Nai prin tha Trương Thanh Tùng, Khua grup kơsem min ia jrao phrâo (Anom bruă kơsem min boh thâo phrâo Phenikaa, nai pơtô gah tơlơi hrăm pơkra jrao, Sang hră gưl prong Phenikaa (Hà Nội), anai lĕ mơnuih ba jơlan hlâo amăng kơsem min boh thâo phrâo amăng grup hlăk ai rơgơi kơhnâo Việt Nam hăng jar kmar, yua ñu hơmâo lu tơlơi kơsem min pơprong bơdjơ̆ nao amăng rŏng lŏn tơnah. Sa amăng mrô anun lĕ bruă kơsem min anăp nao pơkra hơdôm djuai jrao phrâo kiăng pơjrao tơlơi ruă lar hyu…Sit biă ñu, tơdơi kơ sui thun hrăm hăng kơsem min pơ tač rơngiao. Nai prin tha Trương Thanh Tùng hơmâo ruah pot glăi pơ plơi pla hơdip hăng hơmâo tơlơi gum pơgôp. Tui nai prin tha Trương Thanh Tùng, kar hăng wa Hô hơmâo lăi: Hlăk ai lĕ mơnuih mă pô kơ lŏn ia pơgi kơdih anai. Yua anun, ñu kiăng pot glăi pơ plơi pla, ngă tui boh thâo ñu hơmâo hră ƀơi hơdôm boh dêh čar pơdrong asah, kơsem min, pơčeh pơkra hơdôm djuai jrao phrâo kiăng plih hĭ jrao pơgang drơi jăn pơkŏn. Nai prin tha Trương Thanh Tùng, Sang hră gưl prong Phenika Hà Nội lăi pơthâo hơdôm hơnong pơkă amăng kơsem min ia jrao pơgang drơi jăn:

“Kâo kiăng mơnuih ƀon sang Việt Nam pơgi kơdih anai amra huăi hŭi yua ia jrao tlâo pơgang drơi jăn dong tah. Kah hăng hơmâo lu dong jrao ruah mă yua, mă yua hơdôm djuai jrao ƀing gơmơi pơkra pơjing kiăng huăi pơgăn hĭ ia jrao pơgang drơi jăn, dưi pơjrao suaih brơi ƀing mơnuih ruă pơgăng glăi ia jrao. Jơlan kơsem min tal 2, ƀing gơmơi glăk ngă ăt ba glăi boh tŭ yua, anun lĕ kơsem minh hơmâo djuai jrao pơgang ruă bơbrah asar. Hơdôm djuai jrao anai tơdah dưi ba sĭ mơdrô amra plai ƀiă prăk kak pơjrao brơi mơnuih ruă bơbrah asar, pơjrao brơi ƀing gơñu klă ƀiă, pơhlôm brơi mơnuih ruă hơdip sui laih dong huăi hơmâo anŏ ngă sat amăng drơi jăn”.

Bơ hlăk ai adôh mơ-ak Nguyễn Thị Ngọc Hà (anăn juăt iâu Hà Myo) lêng kơ thâo pơčeh, pơmut hrŏm kơplah wah tơlơi adôh hơđăp hăng Rap laih dong jua adôh điện tử EDM, ba tơlơi adôh suang hơđăp giăm ƀiă ƀing hlăk ai. Tơlơi mơ̆ Ngọc Hà čang rơmang hloh lĕ dưi ba gru grua Việt Nam mut hrŏm hơdôm boh dêh čar djop kual kar hăng wa Hô čang rơmang, kiăng gơyut gơyâo amăng rŏng lŏn tơnah thâo Việt Nam glăk pơđĭ kyar, mut hrŏm, samơ̆ ăt djă pioh gru grua yôm phara mơn. Lăi nao hơdôm tơlơi gir run lơ̆m pơmut tơlơi adôh xẩm hăng rap laih dong jua adôh điển tử EDM, Nguyễn Thị Ngọc Hà brơi thâo:

“2 thun anai kâo gir run hrăm tui hơdôm tơlơi adôh suang đưm mơng djuai anai Việt Nam ta. Amăng anun hơmâo adôh Xẩm, Xoan Phú Thọ, tơlơi adôh đưm kual Dơnung tong krah hăng sa, dua tơlơi adôh djuai ania ƀiă ƀơi Việt Nam. Kâo hơmâo pơčeh, adôh sa, dua tơlơi adôh laih, kơ tơlơi adôh Xẩm hăng Xoan Phú Thọ hơmâo yŭ adôh “Trò chơi í a trời cho”; hăng yŭ adôh đưm djuai ania Mường hăng anăn “Đập nàng Khọt”. Tơlơi mơ̆ kâo čang rơmang hloh lĕ ba tơlơi adôh đưm mơng Việt Nam tơl abih bang mơnuih hmư̆ hăng ăt čang rơmang dưi adôh ƀơi hơdôm anih ngui ngor pơprong amăng jar kmar hăng hơmâo lu mơnuih hmư̆ ayun suang hrŏm tơlơi adôh đưm mơng Việt Nam ta”.

“Pơpă kiăng hơmâo hlăk ai, bruă hơget tơnap hlăk ai ngă” anai lĕ tơlơi pơtă pơtăn brơi hlăk ai mơng wa Hô jing tơlơi črâo ba ayong Y Xim Ndu, djuai ania M’nông, tơring glông Lak, tơring čar Dak Lak. Tơdơi kơ hrăm giong gưl prong, ayong Y Xim Ndu hơmâo gir run pot glăi plơi pla kiăng pơphun mă bruă. Amăng anun ñu hơmâo khin hơtai ba jơlan hlâo amăng bruă bơwih brơi tuai čuă ngui amăng glai rưng, gru grua hăng tơnă hơbai gơnam ƀong mơnuih djuai ania ƀiă; djă pioh hăng lăi pơthâo gru grua djuai ania, sit biă ñu lĕ gru grua čing hơgor kual Dap kơdư. Ră anai, hlăk ai Y Xim Ndu hơmâo djru brơi bruă mă brơi kơ 10 čô hlăk ai amăng plơi pla.

“Kâo čang rơmang dưi tŭ mă hơdôm tơlơi gal amăng plơi pla mơng lŏn mơnai glai rưng, mơnuih mă bruă. Hăng tơlơi čang rơmang pot glăi pơphun bruă amăng plơi pla amra ba glăi tơlơi đăo gơnang, pơtrut pơsur lu hlăk ai gum hrŏm amăng pơjing hăng pơđĭ kyar bơwih ƀong huă. Nao jơnum hlăk ai ba gru ngă tui tơlơi pơtô mơng wa thun 2023, kâo čang rơmang amra pơlir hơbit ƀing hlăk ai, lĕ mơnuih ba jơlan hlâo, ƀu pơdơi hrăm tui boh thâo phrâo kiăng gum pơgôp hăng pơjing, pơđĭ kyar plơi pla ala ƀon”.

Anai lĕ 3 amăng rơbêh 400 čô hlăk ai ba gru, ƀing mơnuih gir kơtir amăng bruă pơhrăm hăng ngă tui tơlơi pơmĭn, gru hơdip, bruă mă mơng khua mir sir Hồ Chí Minh nao Jơnum hlăk ai ba gru ngă tui tơlơi pơtô mơng wa Hô tal 7- ƀing gơñu lĕ ƀing hlăk ai rơgơi, thâo pơčeh phrâo hăng hơmâo pran hur har thâo pơmĭn, khin ngă, gơgrong mă pô; hơdip tui gru hiam klă, gum pơgôp brơi lŏn ia./.