Čơtlăm lơ 12/11, ƀơi plơi prong Plei Ku, Ping gah tơring čar Gia Lai hăng Anom pơtô bruă kơđi čar Hồ Chí Minh dêh čar ta pơphun jơnum bơkơtuai bôh thâo phrâo pơđĭ kyar kơjăp phik tuai čuă lăng bôh thâo hăng čuă lăng glai klô kơjăp sui thun kual Dap Kơdư amăng rơwang ră anai. Ƀơi anai, 50 mơta tơlơi čih gum lăi pơthâo mơ̆ng ƀing kơsem min bôh thâo phrâo, mơnuih wai lăng, anom bơwih ƀong bruă tuai čuă ngui hmâo laih hơdôm tơlơi gum hơgôp yôm phăn gah kơsem min hăng bôh nik kơ tuai čuă ngui Dap Kơdư.

Amăng mông bơkơtuai, ƀing juăt bruă, ƀing kơsem min bôh thâo phrâo đing nao lăi pơdah, bơkơtuai kơ hơdôm tơlơi kah hăng tơlơi pơmin kơ pơđĭ kyar kơjăp sui thun tuai čuă lăng bôh thâo hăng tuai čuă lăng glai klô; tơhnal gal hăng mă yua, tŭ mă hơdôm ngăn rơnoh pioh pơđĭ kyar bruă tuai čuă lăng bôh thâo hăng tuai čuă lăng glai klô kual Dap Kơdư; Pơsit anih dŏng gơnam tam hăng pơlir hơbit pơtrut lăi pơhưč kiăng pơđĭ kyar kơjăp phik tuai čuă lăng kual Dap Kơdư; Tơhnal pioh lông lăng hăng hơdôm tơlơi ba tơbiă amăng pơđĭ kyar kơjăp phik tuai čuă lăng bôh thâo, hăng tuai čuă lăng glai klô kual Dap Kơdư amăng rơnuk anai; Pơsit jơlan gah, jơlan pioh pơđĭ kyar kơjăp tuai čuă lăng bôh thâo, čuă lăng glai klô kual Dap Kơdư;... Mơnuih čih, pô kơsem min, mơnuih wai lăng ăt djru lu mơn tơlơi gum pơhiăp, rơkâo đĭ jơlan pơtrut kơtang lăi pơhing, pơđĭ tui tơlơi pơmin mơ̆ng mơnuih ƀôn sang kơ pơđĭ kyar kơjăp phik tuai čuă lăng bôh thâo, tuai čuă lăng glai klô; ngă giong hơdră pơtrun, hơdră bruă, pran pơtrut ngă tui bruă mă mơ̆ng plơi pla mơnuih ƀôn sang amăng pơđĭ kyar tuai čuă ngui kơjăp nao hrŏm hăng pơgang, ngă tui bôh thâo yôm phăn plơi pla, pơdŏng plơi pla phrâo./.