Hlâo kơ mông pơphun, Khua dêh čar hăng abih bang mơnuih nao jơnum hơmâo pioh 1 mơnit hơ-ŭ hơdor kơ mơnuih rơngiă yua hơjan ia ling dăo; Khul mơnuih bơwih ƀong sĭ mơdrô hlăk ai Việt Nam pioh 6 klai prăk djru brơi ječ 6 boh tơring čar Cao Bằng, Hà Tĩnh, Đà Nẵng, Khánh Hòa, Gia Lai, Dak Lak rŭ pơdong glăi anŏ răm rai yua hơjan kơthel ngă. Khul mơnuih bơwih ƀong sĭ mơdrô hlăk ai Việt Nam hơmâo giăm 21.000 čô ding kơna amăng hơdôm anom bruă djru brơi bruă mă kơ 5 klăk čô mơnuih, pơhrui rĭm thun rơbêh 40 klai đôlar Mi hăng pơgôp rơbêh 10% GDP dêh čar.

Hơdôm rơtuh klai prăk hơmâo mă yua amăng jơlan hơdră djru mơnuih mơnam, mơng anun pơdah pran ba jơlan hlâo amăng bruă djru brơi mơnuih mơnam mơng ƀing bơwih ƀong sĭ mơdrô hlăk ai…Lăng yôm hơdôm boh than dưi ngă pơprong mơng ƀing bơwih ƀong sĭ mơdrô hlăk ai, pơsit tong tơlơi gir run, rŭ prong kơtang mơng ƀing bơwih ƀong sĭ mơdrô hlăk ai Việt Nam, Khua dêh čar rơkâo Khul mơnuih bơwih ƀong sĭ mơdrô hlăk ai Việt Nam tŏ tui gơgrong, thâo pơčeh phrâo, pơtô hrăm, pơlir hơbit hăng djru brơi ƀing bơwih ƀong sĭ mơdrô hlăk ai tŏ tui pran kơtang mơng hlăk ai, hur har, khăp kơ lŏn ia, pơplih mơtah, thâo yua boh thâo ia rơgơi amăng bơwih ƀong sĭ mơdrô; ba anăn apăn sĭ mơdrô Việt Nam, gơnam Việt Nam amăng jar kmar; laih dong ba jơlan hlâo amăng ngă tui bruă djru mơnuih mơnam. Ƀrô tal anai, Khua dêh čar rơkâo khul mơnuih bơwih ƀong sĭ mơdrô hlăk ai Việt Nam pơphun tal pơplông “6 tơlơi klă hloh” hơmâo “lêng kơ ba jơlan hlâo, thâo pơčeh hloh, gir ngă bruă hloh, gum pơgôp hloh, mut hrŏm tañ hloh, thâo khăp pap hloh”.