glăi GRDP mơ̆ng 11% pơngŏ amăng thun hăng abih sa rơwang bruă ping gah, akŏ pơjing hơbô̆ phrâo kơ plơi prong jưh jom Hà Nội, anih anom phun djă pioh gru grua đưm, ia rơgơi tơlơi thâo pơčeh phrâo, hrưn đĭ kiăng hơmâo jơlan phun prong bơngač, rơhaih rơhong rô nao rai, hơmâo  glông phun kyâo mơtah mơda, ƀôn prong thâo rơgơi, dưi pơtruh nao rai hăng rŏn lŏn tơnah”.

Ƀu kơnong Hà Nội ôh, amăng đơ đam dêh čar, lu tơring čar hlăk pơphun ngă tui, pok pơhai lu kơčăo bruă čuk pơkra jơlan phun, yom nao rai, mơ̆ng yap mơ̆ng jơlan nao rai amăng plơi pla, truh amăng plơi prong, kual  ƀut ngă anih tuh tia pơkra ming, pơdong sang măi, ba yua boh thâo ia rơgơi, măi mok phrâo, truh kơ bruă pơgang pioh lŏn mơnai glai klô hiam, mơtah mơda, rơ-ơ̆ rơ-iom, pơhưč bruă mă bơwih ƀong huă pơtrut rơnoh pơhrui glăi amăng bruă mă.

Lơ̆m thun blan amăng rŏn lŏn tơnah, bơtơpư̆ rung răng na nao, tơlơi bơwih ƀong huă mơ̆ng Việt Nam ăt dưi djă bong kơjăp hơđong đôč. Mơ̆ng črăn 2021-2025, rơnoh pơđĭ kyar GDP pơkă dưm dưm lĕ 6,3%, kơnong thun 2025 lĕ hơmâo 8,02%; hnơ̆ng bơwih ƀong huă ngă atur đĭ truh 514 klai USD, dng tal 32 ƀơi rŏng lŏn tơnah; GDP pơkă dưm dưm rim čô mơnuih pơhrui mă hơmâo 5000 USD sa thun. Prăk trun nua dưi pơgăn, hơdôm bruă ngă bơkơnar prong amăng atur tơlơi bơwih ƀong huă dưi pơhlom klă. Kơ-iăng nai tha prin, nai prin tha Nguyễn Thường Lạng, Sang hră gưl prong bơwih ƀong huă dêh čar lăi lĕ, hơdôm boh tơhnal anai hơmâo boh tŭ yua yom biă mă:

“Anai lĕ boh tơhnal ngă tơhnal tŏ tui kơjăp kơ črăn pơđĭ kyar phrâo, amăng anun kiăng pơtum nao pơblih ba yua anŏ mơtah, ba yua mrô; tañ pơhrŏ ƀiă hơdră ngă hră pơar kaih, lu črăn, jao tơlơi dưi lu hloh kơ  sang bruă mơdrô pioh pơjing rai tơlơi kơtang pơđĭ kyar bơwih ƀong huă”.

Thun 2025, đơ đam dêh čar hơmâo giăm 300 rơbâo sang bruă mơdrô phrâo akŏ pơdong hăng pơwơ̆t glăi mă bruă; rơnoh prăk tuh pơ alin pơhrua nao amăng atur tơlơi bơwih ƀong huă dêh čar giăm 6,4 klăk klai. Gah bruă FDI ăt pơgôp hrŏm prong, hăng rơnoh prăk  yap mơ̆ng črăn thun 2021-2025 hơmâo 158 klai USD, brơi ƀuh anŏ pơhưč anih anom tuh pơ alin mut rai bơwih ƀong huă ƀơi Việt Nam.

Yak nao amăng črăn 2026-2030, tơhnal pơkă rơnoh pơđĭ kyar GDP pơkă dưm dưm rim thun 10% pơngŏ, hơmâo pơtong glăi rơđah. Hơdôm kơčăo bruă phun yom kah hăng čuk pơkra jơlan rơdêh đuăi hmar mơ̆ng Kơdư nao pơ Dơnung, atur ba yua ia rơgơi mrô, apui yua, logisticss; hrŏm hăng anăp pơđĭ kyar mơtah, bơwih ƀong huă hăng mrô, bruă tuh tia pơkra ming gơnam tam sĭ mơdrô pơ anăn “Make in Vietnam”, hrŏm hăng anun lu bruă mă amăng anom bruă tuh tia pơkra ming gah gru grua, tuai čuă ngui…amra pok rai sa anih pơđĭ kyar phrâo kơ lŏn ia. Mơnuih rơgơi kơhnâo gah tơlơi bơwih ƀong huă nai prin tha Lê Duy Bình lăi lĕ:

