VOV4.Jarai - Amăng 2 hrơi mơng lơ 20 truh lơ 21/9, ƀing Khua pơ ala mơnuih ƀon sang tơring čar Dak Nông pơphun mông bưp mơnuih ƀon sang ƀơi hơdôm să Nâm N’Jang (tơring glông Dak Song), să Quảng Tâm (tơring glông Tuy Đức), să Quảng Phú (tơring glông Krông Nô) hăng să Quảng Sơn (tơring glông Dak Glong) hlâo kơ hrơi jơnum lok 4, Khua pơ ala mơnuih ƀon sang dêh čar tal XV.

Amăng mông bưp, ƀing khua mua ƀơi Dak Nông hơmâo arăng lăi pơthâo kơ bruă mă mơng Jơnum lok 4 , Khua pơ ala mơnuih ƀon sang dêh čar tal XV him lăng amra pơphun amăng blan 10 pơ anăp, hăng amra sem lăng hơdôm boh tơhnal, črăn tơlơi phiăn, amăng anun hơmâo hơdôm tơlơi phiăn bơdjơ̆ nao tơlơi sit nik amăng tơlơi hơdip kơ mơnuih ƀon sang. Anai lĕ hơdôm črăn tơlơi phăn ngă pô ƀơi ƀon lan, tơlơi phiăn lŏn mơnai čih pơkra glăi, tơlơi phiăn wai pơgang brơi mơnuih blơi gơnam, tơlơi phiăn bơwih ƀong hrŏm.

Mơnuih ƀon sang ƀơi tơring čar Dak Nông hơmâo rơkâo đĭ lu bruă ngă tơnap tap ƀơi ƀon lan, lu hloh lĕ hơdôm bruă aka ƀu klă, tơlơi gun găn amăng bruă lŏn mơnai, wai pơgang glai rưng, kaih amăng bruă ngă hră pơ-ar ƀơi ƀon lan. Sit biă ñu amăng bruă ngă hmua, mơnuih ƀon sang rơkâo črâo ba kiăng mơnuih ngă hmua pơsir hĭ bruă “pơhrui hơmâo samơ̆ trun nua”, “Koh hĭ pla glăi; pla laih anun koh hĭ”.

Siu Đoan: Pơblang