Ơ ayong, hlăk Khua mir sir Hồ Chí Minh dŏ hơdip hơmâo pơtă pơtăn na nao kơ tơlơi khăp thâo gum pơgôp djop djuai ania. Anom bruă khua hlăk tơring čar Gia Lai ngă tui tum teč hiưm pă tơlơi anun pok pơhai amăng bruă mă kơ ƀing ta, biă mă ñu hăng ƀing hlăk ai tơdăm dra mơnuih djuai ƀiă ?

Ayong Đỗ Đức Thanh: “Hlăk Khua mir sir Hồ Chí Minh dŏ hơdip đing nao biă mă kơ tơlơi gum pơgôp djop djuai ania amăng dêh čar; biă mă ñu kual Dap Kơdư ƀing ta, amăng tơlơi Wa pơtô hơmâo lăi rơđah: “Mơnuih ƀôn sang Yuan ƀudah Thổ, Mường ƀudah Mán, Jarai ƀudah Êđê, Sedang ƀudah Bahnar hăng djop djuai ania ƀiă pơkŏn lêng kơ ană tơčô Việt Nam soh, lêng kơ adơi ayong ha kian pruăi...”. Anai ăt kah hăng sa tơdŭ hơñueng hrip ba pơčrâo jơlan tơpă kơ ƀing gơmơi pok pơhai bruă mă amăng kual plơi pla djuai ania ƀiă. Ƀing gơmơi pơphun brơi kơ ƀing hlăk ai djuai ania Yuan hăng djop djuai ania ƀiă bưp nao rai plah wah ƀing hlăk ai kah hăng Jarai, Bahnar; mơ̆ng anun kiăng pơdah rai tơlơi thâo, ƀuh rơđah amăng hră pơtă glăi mơ̆ng Wa, ƀing gơmơi dŏ hrŏm jĕ giăm hơbit, gum pơgôp ngă tui tŭ yua hơdôm bruă djru ba mơnuih ƀôn sang, kơ Lŏn ia, kơ djuai ania.

-Bruă hrăm hăng hla tui tơlơi Wa pơtô dưi  hơmâo anom bruă hlăk ai tơring čar pok pơhai truh pơ kual ataih, kual mơnuih djuai ƀiă hiưm pă, ơ ayong ?

Ayong Đỗ Đức Thanh: Kiăng ngă rơđah tum teč hloh akŏ bruă hrăm laih anun hla tui gru hiam pran jua klă Hồ Chí Minh, ƀing gơmơi jơnum lu wơ̆t, ngă tui re se, anăp nao pơ kual ataih, kual plơi pla mơnuih djuai ƀiă. Ƀing gơmơi ruah mă ƀing hlăk hur har, hơmâo tơlơi kiăng mă bruă bơwih ƀong huă sit nik, găn rơgao tơlơi tơnap tap djru ba ƀing gơñu anun. Hrŏm hăng anun, ƀing gơmơi git gai djop gưl anom bruă tơdăm dra mut phung khom pơphun na nao bruă mă phung hlăk ai djă pioh gru grua hiam mơ̆ng djuai ania pô. Anun lĕ, pơplông gru grua čing hơgor, pĕ gông brô̆ ayup đing hăng adoh tơlơi adoh amăng plơi pla djuai ƀiă, kiăng pơphun brơi tơlơi ngui ngor kơ ƀing hlăk ai ană plơi pla djuai ƀiă hăng hlăk ai ƀing đăo. Kơnang kơ bruă ngă anun, ƀing gơmơi pơtô brơi boh yom phun hrăm hăng hla tui gru hiam pran jua klă Hồ Chí Minh. Mơ̆ng anun, akŏ pơjing tơlơi thâo hluh kiăng hrăm, hur har amăng bruă mă pơhrăm ƀư̆ pơkra pran jua mut hrŏm amăng bruă mă gah mơnuih tơpuôl, khul tơdăm dra hăng tơdăm ngek dra muai čơđai sang hră”.

-Ih dưi mơ̆n lăi pơthâo dơ̆ng hơdôm bruă mă ƀuh rơđah hơmâo gum ba ƀing hlăk ai tơdăm dra mơnuih djuai ƀiă thâo djă pioh gru grua hiam đưm djuai ania pô, laih anun pơhrăm pran jua ngă tui tơlơi Wa pơtô ?

-Ayong Đỗ Đức Thanh: “Ƀing gơmơi juăt pơphun na nao 2 thun sa wơ̆t pơplông atông čing djuai ania ƀiă, hrŏm hăng adoh tơlơi adoh đưm; pơplông atông čing pioh kơ ƀing čơđai anet. Ƀing gơmơi juăt pơphun bruă mă brơi hyu ĕp lăng, čuă ngui găn rơgao lu hơbô̆ bruă amăng plơi pla pơkra pơjing gơnam sĭ mơdrô, kiăng kơ ƀing hlăk ai thâo hluh hăng pơpŭ kơ bruă mă gru grua đưm djuai ania pô. Rơwang bruă thun 2025-2027, ƀing gơmơi pơkă tơhnal bruă či ngă lĕ git gai abih bang  anom bruă tơdăm dra mut phung, akŏ pơjing grup atông čing, djă pioh gru grua djuai ania ƀiă pioh pơtô ba ƀing čơđai muai ƀơi plơi pla”.

