Hmư̆ tui tơlơi jak iâo mơ̆ng Khua git gai Ping gah dêh čar ta Nguyễn Phú Trọng hăng bơnai ñu, Khua mir sir dêh čar ta Võ Văn Thưởng hăng bơnai ñu, pơphun mơ̆ng lơ 12/12, Khua git gai Ping gah, Khua mir sir dêh čar Khač Tập Cận Bình hăng bơnai ñu amra čuă gưl Kơnuk kơna pơ̆ dêh čar Việt Nam amăng 2 hrơi. Anai lĕ tal rai čuă Việt Nam tal 3 mơ̆ng ơi Tập Cận Bình hăng bruă apăn Khua git gai Ping gah dêh čar, Khua mir sir dêh čar Khač, hlâo kơ anun lĕ amăng hơdôm thun 2015, 2017 hăng Việt Nam lĕ dêh čar tal 2 ơi Tập Cận Bình hyu čuă amăng thun anai mơ̆, ƀu hmâo pơkĕ hrŏm bruă mă lu bơnah.

Pơkă hlâo amăng tal rai čuă anai, dua bơnah amra bơkơtuai kơ bruă pơđĭ tui pran gơgrong phrâo kơ tơlơi rô nao rai dua bơnah, pơtrut gum hrŏm bruă abih bang kơplah wah dua bôh dêh čar mut dơlăm hăng sit nik hloh. Hrŏm hăng tơlơi rơđah amăng bruă rô nao rai 2 bôh dêh čar gah gum hrŏm bơwih ƀong – sĭ mơdrô, gah tơlơi rô nao rai bruă kơđi čar, gum hrŏm bơkơtuai glông Ping gah, kơplah wah dua Gong gai, Khua pơ ala mơnuih ƀôn sang, Jơnum min djop djuai ania mơnuih mơnam ăt kah hăng kơplah wah hơdôm Ding jum, gơnong bruă yôm phăn kah hăng Pơtom hiăp, Pơgang lŏn ia, Kông ang, hơdôm tơring čar, ƀôn prong guai dêh čar hăng bơkơtuai mơnuih ƀôn sang dua bôh dêh čar hmâo laih lu bôh tơhnal sit nik, ba glăi kơmlai sit nik kơ mơnuih ƀôn sang dua bôh dêh čar./.