“Tơlơi kiăng hrưn mă pô, hrưn đĭ kơtang blung hlâo lĕ, khom ngă hơđong tơlơi bơwih ƀong huă ƀơ̆i, tơlơi thâo git gai ngă pô amăng jơlan hơdră prăk kăk, thun ba yua prăk kăk hăng pơđĭ tui  kơnuih hiam hmư̆ hing amăng atur tơlơi bơwih ƀong huă Việt Nam amăng črăn mut phung jar kmar”.

Hrŏm hăng rơnoh pơđĭ kyar, lu bruă ngă pơblih kơtang phrâo gah tơlơi phiăn pơkă, jơlan glông nao rai, gơnam yua, atur gêh găl kiăng pơhưč mơnuih djru hrŏm mă bruă pok pơhai sa amăng plĕ. Jơnum lok khua mua ding kơna pơ ala mơnuih ƀôn sang dêh čar tal XV hơmâo pơtong rơđah jơnum lok ba glăi boh tơhnal lăp djă pioh amăng gru phun dêh čar, lu tơlơi phiăn čih pơkra hơmâo ba pơsit, lu hră pơtrun ngă tui brơi pơsir hĭ anŏ gun ngă kơđông, pơhluh brơi bruă ngă, pơblih kơtang mơ̆ng tơlơi pơmin juăt ngă kơnong git gai, jing bruă pơblih phrâo pơđĭ kyar, pơđut hĭ bruă ngă bĕ hĭ, pơjang nao rai tơlơi glăm ba, gơgrong amăng bruă mă. Hăng atur kơjăp dưi akŏ pơjing laih, Nai tha prin, nai prin tha Phan Xuân Sơn, Khua anom bruă kơsem min mơnuih ngă bruă mơdrô, đăo kơnang tui anai:

“Kâo đăo kơnang biă mă kơ anŏ gêh găl hơmâo laih mơ̆ng đưm djuai ania ta hăng đăo kơnang kơ tơlơi git gai mơ̆ng ping gah laih anun djuai ania ƀing ta khin hơtai, sa mơta pran jua hơmâo dưi lăi lĕ khin hơtai kơjăp tong ten nao pơ anăp, găn rơgao hĭ tơlơi tơnap tap amăng djop rơnuk. Mông anai, yak nao amăng rơnuk hrưn đĭ phrâo, ƀing ta ăt khom dŏ djă pioh pran jua tơlơi khin hơtai anun hăng ping gah lĕ ană kơčua nao hlâo mơ̆ng djuai ania. Ră anai, jơnum ruah khua ping gah tal 14, jing sa jơlan hơdră akŏ pơdong ping gah rơngiao kơ anŏ hơđăp dŏ djă pioh, lĕ hơmâo dơ̆ng tơlơi kơhnâo rơgơi phrâo, pran jua mă bruă amra ba djuai ania Việt Nam yak nao rơnuk rơgơi kơhnâo  phrâo kah hăng djop djuai ania rơgơi kơhnâo ƀơi rŏng lŏn tơnah anai mơ̆n”.

Hăng tơlơi đăo kơnang tong ten kơjăp phik mơ̆ng ping gah, hăng tơlơi kiăng hrưn đĭ mơ̆ng abih djuai ania, yua kơ sa boh lŏn ia Việt Nam pơdrong sah, hyuk hyak mơak klă,  kiăo tui hmao kru djop dêh čar pơprong ƀơi rơma kual lŏn, mơnuih ping gah hăng mơnuih ƀôn sang amăng đơ đam dêh čar ăt đăo kơnang lĕ, hăng atur ngă kơjăp dưi akŏ pơbŭ đĭ laih, hăng pran jua hrưn mă pô, đăo kơnang, h’ĭn pran hrŏm hăng anŏ pơblih phrâo tơlơi pơmin, pơjing bruă mă khut khăt hloh, lŏn ia ta amra tŭ mă  boh tơhnal mă bruă hiam klă amăng djop mông găl, kiăng găn rơgao abih tơlơi lông lăng pơ anăp, ngă tui  djop tơhnal pơkă pơđĭ kyar hmar, tañ hăng hơđong kơjăp.