-Hơbô̆ bruă plơi hlăk ai “2 ƀu hơmâo, 2 hơmâo” yua kơ anom bruă khua tơdăm dra mut phung tơring čar pok pơhai hơmâo boh yom phun hơgĕt lăp đing nao, boh nik ñu amăng bruă mă djă pioh gru grua hiam djuai ania hăng pơđĭ tui tơlơi glăm ba mơ̆ng ƀing mơnuih kơhnăk gru đưm, ƀing tha plơi lĕ ?

-Ayong Đỗ Đức Thanh: Ƀing gơmơi hơmâo pok pơhai hơbô̆ bruă plơi hlăk ai 2 ƀu hơmâo, 2 hơmâo lĕ man pơdong plơi pla phrâo, amăng anun hơmâo hơbô̆ bruă djă pioh gru grua hiam đưm. ƀing hlăk ai tơdăm dra mut phung, khua mua hlăk ai, khul grup čơđai sang hră nao bưp ƀing tha plơi, mơnuih kơhnăk, mơnuih arăng đăo kơnang, rơkâo djru gum brơi kơ bruă hyu pơtô lăi djă pioh gru grua hiam, kiăng ƀing hlăk ai tơdăm ngek dra muai mơnuih djuai ƀiă  hrăm hăng djă pioh gru grua hiam djuai ania pô. Ƀing gơmơi ăt akŏ pơjing khul grup ngă hrŏm, pơtum lu tơdăm dra hlăk ai đing nao djă pioh gru grua hiam đưm, mơ̆ng anun pơtrut pran jua hăng lir hơbit brơi ngă hrŏm djă pioh gru grua hiam đưm djuai ania”.

-Ih dưi mơ̆n lăi pơthâo sa dua čô mơnuih hur har  mơ̆ ih ƀuh gơñu gir run biă mă hrăm hăng hla tui kơnuih hiam gru hiam, tơlơi pơtô mơ̆ng Wa Hồ  laih anun ngă bơngač bruă anun amăng plơi pla ?

-Ayong Đỗ Đức Thanh: “Ƀing gơmơi hơmâo lu yơh mơnuih ngă bruă anun hur har. Amăng anun, hơmâo Rmah H’Yĭu (Rơmah H’Dịu) Khua hlăk ai să Ia Kriêng, tơring glông Đưc Cơ sa čô đah kơmơi  ngă khua hlăk ai mơnuih djuai ƀiă ngă lu bruă ba glăi boh tŭ yua. Ñu hơmâo mă pri mrô sa tal pơplông pơphun bruă mă. Ñu hơmâo ngă lu ring bruă djru ană plơi hăng ƀing hlăk ai, wơ̆t kơ čơđai muai plơi pla. Phrâo anai, ñu tŭ mă tơlơi apah bơni mơ̆ng anom bruă tơdăm dra mut phung dêh čar hăng tơlơi bơni anăn Lý Tự Trọng-pri yom hloh pơpŭ kơ mơnuih ngă khua  ƀing hlăk ai dêh čar. Hrŏm hăng anun dŏ hơmâo lu gru hiam ƀing hlăk ai mơnuih djuai ƀiă ba gru hlâo kah hăng Kpă Sĕo Khua sang bruă ngă hrŏm hlăk ai să Đất Bằng, tơring glông Krông Pa hăng hơbô̆ bruă bơwih ƀong huă mơ̆ng sang anŏ ñu pô djru ba lu hlăk ai tơdăm dra amăng plơi hơmâo prăk pơhrui glăi hơđong amăng tơlơi hơdip mơda. Khua mua amăng să Đất Bằng hăng tơring glông Krông Pa lăng yom biă mă hơbô̆ bruă anai laih anun djru pơsir bruă mă kơ ƀing hlăk ai mơ̆ng hlăk ai Kpă Sĕo”.

-Tui hăng ih, tơlơi hơgĕt yom hloh pioh djă lui hăng pơđĭ kyar bruă mă hrăm hăng hla tui tơlơi pơmin, pran jua, tơlơi dŏ dong ƀong huă mơ̆ng Hồ Chí Minh amăng khul tơdăm dra hlăk ai, čơđai sang hră kiăng hơđong na nao ?

-Ayong Đỗ Đức Thanh: “Hră hăng hla tui tơlơi pơmin Wa Hồ kâo ƀuh sa bruă mă yom biă mă khom thâo ƀuh hăng pơlar tui hơbô̆ bruă hiam ba gru hlâo. Mơ̆ng anun, pơjing bruă mă kiăng hrăm hăng hla tui, pơtrut lu bruă mă hiam, djru nao rai tơdruă. Ƀing gơmơi ăt pơblih phrâo bruă mă hyu pơtô pơblang, đing nao kơ ƀing khua mua hlăk ai kiăng gơñu pơjing bruă mă pơtô pơblang amăng plang tơlơi pơhing mơnuih mơnam. Amăng abih bang khul grup tơdăm dra lĕ rim čô hlăk ai sa hơbô̆ bruă hiam, kiăng abih bang anăp nao hrăm hăng hla tui. Bruă apah bơni ƀing ngă bruă tŭ yua ba gru hlâo, hla tui tơlơi pơmin Wa Hồ jing sa bruă mă ƀing gơmơi ăt pơtrut pơsur brơi  pơjing pran jua phrâo amăng tơlơi jak iâu hrăm laih anun hla tui tơlơi pơmin, bruă ngă, tơlơi dŏ dong ƀong huă mơ̆ng Hồ Chí Minh”.

-Hai, bơni kơ ih hŏ!