Anai jing bruă prăp rơmet yom biă mă, pơhlom hrơi mơnuih ƀôn sang ngă pô hơmâo ngă djơ̆ tơlơi phiăn, rơnuk rơnua, pơsit tơlơi dưi wai lăng lŏn ia hăng tơlơi pơƀuh ƀô̆ mơ̆ng Kơnuk kơna ta ƀơi bul pơtâo plao ia rơsĭ hing ang mơ̆ng Lŏn ia ta. Tui hăng tơlơi lăi pơthâo mơ̆ng gong gai kual wai lăng hơjăn Trường Sa, abih bang hơmâo 21 anih plĕ hră. Truh ră anai, bruă prăp rơmet hơmâo ngă kơnar, djŏp djel, djơ̆ tơlơi phiăn.

Anih anom, gơnam yua hơmâo prăp lui laih, hơmâo 22 boh kơthung phun, 16 boh kơthung pơhlom lui, hrŏm hăng abih bang hră pơ-ar, hră mơnuih nao plĕ hră, hră plĕ. Bruă jơnum pơčrông sai tĕp anăn mơnuih nao plĕ hră hăng ƀing khua tơbiă anăn či ba ruah hơmâo ngă tong ten, rơđah rơđông. Bruă pôr pơhing hai kơtang mơn, djru ba ƀing khua, ling tơhan hăng mơnuih ƀôn sang thâo hluh rơđah anŏ yom bruă kơđi čar mơ̆ng hrơi plĕ hră. Tơdơi kơ mông jơnum, khua wai lăng kual Trường Sa jao glăi kơthung plĕ hră, hră kak kư tri, hră pơ-ar ruah khua kơ mơnuih gơgrong bruă. Dua boh ƀat tô mơ̆ng Tơhan ia rơsĭ kual 4 pơpĕ laih mơ̆ng tơdrun ia rơsĭ tơhan Cam Ranh, tơring čar Khánh Hòa, ba ƀing mă bruă hrŏm hăng kơthung plĕ hră nao pơ hơdôm bul pơtâo kual Trường Sa./.